សម្តេចហ៊ុន សែន នាយករដ្ឋមន្ត្រីនៃកម្ពុជា បានព្រមានចំៗចំពោះ លោក ស៊ន តារា សកម្មជនគាំទ្រអតីតគណបក្សសង្គ្រោះជាតិ ថានឹងដកតំណែងឪពុកម្ដាយ និងសាច់ញាតិ របស់លោកចេញពីក្របខណ្ឌមន្ត្រីរាជការ ដរាបណាលោក ស៊ន តារានៅតែគគ្លើនរឹងទទឹងរិះគន់រដ្ឋាភិបាលបន្តទៀត។ លោក គីម ចាន់ចាវ រាយការណ៍
សម្តេចហ៊ុន សែន ព្រមានបែបនេះកើតមានឡើងស្របពេលដែលការរិះគន់របស់លោក ស៊ន តារា សកម្មជនគាំទ្រអតីតគណបក្សសង្គ្រោះជាតិ ដែលកំពុងភៀសខ្លួននៅប្រទេសបារាំង បានកើតឡើងកាន់តែខ្លាំងតាមបណ្ដាញសង្គម បើទោះបីជាសម្តេចហ៊ុន សែនធ្លាប់ហៅឱ្យវិលមកស្រុក ដើម្បីអាចចូលរួមជីវភាពនយោបាយជាមួយគណបក្សប្រជាជនកម្ពុជាយ៉ាងណាក្ដី។ លោក ស៊ន តារា ជាទូទៅតែងប្រើប្រាស់បណ្តាញសង្គម ដើម្បីរិះគន់ការដឹកនាំរបស់សម្តេច ហ៊ុន សែន និងចាត់ទុកខ្លួនឯងថាជាជនស្មោះស្ម័គ្រ គាំទ្រអតីតបក្សសង្គ្រោះជាតិ ក្នុងការស្វែងរកប្រជាធិបតេយ្យពិតនិងពេញលេញឱ្យកម្ពុជា។
សកម្មភាពរឹងទទឹងបែបនេះរបស់លោក ស៊ន តារា ត្រូវបានសម្តេចហ៊ុន សែន ចាត់ទុកនឹងហៅពេញៗមាត់ថា «ជាក្មេងពាល»។ ក្នុងពិធីប្រគល់សញ្ញាបត្រជូនគរុសិស្ស គរុនិស្សិត និស្សិត និងបុគ្គលិកអប់រំជាង ២ពាន់នាក់ នៃវិទ្យាស្ថានជាតិអប់រំ(NIE) នៅព្រឹកថ្ងៃទី២៥ ខែមេសាសម្តេចក៏បានព្រមានដកតំណែងឪពុកម្តាយ និងបងប្អូនលោកពីក្របខណ្ឌមន្ត្រីរាជការផងដែរ ក្នុងករណីដែលលោក ស៊ន តារា នៅតែរឹងទទឹងមិនដើរតាមមាគ៌ា ដែលសាច់ញាតិរបស់ខ្លួននៅក្នុងស្រុកកំពុងធ្វើ។
សម្តេចហ៊ុន សែន កន្លងមកធ្លាប់បើកផ្លូវឱ្យលោក ស៊ន តារា និងសកម្មជនគណបក្សប្រឆាំងរស់នៅបរទេស ឱ្យចូលរួមធ្វើនយោបាយជាមួយបក្សកាន់អំណាច ដោយមិនប្រកាន់ទោសពៃរ៍។ ទោះយ៉ាងណាករណីអនុគ្រោះដល់លោក ស៊ន តារា ដោយសម្តេចហ៊ុន សែន យល់ថាសកម្មជនបក្សប្រឆាំងរូបនេះ មានគ្រួសារកំពុងបម្រើការងារជារាជការនៅស្រុកខ្មែរ ហើយស្មោះស្ម័គ្រជាមួយគណបក្សប្រជាជនកម្ពុជា។ ក៏ប៉ុន្តែលោក ស៊ន តារា បានដាក់នូវលក្ខខណ្ឌ៤ ដើម្បីឱ្យលោកអាចចូលរួមជីវភាពជាមួយបក្សកាន់អំណាចបាន ក្នុងនោះ លក្ខខណ្ឌទី១ គឺ ស៊ន តារា ត្រូវតែធ្វើជាបេក្ខជននាយករដ្ឋមន្ត្រីរបស់គណបក្សប្រជាជន ទើប ស៊ន តារា ព្រមចូលរួមជាមួយគណបក្សប្រជាជន។ ទន្ទឹមនឹងការព្រមានពីសម្តេចហ៊ុន សែនម្ដងជាពីរដង កាលពីពេលកន្លងទៅ ឪពុកម្តាយរបស់លោក ស៊ន តារា បានចេញមុខនិយាយជាសាធារណៈ ថាអ្នកទាំងពីរចង់ឱ្យកូនប្រុសវិលត្រលប់ចូលស្រុកខ្មែរវិញ ដោយឈប់ជឿការញុះញង់របស់អតីតគណបក្សប្រឆាំងតទៅទៀត៕