ការស្លាក់ គឺជាពេលដែលមនុស្សម្នាក់មិនអាចនិយាយ ក្អក ឬដកដង្ហើមបាន ដែលបណ្តាលមកពីអាហារឬវត្ថុជាប់គាំងក្នុងផ្លូវដង្ហើម។ ការស្លាក់នេះ រារាំងអុកស៊ីហ្សែនមិនឱ្យទៅដល់សួត និងខួរក្បាល ហើយបើកង្វះអុកស៊ីសែនទៅខួរក្បាលលើសពី ៤ នាទី អាចបណ្តាលឱ្យខូចខួរក្បាល ឬស្លាប់ជាដើម។
វាពិតជាសំខាន់ណាស់សម្រាប់មនុស្សគ្រប់គ្នាក្នុងការស្វែងយល់ និងដឹងពីរបៀបសង្រ្គោះចំពោះបញ្ហាស្លាក់នៅផ្ទះ និងនៅកន្លែងសាធារណៈ។
តើមានបច្ចេកទេសអ្វីខ្លះ ដើម្បីសង្គ្រោះមនុស្សមានបញ្ហាស្លាក់?
ចំពោះវិធីសង្រ្គោះបញ្ហាស្លាក់នេះ អ្នកជំនាញណែនាំអ្នកសង្រ្គោះត្រូវគក់ខ្នង និងរុញពោះរបស់ពួកគេ។ បន្ថែមពីនេះ ប្រសិនបើអ្នកស្លាក់នៅដឹងខ្លួន អ្នកសង្រ្គោះត្រូវប្រយ័ត្ននៅពេលរុញពោះ ដោយកុំប្រើកម្លាំងខ្លាំងពេក ដើម្បីការពារកុំឱ្យខូចឆ្អឹងជំនី ឬសរីរាង្គខាងក្នុងរបស់ពួកគេ។ មួយវិញទៀត បើមានករណីសន្លប់ អ្នកសង្រ្គោះត្រូវសង្កត់ទ្រូងផងដែរ។
តទៅនេះយើងនឹងយកវិធីសាស្រ្តគក់ខ្នងដើម្បីសង្រ្គោះជនរងគ្រោះដែលស្លាក់ដូចតទៅ៖
ជាដំបូងអ្នកត្រូវផ្អៀងពួកគេទៅមុខថ្នមៗដើម្បីឱ្យរាងកាយពួកគេស្របនឹងដី។ បន្ទាប់មក អ្នកត្រូវដាក់ដៃម្ខាងលើទ្រូងរបស់ពួកគេ រួចប្រើដៃម្ខាងទៀតរបស់អ្នក គក់ខ្នងពួកគេចំនួន ៥ ដង ឱ្យចំកណ្តាលស្មា។
បន្ថែមពីនេះ គឺជាវិធីសាស្រ្តរុញពោះ។ ចំពោះការរុញពោះនេះ គឺដើម្បីបង្កើតក្អកសិប្បនិម្មិត។ ការក្អកនេះជួយខ្យល់ឆ្លងកាត់តាមបំពង់ខ្យល់ និងបណ្តេញវត្ថុដែលស្ទះចេញពីផ្លូវដង្ហើមនិងមាត់របស់ពួកគេ។
ចំពោះវិធីសាស្រ្តរុញពោះនេះមានដូចជា៖
- ជាដំបូង អ្នកត្រូវដាក់ដៃជុំវិញចង្កេះរបស់ជនរងគ្រោះ រួចដាក់កណ្តាប់ដៃមួយនៅពីលើផ្ចិត និងខាងក្រោមទ្រុងពួកគេ។
- បន្ទាប់មកអ្នកត្រូវយកដៃម្ខាងទៀតចាប់កណ្តាប់ដៃរបស់អ្នក រួចអ្នកត្រូវក្តាប់ឱ្យណែន សង្កត់ពោះពីក្រោមឡើងលើ និងក្រោមឆ្អឹងជំនីរចំនួន ៥ ដងឱ្យបានលឿន។
- បន្ទាប់ពីនោះ អ្នកត្រូវបន្តគក់ខ្នងនិងរុញពោះ ដោយកុំបញ្ឍប់រហូតដល់វត្ថុដែលបានស្លាក់នោះចេញមកក្រៅ។
- ហើយសិនបើជនរងគ្រោះមានដុះក្បាលពោះ អ្នកត្រូវរុញទ្រូងជំនួសវិញ។
ដោយឡែកប្រសិនបើអ្នកស្លាក់ ហើយនៅតែម្នាក់ឯង អ្នកអាចរុញពោះខ្លួនឯងទល់នឹងខ្នងកៅអី ឬនឹងគែមតុ។
សូមបញ្ជាក់ថា ដើម្បីកាត់បន្ថយគ្រោះថ្នាក់ដែលអាចកើតមាននៅពេលគក់ខ្នង និងពេលរុញពោះ អ្នកគួរតែប្រើតែក្នុងករណីសង្គ្រោះបន្ទាន់នៅពេលដែលប្រាកដថាអ្នកមានបញ្ហាស្លាក់ ហើយប្រើវិធីនេះតែចំពោះមនុស្សពេញវ័យ និងកុមារអាយុលើសពី ១ ឆ្នាំប៉ុណ្ណោះ។
យ៉ាងណាមិញ អ្នកអាចការពារខ្លួនពីការស្លាក់ដោយអនុវត្តវិធានការសុវត្ថិភាពដូចជា៖
អ្នកត្រូវកាត់អាហារទៅជាបំណែកតូចៗ ព្រមទាំងទំពារអាហារយឺតៗ និងឱ្យបានហ្មត់ល្អ ជាពិសេសប្រសិនបើអ្នកពាក់ធ្មេញ។ បន្ថែមពីនេះ កុំសើច ឬនិយាយពេលទំពារ និងពេលលេបអាហារ។ ម្យ៉ាងវិញទៀត កុំពិសាគ្រឿងស្រវឹងច្រើន មុននិងអំឡុងពេលបរិភោគអាហារជាដើម៕
