រដ្ឋមន្ត្រីក្រសួងមហាផ្ទៃបានប្រមានចាត់វិធានការតាមផ្លូវច្បាប់ ចំពោះមន្ត្រីក្រោមឱវាទមួយចំនួន ដែលបានចេញអត្តសញ្ញាណបណ្ណមានភាពមិនប្រក្រតីទៅដល់ជនបរទេស។ សង្គមស៊ីវិលស្នើឱ្យក្រសួងមហាផ្ទៃត្រូវផ្តន្ទាទោស ចំពោះមន្ត្រីទាំងនោះទៅតាមផ្លូវច្បាប់។
លោក ធូ វីរៈ រាយការណ៍ព័ត៌មាននេះ៖
សង្គមស៊ីវិលស្នើឱ្យក្រសួងមហាផ្ទៃចាត់វិធានការភ្លាមៗ ទាំងផ្នែករដ្ឋាបាល និងផ្លូវច្បាប់ ចំពោះ មន្ត្រីនគរបាល និងសមត្ថកិច្ចពាក់ព័ន្ធ ដែលបានចេញអត្តសញ្ញាណបណ្ណសញ្ជាតិខែ្មរទៅដល់ជនបរទេសកន្លងមក។
សូមជម្រាបថា ការស្នើរបស់សង្គមស៊ីវិលនេះ ធ្វើឡើងក្រោយពេលសម្តេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានមានប្រសាសន៍ កាលពីព្រឹកថ្ងៃទី២៩ ខែធ្នូ ឆ្នាំ២០១៥ ម្សិលមិញថា ក្រសួងមហាផ្ទៃបានរកឃើញមានភាពមិនប្រក្រតីមួយចំនួននៃមន្ត្រីនគរបាល និងសមត្ថកិច្ចពាក់ព័ន្ធ បានចេញអត្តសញ្ញាណបណ្ណសញ្ជាតិខែ្មរទៅដល់ជនបរទេសកន្លងមក ។
លោក សន ជ័យ នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជាបានឱ្យដឹង នាព្រឹកថ្ងៃទី ៣០ ធ្នូ ឆ្នាំ២០១៥ នេះថា កន្លងមកលោកសង្កេតឃើញថា ការចេញអត្តសញ្ញាណបណ្ណសញ្ជាតិខែ្មរទៅដល់ជនបរទេសនេះ ពិសេសជនជាតិវៀណាម មានភាពមិនប្រក្រតីច្រើន ដូចជាករណីជនបរទេសមិនចេះនិយាយភាសាខ្មែរ ឯកសារមិនគ្រប់គ្រាន់ និងគ្មានការទទួលស្គាល់ពីព្រះមហាក្សត្រជាដើម។
លោក សន ជ័យបន្តថា បញ្ហានេះក្រសួងមហាផ្ទៃត្រូវតែចាត់វិធានការភ្លាមៗ ទាំងផ្នែករដ្ឋាបាល និងផ្លូវច្បាប់។ នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជារូបនេះ បានស្នើឱ្យអង្គភាពប្រឆាំងអំពើពុករលួយស៊ើបអង្កេតអំពីបញ្ហានេះផងដែរ។
លោក សន ជ័យ និយាយថា៖ «ខ្ញុំថា គឺកំហុសធ្ងន់ធ្ងរណាស់របស់អ្នកដែលចេញអត្តសញ្ញាណប័ណ្ណ ហើយមិនតែអ្នករត់ការទេ ត្រូវមានទោសដល់អ្នកចុះហត្ថលេខាទៀតផង ។ បទល្មើសពុករលួយជាប្រព័ន្ធ រឿងចេញអត្តសញ្ញាណបណ្ណឱ្យជនមួយមិនជាជនជាតិខ្មែរ មានន័យថាពួកគេមិនទាន់ទទួលស្គាល់សញ្ជាតិ ដោយព្រះរាជក្រឹត។ រឿងនេះធ្ងន់ធ្ងរណាស់» ។
ទាក់ទិននឹងបញ្ហានេះដែរ លោក ព្រាប កុល នាយកប្រតិបត្តិនៃអង្គការតម្លាភាពកម្ពុជា បានឱ្យដឹងដែរថា ភាពមិនប្រក្រតីនៃការចេញអត្តសញ្ញាណបណ្ណសញ្ជាតិខែ្មរ ទៅដល់ជនបរទេសនេះ ជាប់ពាក់ព័ន្ធទៅនឹងការសូកលុយ ទៅនឹងមន្ត្រីមូលដ្ឋាន ដែលមានភារកិច្ចបំពេញឯកសារអត្រានុគោលដ្ឋាន ឬអត្តសញ្ញាណបណ្ណ ទើបបណ្តាលឱ្យមានការចេញអត្តសញ្ញាណប័ណ្ណសញ្ជាតិខែ្មរមិនប្រក្រតីនេះ។ លោក ព្រាប កុល បន្ថែមថា ក្រសួងមហាផ្ទៃត្រូវផ្តន្ទាទោសចំពោះមន្ត្រីទាំងនោះ ទៅតាមផ្លូវច្បាប់ ដើម្បីទប់ស្កាត់បញ្ហានេះកើតឡើងពីជំនាន់មួយទៅជំនាន់មួយ។
លោល ព្រាប កុល មានប្រសាសន៍ថា៖ «ខ្ញុំថាមិនគួរតែទេ មន្ត្រីដែលប្រព្រឹត្តខុស ខុសច្បាប់ ខុសនីតិវិធី ហើយជាប់ពាក់ព័ន្ធអំពើពុករលួយ មិនគួរតែ គឺត្រូវតែទទួលទោស ប្រសិនបើមិនដាក់ទោសទេ គឺបង្កើតនូវគំរូមិនល្អ និងខាតប្រយោជន៍ជាតិ»។
សូមរំឭកថា សម្តេច ស ខេង រដ្ឋមន្ត្រីក្រសួងមហាផ្ទៃ បានបញ្ជាក់ថា ក្រសួងនឹងចាត់វិធានការ ចំពោះមន្ត្រីទាំងនោះ ទៅតាមរដ្ឋបាលរបស់ក្រសួង បើធ្ងន់ធ្ងរជាងនេះ នឹងឈានទៅដល់ការអនុវត្តទៅតាមផ្លូវច្បាប់ទៀតផង៕
