ភ្នំពេញ៖ បន្ទាប់ពីចំណាយពេលជិត ៣ថ្ងៃក្នុងដំណើរទស្សនកិច្ចនៅខេត្តកំពង់ស្ពឺ និងរាជធានីភ្នំពេញ ក្រុមហ៊ុនផលិតចំណីអាហារអូស្ត្រាលីមួយ បានចាប់អារម្មណ៍កសិផលឈើហូបផ្លែរបស់កម្ពុជាដោយចង់វិនិយោគលើការនាំចេញពីកម្ពុជាទៅបរទេស។ នេះបើតាមសេចក្តីប្រកាសព័ត៌មានរបស់ស្ថានទូតអូស្រ្តាលីប្រចាំកម្ពុជាថ្ងៃទី១៩ខែមិថុនាឆ្នាំ២០២៣នេះ ដែលវិទ្យុស្រ្តីទទួលបានពីមន្រ្តី ទូតអូស្រ្តាលី។
ក្រុមហ៊ុន SPC Global ដែលជាអាជីវកម្មកសិឧស្សាហកម្មដ៏ល្បីល្បាញរបស់អូស្ត្រាលី បានមកធ្វើទស្សនកិច្ចនៅខេត្តកំពង់ស្ពឺ និងរាជធានីភ្នំពេញ កាលពីថ្ងៃទី ១៤-១៦ ខែមិថុនា ដើម្បីស្វែងយល់ពីការវិនិយោគ និងសក្តានុពលពាណិជ្ជកម្មនៅកម្ពុជា។ ក្នុងដំណើរទស្សនកិច្ចនេះ ក្រុមហ៊ុនដែលមានមូលដ្ឋាននៅទីក្រុងវីកតូរៀ ប្រទេសអូស្ត្រាលីមួយនេះ បានបង្ហាញចំណាប់អារម្មណ៍តាមរយៈសេចក្តីប្រកាសព័ត៌មានរបស់ទូតអូស្រ្តាលីថា ក្រុមហ៊ុនចាប់អារម្មណ៍ចង់ពង្រីកការវិនិយោគរបស់ខ្លួន ធ្វើការនាំចេញពីកម្ពុជានូវកសិផលដូចជា ស្វាយ សាវម៉ាវ មៀន និងស្រកានាគ។
ក្រុមហ៊ុនដែលមានបទពិសោធន៍ជាងមួយសតវត្សក្នុងការកែច្នៃ និងវេចខ្ចប់ផលិតផលផ្លែឈើ និងបន្លែមួយនេះ បានវិនិយោគលើការទិញផលិតផលមួយចំនួនពីបណ្តាប្រទេសនានាក្នុងតំបន់អាស៊ីទៅកាន់ទីផ្សារបរទេស។
បើតាមសេចក្តីប្រកាសព័ត៌មានខាងលើដំណើរទស្សនកិច្ចរយៈពេលពីរថ្ងៃកន្លះនេះ មន្រ្តីស្ថានទូតអូស្ត្រាលី និងប្រធានក្រុមហ៊ុន SPC Global បានធ្វើដំណើរទៅទស្សនកិច្ចនៅរោងចក្រផលិតកម្មចំណីអាហារគីរីរម្យក្នុងខេត្តកំពង់ស្ពឺ និងក្រុមហ៊ុន លីលី នៅក្នុងរាជធានីភ្នំពេញ។ ក្នុងនោះក៏បានជួបជាមួយមន្រ្តីក្រសួងកសិកម្ម ក្រសួងពាណិជ្ជកម្ម ក្រសួងសេដ្ឋកិច្ច សភាពាណិជ្ជកម្មកម្ពុជា និងម្ចាស់អាជីវកម្មកសិឧស្សាហកម្មធំៗមួយចំនួនផងដែរ។
ប្រធានក្រុមហ៊ុន SPC Global មានប្រសាសន៍ថា កម្ពុជាជាប្រទេសដ៏ល្អមួយសម្រាប់អូស្រ្តាលី ក្នុងការស្វែងរកឱកាសថ្មីៗផ្នែកកសិកម្ម ជាពិសេសបន្លែ និងផ្លែឈើ ដែលមិនមានការដាំដុះ ឬបច្ចុប្បន្ននេះមិនមានវត្តមាននៅក្នុងប្រទេសអូស្ត្រាលី។ ក្រុមហ៊ុន SPC ឱ្យដឹងថា ក្រុមហ៊ុនអាចផ្តល់ជំនាញ និងចំណេះដឹងផ្នែកចំណីអាហារជួយអភិវឌ្ឍផលិតផលចំណីអាហារប្រកបដោយភាពច្នៃប្រឌិត និងមានគុណភាពខ្ពស់ ខណៈឧស្សាហកម្មកសិ-ចំណីអាហារនៅកម្ពុជាកំពុងតែមានការអភិវឌ្ឍ។
សូមបញ្ជាក់ថា រវាងឆ្នាំ ២០១៧ ដល់ឆ្នាំ ២០២២ ផលិតកម្មផ្លែស្វាយរបស់កម្ពុជាកើនឡើង ១៦០% ហើយការនាំចេញផ្លែឈើស្ងួតបានកើនឡើងរហូតដល់ ៦ ៥០០%។ ប្រទេសកម្ពុជាមានសមត្ថភាពខ្ពស់លើកសិផលដែលមានតម្លៃខ្ពស់ រួមមាន ស្វាយ ចេក ស្វាយចន្ទី ដំឡូងជ្វា ល្ង ម្ទេស និងម្រេចកំពតដ៏ល្បីល្បាញលើពិភពលោក។ភ្ជាប់ជាមួយដំណើរទស្សនកិច្ចរបស់ក្រុមហ៊ុន SPC Global នេះគឺជាផ្នែកមួយនៃកិច្ចខិតខំប្រឹងប្រែងរបស់ប្រទេសអូស្ត្រាលីក្នុងការពង្រឹងទំនាក់ទំនងផ្នែកកសិកម្មជាមួយកម្ពុជា។
ទស្សនកិច្ចនេះ ត្រូវបានផ្តួចផ្តើមឡើងបន្ទាប់ពីកិច្ចប្រជុំប្រកបដោយជោគជ័យរវាងក្រុមហ៊ុន SPC និងប្រតិភូកម្ពុជា ក្នុងអំឡុងទស្សនកិច្ចរបស់កម្មវិធី CAPRED ទៅកាន់សួនកសិ-ឧស្សាហកម្ម នៅប្រទេសអូស្ត្រាលី កាលពីដើមឆ្នាំ២០២៣នេះ៕
