ក្រុងប៉េកាំងៈ អាជ្ញាធរចិនបានព្រមានអំពីអាកាសធាតុមិនល្អ និង “គ្រោះមហន្តរាយធម្មជាតិជាច្រើន” ក្នុងខែកក្កដានេះ ក្នុងនោះមានភ្លៀងធ្លាក់ខ្លាំងនៅតំបន់មួយចំនួននៃប្រទេសចិននឹងត្រូវជម្លៀសមនុស្សរាប់ពាន់នាក់ចេញពីលំនៅស្ថាន។រាយការណ៍ដោយ កញ្ញា គុជ ស៊ីកុល
យោងតាមទីភ្នាក់ងារព័ត៌មានចិនស៊ិនហួ នៅថ្ងៃអង្គារ ទី ៤ ខែកក្កដា ឆ្នាំ២០២៣ បានចេញផ្សាយការប្រកាសអាសន្នពីគ្រោះមហន្តរាយដែលបង្កឡើងដោយភ្លៀងធ្លាក់ខ្លាំងនៅក្នុងតំបន់ភាគកណ្តាល និងភាគនិរតីនៃប្រទេសចិន។សារព័ត៌មានស៊ីនហួរបានផ្សាយថា អាជ្ញាធរឧតុនិយមបានព្រមានថាប្រទេសចិនអាចប្រឈមនឹង “គ្រោះមហន្តរាយធម្មជាតិជាច្រើននៅក្នុងខែកក្កដា រួមទាំងទឹកជំនន់ អាកាសធាតុមិនល្អ ព្យុះទីហ្វុង និងសីតុណ្ហភាពឡើងក្ដៅខ្លាំងជាដើម” ។
កាសែត Chongqing Daily បានផ្សាយកាលពីថ្ងៃចន្ទទី៣ ខែកក្កដាថាផ្ទះរាប់សិបខ្នងនិងផ្លូវជាច្រើនត្រូវបានខូចខាតនៅក្នុងខេត្ត Shaanxi ភាគពាយ័ព្យនៃប្រទេសចិន ដោយសារភ្លៀងធ្លាក់ខ្លាំង មិនធ្លាប់មានក្នុងរយៈពេលហាសិបឆ្នាំ” កាលពីចុងសប្តាហ៍កន្លងទៅ។
យោងតាមការផ្សាយរបស់ទូរទស្សន៍រដ្ឋ CCTV ភ្លៀងធ្លាក់នៅតំបន់ម៉ុងហ្គោលីខាងក្នុង បានបង្កជាទឹកជំនន់ភ្លាមៗកាលពីថ្ងៃអាទិត្យ ដោយបានសម្លាប់មនុស្សម្នាក់ និងបាត់ខ្លួនពីរនាក់។មន្ត្រីប្រចាំតំបន់ក៏បាននិយាយផងដែរថា មនុស្សជាង១ម៉ឺននាក់នៅក្នុងខេត្ត Hunan ភាគកណ្តាលត្រូវបានជម្លៀសចេញពីទឹកជំនន់កាលពីសប្តាហ៍មុន ដែលបានបំផ្លាញផ្ទះជាង ២ពាន់ខ្នង។
ប្រព័ន្ធផ្សព្វផ្សាយចិនបានផ្សព្វផ្សាយវីដេអូដែលគេមើលឃើញរថយន្តរអណ្ដែតតាមផ្លូវលិចទឹកក្នុងខេត្តហ៊ូណានកាលពីសប្តាហ៍មុន ហើយទឹកភ្លៀងហូរកាត់ផ្ទះល្វែង និងហាងទំនិញផងដែរ។
ជាមួយគ្នានេះសារព័ត៌មានរដ្ឋ CGTN បានរាយការណ៍ថា ចាប់តាំងពីថ្ងៃសុក្រទី៣០ ខែមិថុនាមក ក្រុមអ្នកជួយសង្គ្រោះនៅតំបន់ផ្សេងៗនៃភាគខាងត្បូងប្រទេសចិន រួមទាំងខេត្ត Guizhou ភាគនិរតី បាននិងកំពុងជម្លៀសមនុស្ស និងសត្វពាហនៈទៅកាន់ទីទួលសុវត្ថិភាពពីទឹកជំនន់ និងការរអិលបាក់ដី។ប្រព័ន្ធផ្សព្វផ្សាយបានរាយការណ៍ថា ភ្លៀងធ្លាក់ខ្លាំងបានវាយប្រហារផ្នែកខ្លះនៃខេត្តយូណានកាលពីចុងសប្តាហ៍ ដោយបានហូរនាំរថយន្តនៅតាមដងផ្លូវដែលមើលទៅដូចជាទឹកទន្លេ។
