ខេត្តពោធិ៍សាត់៖ ប្រជាពលរដ្ឋជិត ៤០ នាក់ មានអាការៈចុកពោះ ក្អួតចង្អោរ និងអ្នកខ្លះទៀតនោមចេញឈាម សង្ស័យថា ពុលទឹកក្រូចកូកាកូឡា ស្ថិតនៅក្នុងឃុំតាលោ ស្រុកបាកាន ខេត្តពោធិ៍សាត់ នាព្រឹកថ្ងៃទី២៥ ខែធ្នូ ឆ្នាំ ២០១៥នេះ។
លោក ធូ វីរៈ លម្អិតព័ត៌មាននេះ៖
មន្ត្រីនគរបាលស្រុកបាកាន ខេត្តពោធិ៍សាត់ បានឱ្យដឹងនៅថ្ងៃសុក្រនេះថា មានប្រជាពលរដ្ឋចំនួន ៣៥ នាក់ មានអាការៈចុកពោះ ក្អួតចង្អោរ និងនោមចេញឈាម។
អធិការស្រុកបាកាន លោក នាង វ៉ុន បានឱ្យវិទ្យុស្ត្រី FM 102 នៃមណ្ឌលព័ត៌មានស្ត្រីកម្ពុជា ដឹងនៅថ្ងៃសុក្រ ទី២៥ ខែធ្នូ នេះថា ជាជំហានដំបូងអាជ្ញាធរសង្ស័យថា អាការៈចុកពោះ ក្អួតចង្អោ រនិងនោមចេញឈាមនោះ អាចបណ្ដាលមកពីការពុលទឹកក្រូចកូកាកូឡា ដែលប្រជាពរដ្ឋបានទទួលទាននៅក្នុងពិធីសែនព្រេនប្ដីប្រពន្ធ ១ គូ នៅក្នុងភូមិ កាលពីថ្ងៃទី២១ ធ្នូ កន្លងមក។
លោកអធិការស្រុករូបនេះបន្តថា រហូតមកដល់ពេលនេះ អាជ្ញាធរជំនាញកំពុងធ្វើការពិនិត្យរកមូលហេតុឱ្យពិតប្រាកដផងដែរ។
លោក នាង វ៉ុន មានប្រសាសន៍ថា៖ «ក្រុមគ្រូពេទ្យ និងសមត្ថកិច្ចជំនាញកំពុងតែពិនិត្យធ្វើកោសលវិច្ច័យសិន វាមិនទាន់និយាយបានថា ពុលបណ្តាលមកពីទឹកក្រូចទេ»។
ជុំវិញការបញ្ហាប្រជាពលរដ្ឋស្រុកបាកាន មានអាការៈពុលនេះ គ្រូពេទ្យប្រចាំស្រុកបាកាន លោក មូល កោសិន្ទ បានឲ្យដឹងថា រហូតមកដល់រសៀលថ្ងៃទី២៥ ខែធ្នូ នេះ មានប្រជាពលរដ្ឋរងគ្រោះ ដោយសង្ស័យពុលទឹកក្រូច កូកាកូឡានេះ មានចំនួន៣៨នាក់។ លោកបន្តថា មានអ្នកជំងឺចំនួន៦ នាក់ ដោយសារមានអាការៈធ្ងន់ធ្ងរ ត្រូវបានក្រុមគ្រួសារជនរងគ្រោះបញ្ចូនទៅសង្គ្រោះបន្ទាន់នៅមន្ទីរពេទ្យខេត្តពោធិ៍សាត់។
លោក កោសិន្ទ បន្តថា រហូតមកពេលនេះ លោកក៏មិនអាចបញ្ជាក់បានថា ពលរដ្ឋទាំងនោះ មានអាការៈចុកពោះ ក្អួតចង្អោរ និងនោមចេញឈាម បណ្ដាលមកមូលហេតុអ្វីឱ្យពិតប្រាកដនៅឡើយទេ ព្រោះកំពុងតែធ្វើការពិនិត្យនៅឡើយ។
លោក មូល កោសិន្ទ និយាយថា៖ «ឥឡូវនេះ មានប្រជាពលរដ្ឋទាំងចាស់ ទាំងក្មេងមានចំនួន ៣៨ នាក់ កំពុងតែសម្រាកព្យាបាលនៅមន្ទីរពេទ្យស្រុកបាកាន។ ដោយឡែក ពលរដ្ឋចំនួន៦ នាក់ ផ្សេងទៀត បានបញ្ចូនទៅព្យាបាលនៅមន្ទីរពេទ្យខេត្តពោសាធិ៍សាត់ ដោយមានអាការៈធ្ងន់ធ្ងរជាងគេ»។
សូមបញ្ជាក់ថា ករណីស្រដៀងគ្នានេះដែរ កាលពីពេលថ្មីៗនេះ ប្រជាពលរដ្ឋ ៧ នាក់ បានស្លាប់ និងជាង ៤០ នាក់ទៀត ត្រូវបានបញ្ចូនទៅសង្គ្រោះបន្ទាន់នៅមន្ទីរពេទ្យ បន្ទាប់ពីអ្នកភូមិបានបរិភោគសាច់ឆ្កែ និងស្រា នៅក្នុងពិធីបុណ្យសពមួយស្ថិតនៅក្នុងស្រុកស្នួល ខេត្តក្រចេះ។
ដូចគ្នានេះដែរ កាលពីកំឡុងខែ វិច្ឆិកាកន្លងមកមានពលរដ្ឋ ២ នាក់ស្លាប់ និងជាង ៣០ នាក់ ទៀត បានបញ្ជូនទៅសង្គ្រោះនៅមណ្ឌលសុខភាពស្រុកសំបូរ ដោយសង្ស័យថាពុលស្រាស ដែលពួកគេបានផឹកកំដរបុណ្យមួយក្នុងភូមិ៕
