ប្រភព៖ BBC ថ្ងៃទី ១៩ ខែកក្កដា ឆ្នាំ ២០២៣
មានសេចក្ដីរាយការណ៍ថាកូរ៉េខាងជើងបានឃុំខ្លួនទាហានអាមេរិកម្នាក់ ដែលបានឆ្លងកាត់ព្រំដែនពីកូរ៉េខាងត្បូងដោយគ្មានការអនុញ្ញាត។បុរសរូបនេះបានធ្វើដំណើរទស្សនកិច្ចនៅតំបន់ គ្រប់គ្រងដោយអង្គការសហប្រជាជាតិដែលបានបែងចែកប្រទេសទាំងពីរ។រាយការណ៍ដោយកញ្ញា គុជ ស៊ីកុល
ព្រឹត្តិការណ៍នេះកើតឡើងក្នុងអំឡុងពេលមានភាពតានតឹងរវាងអាមេរិកនិងកូរ៉េខាងជើង។រដ្ឋាភិបាលអាមេរិកបានប្រាប់ពលរដ្ឋរបស់ខ្លួនកុំឱ្យទៅតំបន់នោះ។មេបញ្ជាការជាន់ខ្ពស់អាមេរិកបាននិយាយថាមិនមានទំនាក់ទំនងជាមួយទាហានខ្លួនដែលកូរ៉េខាងជើងចាប់ខ្លួននោះទេ។ឧត្តមនាវីឯក John Aquilino មេបញ្ជាការកងទ័ពសហរដ្ឋអាមេរិកនៃទីបញ្ជាការឥណ្ឌូប៉ាស៊ីហ្វិកបាននិយាយថាទាហានរូបនោះបានធ្វើសកម្មភាពដោយស្ម័គ្រចិត្ត “រត់ចេញ” ដោយគ្មានការអនុញ្ញាត ហើយឧប្បត្តិហេតុនេះកំពុងត្រូវបានស៊ើបអង្កេតដោយកងកម្លាំងអាមេរិកនិងកូរ៉េខាងត្បូង។
ប៉ុន្មានម៉ោងក្រោយពីការឃុំខ្លួនទាហានអាមេរិកនោះ កូរ៉េខាងជើងបានបាញ់សាកល្បងមីស៊ីលផ្លោងចំនួនពីរគ្រាប់ទៅក្នុងសមុទ្រក្បែរនោះ។ការបាញ់បង្ហោះកាំជ្រួចនេះបានកើតឡើងនៅពេលដែលភាពតានតឹងកើនឡើងខ្ពស់នៅលើឧបទ្វីបកូរ៉េ។ មិនមានការបញ្ជាក់ថា ការបាញ់បង្ហោះមីស៊ីលនេះជាប់ទាក់ទងទៅនឹងការឃុំខ្លួនទាហានរូបនោះទេ។
រហូតមកដល់ពេលនេះនៅមិនទាន់មានការបកស្រាយពីខាងជើងនៅឡើយទេ។មន្ទីរបញ្ចកោណអាមេរិកបានកំណត់អត្តសញ្ញាណទាហាននោះថាជា Private 2nd Class Travis King ។ នៅក្នុងសេចក្តីថ្លែងការណ៍មួយ អ្នកនាំពាក្យមន្ទីរបញ្ចកោណ បាននិយាយថាលោក Pte King បានចូលបម្រើកងទ័ពតាំងពីខែមករា ឆ្នាំ២០២១។
លោក King គឺជាទ័ពឯកទេសឈ្លបយកការណ៍។ដើមឡើយត្រូវបានចាត់តាំងឱ្យបម្រើការនៅកងពលរថពាសដែកទី១ របស់កងទ័ពប្តូរវេនអាមេរិកនៅកូរ៉េខាងត្បូង។សារព័ត៌មាន Associated Press រាយការណ៍ថាលោក Pte King ទំនងជាប្រឈមមុខនឹងវិធានការវិន័យ បន្ទាប់ពីត្រូវបានឃុំខ្លួននៅប្រទេសកូរ៉េខាងត្បូងពីបទចោទរំលោភបំពានវិន័យកងទ័ព ។
