បញ្ហាដីធ្លីនៅកម្ពុជា ដែលធ្លាប់តែមានប្រជាពលរដ្ឋជាច្រើន ស្រែកយំ ស្រែករកយុត្ដិធម៌ កាលពីឆ្នាំ ២០១៤ កន្លងមក ហាក់ដូចជាមានភាពស្ងប់ស្ងាត់ក្នុងឆ្នាំ ២០១៥ ដែលត្រៀមនឹងឆ្លងចូល ២០១៦ នៅយប់នេះ។ ដោយឡែក ខាងសង្គមស៊ីវិលវិញយល់ថា ភាពស្ងប់ស្ងាត់សម្រាប់ឆ្នាំនេះគឺ បណ្ដាលមកពីការបាត់បង់ជំនឿទៅលើដំណោះស្រាយ ដែលអាចទទួលបានយុត្ដិធម៌ពី រាជរដ្ឋាភិបាលផ្ដល់សម្រាប់ពួកគាត់។
មន្ត្រីអង្គការសង្គមស៊ីវិលយល់ឃើញ ខុសៗគ្នា ពីសភាពស្ងប់ស្ងាត់នៃការតវ៉ាវិវាទ ដីធ្លីធំៗមួយចំនួន ក្នុងឆ្នាំ២០១៥។
មន្ត្រីឃ្លាំមើលការរំលោភសិទ្ធិមនុស្សនៅអង្គការលីកាដូ លោក អំ សំអាត បានមានប្រសាសន៍ជាមួយវិទ្យុស្ដ្រី FM 102 នៃ WMC នៅថ្ងៃព្រហស្បតិ៍ ទី ៣១ ធ្នូ ឆ្នាំ២០១៥ នេះថា បញ្ហាវិវាទដីធ្លី របស់ប្រជាពលរដ្ឋសម្រាប់ឆ្នាំ ២០១៥ នេះគឺនៅតែមានទំនាស់នៅឡើយទេ ហើយចំពោះករណីនៃវិវាទ គឺប្រហាក់ប្រហែលនឹងឆ្នាំ ២០១៤ ដូចគ្នាដែរ។
លោក អំ សំអាត បន្តថា ក៏ប៉ុន្ដែសភាពស្ងាប់ស្ងាត់សម្រាប់ឆ្នាំ ២០១៥ នេះ គឺណ្ដាលមកពីអាជ្ញាធរ មានការខិតខំប្រឹងប្រែង ចុះទៅសម្របសម្រួល ដល់មូលដ្ឋាន ដើម្បីរកដំណោះស្រាយជាមួយពលរដ្ឋ ដែលជាហេតុបណ្ដាលឱ្យពលរដ្ឋរងគ្រោះរឿងដីធ្លីនេះ មិនមានការឡើងមកតវ៉ាផុសផុលដូចឆ្នាំ២០១៤។
លោក អំ សំអាត ក៏បានបញ្ជាក់បន្ថែមដែរថា ក្រៅតែពីការចុះអនុវត្ដផ្ទាល់ដល់មូលដ្ឋានរបស់អាជ្ញាធរពាក់ព័ន្ធ ក៏មានការព្រមានពីសំណាក់ សម្ដេច ហ៊ុន សែន ផងដែរ ថាបើសិនខេត្ដណាមួយមានពលរដ្ឋនៅតែបន្ដឡើងមកដល់ខុទ្ទកាល័យរបស់លោក ឬក៏មកដល់ភ្នំពេញ អភិបាលខេត្ដនោះត្រូវទទួលខុសត្រូវទាំងស្រុង។
លោកបន្ថែមថា៖ «បើតាមការគត់សម្គាល់របស់អង្គការលីកាដូ បើតាមការធ្វើការទៅលើប្រមាណទាំង ១៤ ខេត្ដ រាជធានី នេះ យើងឃើញថាករណីដីធ្លីដែលយើងទទួលបាន គឺមិនខុសគ្នារវាងឆ្នាំ ២០១៤ ទេ ក៏ប៉ុន្ដែភាពស្ងប់ស្ងាត់ពីការធ្វើបាតុកម្ម ឬក៏ការធ្វើការទាមទារតវ៉ា គឺយើងឃើញថា បណ្ដាលមកពីអាជ្ញាធរបានជួបពិភាគក្សា រិះរក វិធីដោះស្រាយជាមួយពួកគាត់ ដូច្នេះហើយបានយើងឃើញថាវាមានភាពស្ងប់ស្ងាត់»។
