ស្ត្រីជាច្រើនដែលមានអាយុចាប់ពី ៥0 ឆ្នាំនឹងត្រូវស្វែងរករបបអាហារដើម្បីជំនួយដល់សុខភាពបេះដូងឬខួរក្បាល ជួយគ្រប់គ្រងរោគសញ្ញាផ្សេងៗនៃការអស់រដូវ និងដើម្បីជួយដល់សុខភាពរបស់ពួកគេទាំងមូល។
ចំពោះរបបអាហារនៅក្នុងអត្ថបទនេះផងដែរ គឺជ្រើសរើសប្រភេទអាហារណាដែលផ្តល់ភាពងាយស្រួលក្នុងការអនុវត្ត ហើយអាចសម្របនឹងរាងកាយបាន ដោយមិនតឹងតែងពេក និងសម្បូរអាហាររូបត្ថម្ភមានតុល្យភាព ជាពិសេសគឺផ្អែកលើភស្តុតាងដោយការសិក្សាជ្រាលជ្រាវនានា។
តទៅនេះគឺជារបបអាហារទាំង ៤ ប្រភេទ ដែលល្អបំផុតសម្រាប់ស្ត្រីដែលមានអាយុលើសពី ៥0 ឆ្នាំ ដោយយោងតាមការលើកឡើងពីគេហទំព័រសុខភាព healthline ដូចតទៅ៖
ប្រភេទទី១ គឺរបបអាហារមេឌីទែរ៉ាណេ ដែលជារបបអាហារមួយដែលត្រូវបានវាយតម្លៃថា ជារបបអាហារដែលមានសុខភាពល្អបំផុតសម្រាប់មនុស្សស្ទើរតែគ្រប់គ្នា ជាពិសេសស្ត្រីដែលមានអាយុលើសពី ៥០ ឆ្នាំផងដែរ។ របបអាហារនេះមានសារជាតិខ្លាញ់ផ្អែតទាប មានដូចជា គ្រាប់ធញ្ញជាតិ បន្លែ ផ្លែឈើ ជាពិសេសគឺប្រេងអូលីវ ដែលជាប្រភពចម្បងនៃជាតិខ្លាញ់។ របបអាហារមេឌីទែរ៉ាណេនេះ ភាគច្រើនមានប្រភេទអាហាររុក្ខជាតិ ប៉ុន្តែក៏មានរួមបញ្ចូលនូវត្រី និងទឹកដោះគោក្នុងបរិមាណមធ្យម ហើយរួមមានសាច់មាន់ឬសាច់ទា និងសាច់ក្រហមក្នុងបរិមាណតិចតួចផងដែរ។
តាមការស្រាវជ្រាវជាច្រើនទស្សវត្សរ៍បង្ហាញថា របបអាហារនេះជួយកាត់បន្ថយហានិភ័យជំងឺរ៉ាំរ៉ៃផ្សេងៗដែលទាក់ទងនឹងអាយុដូចជាជំងឺបេះដូង ជំងឺទឹកនោមផ្អែម ជំងឺមហារីក និងបញ្ហាផ្លូវចិត្តទៀតផង។
ជាពិសេសទៅទៀតនោះ ការសិក្សាមួយក៏បានបង្ហាញថា របបអាហារមេឌីទែរ៉ាណេក៏ជួយកាត់បន្ថយហានិភ័យជំងឺធាត់ ចំពោះស្ត្រីដែលអស់រដូវ និងក្រោយអស់រដូវប្រមាណ ៣០% ឯណ្ណោះ ។
ប្រភេទទី២គឺ របបអាហារដែលជួយបញ្ឈប់ការលើសសម្ពាធឈាម ឬហៅថារបបអាហារ DASH។ របបអាហារមួយនេះល្អបំផុតសម្រាប់សុខភាពបេះដូង។ ជាពិសេសល្អសម្រាប់ស្រ្តី ព្រោះថាស្រ្តីដែលចាប់ផ្តើមអស់រដូវគឺមានអត្រាសម្ពាធឈាមខ្ពស់ និងប្រឈមជំងឺបេះដូង។
របបអាហារ DASH រួមមានបន្លែ ផ្លែឈើ និងទឹកដោះគោដែលមានជាតិខ្លាញ់ទាប បន្ទាប់មកមានគ្រាប់ធញ្ញជាតិត្រី និងបសុបក្សីក្នុងបរិមាណមធ្យម។ ចំណែកឯសាច់ក្រហម និងអាហារផ្អែមត្រូវបានហាមឃាត តែអាចអនុញ្ញាតម្តងម្កាលបាន។
រីឯសាច់ដែលបានកែច្នៃគឺត្រូវហាមឃាត់តែម្តងក្នុងរបបអាហារនេះ។ ជាពិសេសនោះគឺ ការកំណត់ការទទួលទានអាហារដែលមានជាតិប្រៃ ឬអាហារកែច្នៃ ដើម្បីជួយកាត់បន្ថយកូឡេស្តេរ៉ុល និងការគ្រប់គ្រងជាតិស្ករក្នុងឈាមបានកាន់តែប្រសើរ។
ចំណែកឯប្រភេទរបបអាហារទី៣នោះ របបអាហារ Flexitarian ដែលជារបបអាហារដោយផ្អែកលើរុក្ខជាតិ ប៉ុន្តែក៏មានសាច់ ស៊ុត ទឹកដោះគោ និងត្រី ម្តងម្តាលផងដែរ ហើយប្រភេទរបបអាហារនេះ ក៏អាចជាគម្រោងមួយផ្នែកនៃប្រភេទអាហារបួសដែរ។
របបអាហារ Flexitarianនេះ ជាជម្រើសក្នុងការបង្កើនជាតិសរសៃ និងប្រូតេអ៊ីនដោយរុក្ខជាតិ និងអាចទទួលទានតាមតម្រូវការ។
របបអាហារនេះ មានដូចជាសាច់ក្រហម និងត្រី ហើយក៏សម្បូរទៅដោយជាតិកាល់ស្យូមខ្ពស់ ដែលល្អសម្រាប់សុខភាពឆ្អឹងសម្រាប់ស្រ្តីអស់រដូវ។
បន្ថែមពីនេះ ការស្រាវជ្រាវបានបង្ហាញថា របបអាហារនេះផ្តល់នូវអត្ថប្រយោជន៍ សម្រាប់ការរក្សាទម្ងន់ខ្លួន សុខភាពបេះដូង និងការពារជំងឺទឹកនោមផ្អែមទៀតផង។
និងចុងក្រោយគឺប្រភេទរបបអាហារផ្លូវចិត្ត(the MIND Diet) ដែលល្អសម្រាប់សុខភាពខួរក្បាល។
អាយុជាកត្តាដ៏ចម្បងសម្រាប់ជំងឺវង្វេង ហើយអត្រាប្រេវ៉ាឡង់ប្រហែល ២ ភាគ ៣ នៃអ្នកដែលមានជំងឺវង្វេងនេះ គឺជាស្រ្តី។ ហើយរបបអាហារនេះ ត្រូវបានបង្កើតឡើងដើម្បីកាត់បន្ថយហានិភ័យនៃជំងឺវង្វេងនេះ។ អាហារចម្បងនៃរបបអាហារនេះមានដូចជា គ្រាប់ធញ្ញជាតិ ពពួកប៊ឺរី ស្លឹកបៃតង សណ្តែក ប្រេងអូលីវ និងខ្លាញ់ត្រី ហើយមិនលើកទឹកចិត្តក្នុងការទទួលទាន អាហារបំពង សាច់ក្រហម ប៊ឺ ឈីស និងបង្អែមនោះទេ៕