យោងតាម CBS News ដែលជាដៃគូរបស់ BBC របស់សហរដ្ឋអាមេរិកផ្សាយថាលោក Pte King បានឆ្លងកាត់សន្តិសុខអាកាសយានដ្ឋានក្នុងទីក្រុងសេអ៊ូល និងធ្វើដំណើរទៅកាន់ព្រំដែន។យោធាអាមេរិកបាននិយាយថាគាត់បានធ្វើដូច្នេះ “ដោយចេតនា និងគ្មានការអនុញ្ញាត”។
សាក្សីម្នាក់បានប្រាប់ CBS ថាពួកគេបានទៅទស្សនាអគារមួយនៅទីតាំងព្រំដែន “បុរសម្នាក់នេះស្រែកសម្លេងខ្លាំងៗ “ហាហាហា” ហើយរត់ចូលចន្លោះអាគារ”។សាក្សីនិយាយថា៖ «ដំបូងខ្ញុំគិតថាវាជារឿងកំប្លែង ប៉ុន្តែពេលគាត់មិនត្រឡប់មកវិញ ខ្ញុំបានដឹងថាវាមិនមែនជាការលេងសើចទេ ហើយបន្ទាប់មកអ្នករាល់គ្នាបានឆោឡោ»។
ទីបញ្ជាការអង្គការសហប្រជាជាតិ ដែលប្រតិបត្តិការនៅតំបន់គ្មានយោធា និងតំបន់សន្តិសុខរួម (JSA) បាននិយាយថា ក្រុមរបស់ខ្លួនបានទាក់ទងជាមួយយោធាកូរ៉េខាងជើង ដើម្បីព្យាយាមចរចាការដោះលែងលោក Pte King ។មន្រ្តីរូបនេះបាននិយាយថា”យើងជឿថាបច្ចុប្បន្នគាត់កំពុងស្ថិតក្នុងការឃុំឃាំងរបស់កូរ៉េខាងជើង ហើយកំពុងធ្វើការជាមួយសមភាគីកងទ័ពប្រជាជនកូរ៉េ ដើម្បីដោះស្រាយឧប្បត្តិហេតុនេះ”។
លោក Greg Scarlatoiu នាយកប្រតិបត្តិនៃគណៈកម្មាធិការសិទ្ធិមនុស្សដែលមានមូលដ្ឋាននៅទីក្រុង Washington DC បានប្រាប់ BBC ថាអាជ្ញាធរកូរ៉េខាងជើងទំនងជា “ព្យាយាមទាញយកព័ត៌មានចេញពីគាត់” ហើយ “ព្យាយាមបង្ខិតបង្ខំគាត់ឱ្យក្លាយជា ឧបករណ៍ផ្សព្វផ្សាយ”។តំបន់គ្មានយោធា(DMZ) ខាន់ចែកកូរ៉េទាំងពីរ ហើយជាតំបន់មួយក្នុងចំណោមតំបន់អសន្តិសុខខ្លាំងបំផុតក្នុងពិភពលោក។នៅទីនោះពោរពេញទៅដោយគ្រាប់មីន របងអគ្គិសនី និងលួសបន្លាព័ទ្ធជុំវិញ និងកាមេរ៉ាសុវត្ថិភាពឃ្លាំមើល។ ឆ្មាំប្រដាប់អាវុធយាមកាមដោយប្រុងប្រយ័ត្ន២៤ ម៉ោង។ តំបន់DMZ បានបំបែកប្រទេសកូរ៉េទាំងពីរចាប់តាំងពីសង្គ្រាមកូរ៉េក្នុងទសវត្សរ៍ឆ្នាំ១៩៥០ ដែលក្នុងនោះសហរដ្ឋអាមេរិកបានគាំទ្រកូរ៉េភាគខាងត្បូង។ មនុស្សរាប់សិបនាក់ព្យាយាមរត់គេចពីប្រទេសកូរ៉េខាងជើងជារៀងរាល់ឆ្នាំ ដោយភៀសខ្លួនពីភាពក្រីក្រ និងទុរ្ភិក្ស ប៉ុន្តែការរត់ចូលតំបន់ DMZ មានគ្រោះថ្នាក់ខ្លាំង និងកម្រណាស់។ ប្រទេសនេះបានបិទព្រំដែនរបស់ខ្លួននៅឆ្នាំ២០២០ នៅពេលមានជំងឺរាតត្បាត Covid-19 ហើយមិនទាន់បានបើកទ្វារឡើងវិញនៅឡើយទេ៕