ចំណែកលោក ឡាត់ គី ប្រធានផ្នែកដីធ្លី នៃសមាគមការពារសិទ្ធិមនុស្សអាដហុក វិញយល់ឃើញថា មកទល់ពេលបច្ចុប្បន្ននេះ គឺមិនមានលទ្ធផលជាវិជ្ជមាន ពីដំណោះស្រាយរបស់រដ្ឋាភិបាលនៅឡើយទេ សម្រាប់ជនរងគ្រោះពីបញ្ហាដីធ្លី។ លោកបានបញ្ជាក់ដែរថា រដ្ឋាភិបាលពិតជាបានរកដំណោះស្រាយដល់ពួកគាត់មែន តែដំណោះស្រាយទាំងនោះត្រឹមតែជាការពន្យារពេលពីមួយឆ្នាំទៅមួយឆ្នាំប៉ុណ្ណោះ។
លោក ឡាត់ គី ទទួលស្គាល់ថា ក្នុងឆ្នាំ ២០១៥ នេះ សកម្មភាពឡើងមកតវ៉ានៅរាជធានីភ្នំពេញ លើរឿងដីធ្លី បានធ្លាក់ចុះ។ ប៉ុន្តែលោកថា កត្ដាដែលពលរដ្ឋមិនឡើងមកតវ៉ានេះ គឺពុំមែនពលរដ្ឋទទួលបានសំណង តាមការទាមទារ ឬក៏រដ្ឋាភិបាលមានដំណោះស្រាយសមស្របសម្រាប់ពួកគាត់នោះទេ គឺបណ្ដាលមកពីពួកគាត់អស់សង្ឃឹម និងលែងមានជំនឿចិត្ដចំពោះរដ្ឋាភិបាល ថានិងជួយរកដំណោះស្រាប់ពួកគាត់ ទើបធ្វើឱ្យពួកគាត់សម្រេចចិត្ដ ឈប់ស្ងៀមធ្មឹងសិន ដើម្បីរកដំណោះស្រាយផ្សេងទៀតសម្រាប់ពួកគាត់។
លោកបន្ថែមថា៖ «សម្រាប់ភាពស្ងប់ស្ងាត់របស់ប្រជាពលរដ្ឋ ក្នុងអំឡុងពេលនេះ គឺមិនមែនជាលទ្ធផលវិជ្ជមានដូចអ្វីដែលបានលើកឡើងនោះទេ ផ្ទុយទៅវិញភាពស្ងប់ស្ងាត់ទាំងអស់ក្នុងពេលនេះ បណ្ដាលមកពីភាពអស់ជំនឿរបស់ប្រជាពលរដ្ឋក្នុង ការស្វែងរកដំណោះស្រាយ បញ្ហាដីធ្លី ជាពិសេសគឺតាំងពីពេលកើតហេតុ រហូតមកដល់ពេលនេះគឺធ្វើឱ្យពួកគាត់ហ្នឹងគឺអស់ជំនឿ ទៅលើលទ្ធភាពនឹងទទួលបានយុត្ដិធម៌ ។ អញ្ចឹងហើយបានធ្វើឱ្យពួកគាត់ នៅទ្រឹងក្នុងមួយរយៈនេះ ដោយមិនដឹងត្រូវធ្វើយ៉ាងណា »។
សូមជម្រាមថា នាពេលកន្លងមក បញ្ហាវិវាទដីធ្លីនៅធំៗនៅក្នុងប្រទេសកម្ពុជា កើតឡើងនៅកន្លែងផ្សេងៗ ក្នុងនោះរួមមាន ដូចជា នៅឃុំបឹងប្រាំ ស្រុកបវេល ខេត្តបាត់ដំបង នៅអមលាំង ស្រុកថ្ពង ខេត្តកំពង់ស្ពឺ នៅឡពាង ស្រុកកំពង់ត្រឡាច ខេត្តកំពង់ឆ្នាំង នៅបឹងកក់ បុរីកីឡា ព្រែកតាសេក រាជធានីភ្នំពេញ និងនៅនៅស្រុកបទុមសាគរ ស្រុកគីរីសាគរ ខេត្តកោះកុង ព្រមទាំងនៅស្រុកត្បែងមានជ័យ ខេត្តព្រះវិហារជាដើម៕
