បាងកក៖ ប៉ូលីសថៃបាននិយាយនៅថ្ងៃចន្ទទី១០ ខែកក្កដា ឆ្នាំ២០២៣ថាយ៉ាងហោចណាស់មនុស្សម្នាក់បានស្លាប់ដោយសារការដួលរលំសំណង់ស្ពានអាកាសដ៏ធំនៅលើផ្លូវដ៏មមាញឹកមួយ នៅក្នុងរាជធានីបាង
កក។ឧបទ្ទវហេតុនេះត្រូវបានចែកចាយវីដេអូជាទូទៅតាមអ៊ីនធឺណិត។
រាយការណ៍ដោយកញ្ញា គុជ ស៊ីកុល
រនាំងដែកដ៏ធំនៅការដ្ឋានសំណង់នៅផ្លូវ Lat Krabang Tollway នៅភាគខាងកើតរាជធានីបាងកក បានបាក់រលំដល់ដីមកលើផ្លូវសម្រាប់អ្នកថ្មើរជើង និងផ្លូវឡាននៅរសៀលថ្ងៃច័ន្ទទី១០ កក្កដា ២០២៣។សំណង់ស្ពានអាកាសនេះគឺជាផ្នែកមួយនៃគម្រោងសាងសង់ផ្លូវហាយវេក្នុងគោលបំណងសម្រួលចរាចរណ៍ដែលកកស្ទះខ្លាំងក្នុងទីក្រុង។
នៅក្នុងវីដេអូមួយដែលត្រូវបានផ្សព្វផ្សាយដោយនាយកដ្ឋានបង្ការ និងកាត់បន្ថយគ្រោះមហន្តរាយរបស់ប្រទេសថៃ បង្ហាញពីរន្ទាដែកដ៏ធំរបស់ការដ្ឋានផ្លូវហាយវេកំពុងសាងសង់បានរអិលធ្លាក់ចុះមកលើដី។
ប៉ូលិសបាននិយាយថា មនុស្សយ៉ាងហោចណាស់ម្នាក់បានស្លាប់ និង៨នាក់ទៀតរងរបួស។អភិបាលក្រុងបាងកក លោក Chadchart Sittipunt បានប្រាប់អ្នកយកព័ត៌មានកាលពីល្ងាចថ្ងៃចន្ទនៅកន្លែងកើតហេតុថា “យើងមិនទាន់ដឹងថាតើអ្វីជាមូលហេតុនាំឱ្យមានគ្រោះថ្នាក់នេះទេ” ។លោកបានមានប្រសាសន៍ថា “យើងមិនទាន់មានព័ត៌មានណាមួយអំពីអ្នកបាត់ខ្លួននៅឡើយទេ” ដោយលោកបានបន្ថែមថាអ្នករងរបួសបួននាក់ស្ថិតក្នុងស្ថានភាពធ្ងន់ធ្ងរ។លោក Chadchart បាននិយាយថា យើងរង់ចាំវិស្វករវិភាគអំពីការដួលរលំនេះ។លោកបានបន្តថា៖ «យើងផ្ដល់អាទិភាពសុវត្ថិភាពជាចំបង។ យើងនឹងចាប់ផ្តើមស្វែងរកក្នុងគំនបាក់បែកដោយប្រុងប្រយ័ត្ន»។
ប្រទេសថៃមានកំណត់ត្រាសុវត្ថិភាពសំណង់មិនល្អ ដោយមានគ្រោះថ្នាក់កើតមានជាញឹកញាប់។
ក្នុងឆ្នាំ ២០១៦ យ៉ាងហោចណាស់មនុស្ស១៣នាក់បានស្លាប់បន្ទាប់ពីអគារមួយបានរលំបាក់ក្នុងកំឡុងពេលសាងសង់។ឧបទ្ទវហេតុនេះបាននាំមកនូវការតវ៉ាជាថ្មីពីក្រុមការពារសិទ្ធិការងារ អំពីស្តង់ដារសុវត្ថិភាពធូររលុង និងប្រាក់ឈ្នួលទាបនៅការដ្ឋានសំណង់ថៃ៕
ប្រភព៖ C N A ថ្ងៃទី ១១ ខែ កក្កដា ឆ្នាំ ២០២៣