ការរអិលបាក់ដីនៅក្នុងខេត្ត Sichuanនៅភាគនិរតីបានសម្លាប់មនុស្សជាច្រើននាក់កាលពីសប្តាហ៍មុន។ទឹកជំនន់បានកើតឡើងស្របពេលជាមួយនឹងរលកកំដៅនៅក្នុងផ្នែកផ្សេងទៀតនៃប្រទេសចិន ដោយមជ្ឈមណ្ឌលឧតុនិយមជាតិរបស់ប្រទេសចិនបានព្រមានអ្នកស្រុកនៅក្នុងរដ្ឋធានីប៉េកាំង និងតំបន់ជាច្រើនផ្សេងទៀតឱ្យស្នាក់នៅក្នុងផ្ទះនៅពេលមានសីតុណ្ហភាពក្ដៅខ្លាំង។ប្រព័ន្ធផ្សព្វផ្សាយរដ្ឋបានរាយការណ៍ដោយដកស្រង់មជ្ឈមណ្ឌលអាកាសធាតុជាតិថា ភាគខាងជើងប្រទេសចិននៅតែមានអាកាសធាតុក្តៅខុសពីធម្មតា។ប្រព័ន្ធផ្សព្វផ្សាយរដ្ឋបានផ្សាយថា អាកាសធាតុក្តៅត្រូវបានគេរំពឹងថានឹងអូសបន្លាយរយៈពេល១០ថ្ងៃទៀត ខណៈដែលពលរដ្ឋចិនខ្លះមានកំហឹង និងបានបង្ហោះការខកចិត្តរបស់ពួកគេនៅលើប្រព័ន្ធផ្សព្វផ្សាយសង្គម។
ប្រទេសចិនមានសីតុណ្ហភាពកើនឡើងខ្លាំងក្នុងឆមាសទីមួយនៃឆ្នាំនេះ ដែលជាកម្រិតខ្ពស់បំផុតចាប់តាំងពីឆ្នាំ១៩៦១ នេះបើយោងតាមសេចក្តីថ្លែងការណ៍របស់មជ្ឈមណ្ឌលឧតុនិយមជាតិកាលពីថ្ងៃអាទិត្យ។នៅក្នុងខែមិថុនា ទីក្រុងប៉េកាំងបានឡើងកំដៅខ្លាំងក្នុងរយៈពេល១៤ថ្ងៃ ដែលមានសីតុណ្ហភាពលើសពី 35 អង្សាសេ ដែលត្រូវនឹងកំណត់ត្រាកាលពីខែកក្កដា ឆ្នាំ២០០០ នេះបើយោងតាមសារព័ត៌មានរដ្ឋ Beijing Evening News ។ អ្នកវិទ្យាសាស្ត្រនិយាយថា ការកើនឡើងសីតុណ្ហភាពពិភពលោក ដែលភាគច្រើនបណ្តាលមកពីការដុតឥន្ធនៈហ្វូស៊ីល កំពុងធ្វើឱ្យអាកាសធាតុកាន់តែធ្ងន់ធ្ងរនៅទូទាំងពិភពលោក ហើយប្រទេសជាច្រើននៅអាស៊ីបានជួបប្រទះរលកកំដៅដ៏ខ្លាំង និងសីតុណ្ហភាពខ្ពស់បំផុតក្នុងរយៈពេលប៉ុន្មានសប្តាហ៍ថ្មីៗនេះ។ប្រទេសចិនគឺជាប្រទេសដែលបញ្ចេញឧស្ម័នផ្ទះកញ្ចក់ដ៏ធំបំផុតនៅលើពិភពលោក ដែលនាំឱ្យមានការប្រែប្រួលអាកាសធាតុ៕
ប្រភព៖ C N A ថ្ងៃទី ៤ ខែ កក្កដា ឆ្នាំ ២០២៣
