យោងតាម Reuters ក្រុមប្រឹក្សាសន្តិសុខអង្គការសហប្រជាជាតិគ្រោងនឹងបោះឆ្នោតនៅថ្ងៃព្រហស្បតិ៍ទី២៧ មេសា ឆ្នាំ ២០២៣ ដើម្បីថ្កោលទោសក្រុមតាលីបង់ដែលហាមស្ត្រីអាហ្វហ្គានីស្ថានមិនឱ្យធ្វើការឱ្យអង្គការសហប្រជាជាតិនៅក្នុងប្រទេសអាហ្វហ្គានីស្ថានហើយអំពាវនាវឱ្យរដ្ឋបាលតាលីបង់ “កែប្រែបម្រាមនេះឱ្យបានឆាប់”។
សេចក្ដីសម្រេចដែលត្រូវបោះឆ្នោតនាពេលនេះត្រូវបានព្រាងដោយ ប្រទេសអារ៉ាប់រួម និងជប៉ុន បានហៅការហាមឃាត់នេះថាជា “រឿងមិនធ្លាប់មានពីមុនមកក្នុងប្រវត្តិសាស្ត្ររបស់អង្គការសហប្រជាជាតិ” និងអះអាង ” តួនាទីស្រ្តីមិនអាចខ្វះបាននៅក្នុងសង្គមអាហ្វហ្គានីស្ថាន” ។
អ្នកការទូតបាននិយាយថា ញត្តិថ្កោលទោសនេះគេរំពឹងថានឹងត្រូវបានអនុម័ត។ សេចក្តីព្រាងសេចក្តីសម្រេចបានចែងថា ការហាមប្រាមស្ត្រីអាហ្វហ្គានីស្ថានធ្វើការឱ្យអង្គការសហប្រជាជាតិ “ធ្វើឱ្យខូចសិទ្ធិមនុស្ស និងគោលការណ៍មនុស្សធម៌”។
ឯកអគ្គរដ្ឋទូតរបស់អារ៉ាប់រួមប្រចាំអង្គការសហប្រជាជាតិ លោកស្រី Lana Nusseibeh បាននិយាយថា ការរឹតបន្តឹងនេះ “អាចបង្កផលប៉ះពាល់ដល់ប្រតិបត្តិការរបស់អង្គការសហប្រជាជាតិ នៅក្នុងប្រទេសអាហ្វហ្គានីស្ថានទាំងមូល” ក្រុមប្រឹក្សាសន្តិសុខមិនអាចនៅស្ងៀមបានទេ។លោកស្រីបានបន្តថា៖ «បញ្ហាប្រឈមក្នុងប្រទេសអាហ្វហ្គានីស្ថានមានលក្ខណៈចម្រុះ ហើយក៏ត្រូវតែដោះស្រាយផងដែរ»។ «ប៉ុន្តែអ្វីដែលច្បាស់នោះគឺថា បើគ្មានស្ត្រីទេ ស្ថានការណ៍ដ៏អាក្រក់ក្នុងប្រទេសនេះមិនអាចដោះស្រាយដោយនិរន្តរភាពឡើយ»។
កាលពីដើមខែនេះ ក្រុមតាលីបង់បានចាប់ផ្តើមហាមឃាត់ស្ត្រីអាហ្វហ្គានីស្ថានធ្វើការឱ្យអង្គការសហប្រជាជាតិ បន្ទាប់ពីបានបញ្ឈប់បុគ្គលិកស្ត្រីភាគច្រើនដែលធ្វើការឱ្យអង្គការជំនួយមនុស្សធម៌ក្នុងខែធ្នូ។ ចាប់តាំងពីការដួលរំលំរដ្ឋាភិបាលដែលគាំទ្រដោយលោកខាងលិចក្នុងឆ្នាំ ២០២១ ពួកគេក៏បានរឹតបន្តឹងលើស្ត្រី រួមទាំងការរារាំងស្ត្រីមិនឱ្យរៀននៅសាកលវិទ្យាល័យ និងហាមក្មេងស្រីរៀននៅវិទ្យាល័យផងដែរ។ពួកតាលីបង់និយាយថាខ្លួនគោរពសិទ្ធិស្ត្រីដោយយោងតាមការបកស្រាយច្បាប់អ៊ិស្លាម។ មន្ត្រីតាលីបង់បាននិយាយថា ការសម្រេចចិត្តហាមប្រាមស្រ្តីនៅពេលនេះគឺជា “បញ្ហាផ្ទៃក្នុង”។
