ភ្នំពេញ៖ ព្រឹទ្ធសភានៃព្រះរាជាណាចក្រកម្ពុជានឹងបើកសម័យប្រជុំនៅថ្ងៃទី២៩ ខែធ្នូ ឆ្នាំ២០១៥ ស្អែកនេះ ដើម្បីពិនិត្យ និងសម្រេចលើរបៀបវារៈចំនួន ២។
យោងតាមសេចក្ដីជូនដំណឹង របស់អគ្គលេខាធិការដ្ឋានព្រឹទ្ធសភា ចេញថ្ងៃទី២៨ ខែធ្នូ ឆ្នាំ២០១៥ បានឱ្យដឹងថា របៀបវារៈទាំងពីរនោះរួមមាន ទី១៖ ពិនិត្យនិងសម្រេចលើសេចក្តីព្រាងរបាយការណ៍របស់គណៈកម្មាធិការអចិន្ត្រៃយ៍ព្រឹទ្ធសភា ស្តីពីសកម្មភាពការងាររបស់ព្រឹទ្ធសភា នៅចន្លោះសម័យប្រជុំលើកទី៧ និងលើកទី៨ នីតិកាលទី៣ និងទី២៖ កំណត់របៀបវារៈ កាលបរិច្ឆេទ និងសមាសភាពលេខាធិការ សម័យប្រជុំ ព្រឹទ្ធសភា លើកទី៨ នីតិកាលទី៣ ។
សេចក្ដីជូនដំណឹងឱ្យដឹងដែរថា សម្ដេច សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជានឹងធ្វើជាអធិបតីនៃកិច្ចប្រជុំនេះ៕
