ភ្នំពេញ៖ កម្មវិធីប្រកួតកីឡាជនមានពិការភាពអាស៊ាន ឬអាស៊ានប៉ារ៉ាហ្គេម នឹងត្រូវបិទបញ្ចប់នៅថ្ងៃទី៩ ខែមិថុនា ឆ្នាំ២០២៣ នេះ។ ក្រោយការប្រកួតយ៉ាងស្វឹតស្វាញរយៈពេល ១សប្ដាហ៍ លទ្ធផលប្រទេសដែលឈរនៅកំពូលតារាងបានមេដាយមាសច្រើនជាងគេ គឺឥណ្ឌូនេស៊ី មានចំនួន១៥៩គ្រឿង មេដាយសរុបចំនួន ៤០១គ្រឿង។ ប្រទេសថៃឈរនៅលេខ២ មានមេដាយមាស ១២៦គ្រឿង និងមានមេដាយសរុប ៣២៨គ្រឿង។ ចំណែកប្រទេសលេខរៀងទី៣ គឺវៀតណាម ទទួលបានមេដាយមាស ៦៦គ្រឿង និងមានមេដាយសរុប ២០១គ្រឿង។
សម្រាប់ម្ចាស់ផ្ទះអាស៊ានប៉ារ៉ាហ្គេមលើកទី១២នេះ គឺកម្ពុជា ឈរនៅលេខរៀងទី៨ ដោយទទួលបានមេដាយមាស៩គ្រឿង និងមេដាយសរុប៧០គ្រឿង។ អ្វីជាគួរឱ្យកត់សម្គាល់ គឺក្នុងចំណោមមេដាយមាសសរុបរបស់កម្ពុជា គឺកីឡាការិនីអាចរកបានដល់ទៅ៦គ្រឿង។ ពិសេសកម្ពុជាទទួលបានមេដាយសរុបច្រើនជាបណ្តាឆ្នាំមុនៗ។
គួររម្លឹកដែរថា កីឡាការិនីកម្ពុជា វ៉ិត ចន្ថា ជាកីឡាការិនីឈ្នះមេដាយមាស ៣គ្រឿង ក្លាយជាកីឡាការិនីកម្ពុជាដំបូងគេដែលអាចរកមេដាយមាសច្រើនបំផុត ខណៈកាលពីឆ្នាំ២០១៤ មានតែកីឡាករ វ៉ាន់ វ៉ុន ម្នាក់ប៉ុណ្ណោះដែលបានឈ្នះមេដាយមាស ៣គ្រឿង ដែលប្រកួតនៅប្រទេសមីយ៉ាន់ម៉ា៕
