អង្គការកសិកម្ម និងស្បៀងអាហាររបស់អង្គការសហប្រជាជាតិថា ការផលិតស្រូវអង្ករនៅឆ្នាំ២០១៥នេះ បានធ្លាក់ចុះ បើធៀបនឹងឆ្នាំ២០១៤ កន្លងទៅ។ ករណីនេះអ្នកជំនាញកសិកម្មនៅកម្ពុជាថា តម្លៃស្រូវអង្ករនៅកម្ពុជានឹងប្រសើរឡើង។ ប៉ុន្តែអ្នកជំនាញរូបនេះក៏សម្ដែងពីការព្រួយបារម្ភ ថាការកើនតម្លៃស្រូវអង្ករនេះ នឹងនាំឱ្យប៉ះពាល់ដល់ពលរដ្ឋផ្សេងទៀតផងដែរ។
អ្នកឯកទេសខាងកសិកម្មនៅកម្ពុជា បង្ហាញជំហរថា តម្លៃស្រូវអង្ករនៅកម្ពុជាអាចប្រសើរឡើង ដោយសារសមត្ថភាពផលិតស្រូវអង្ករនៅលើពិភពលោកបានធ្លាក់ចុះ។
លោកបណ្ឌិតយ៉ង សាំងកុមារ បានមានប្រសាសន៍ជាមួយវិទ្យុស្ត្រីអេហ្វអឹម ១០២ នៃWMC នៅថ្ងៃសុក្រទី១៦ ខែតុលា នេះថា ដោយសារកត្តាអាកាសធាតុ បណ្ដាលឱ្យបរិមាណផលិតផលស្រូវអង្ករនៅក្នុងប្រទេសសំខាន់ៗរបស់អាស៊ាន បានធ្លាក់ចុះ។ លោកថា ដោយសារការផលិតធ្លាក់ចុះនេះហើយ ដែលនាំឱ្យទីផ្សារស្រូវអង្ករនៅកម្ពុជាអាចនឹងកើតឡើង។ លោកមានប្រសាសន៍ថា៖ «នៅក្នុងប្រទេសធ្វើស្រូវសំខាន់ៗមានថៃ ភូមា ហើយបូក
កម្ពុជាយើង កម្ពុជាយើងក៏មានការថយចុះដែរ អ៊ីចឹងយើងអាចប្រមើលមើល៍នៅឆ្នាំ២០១៦ហ្នឹង តម្លៃស្រូវវាអាចមានការកើនឡើង ប៉ុន្តែកើនឡើងប៉ុនណាៗនោះ គឺយើងអត់ទាន់ហ៊ានថា ប៉ុន្តែវាអាចជារឿងមួយល្អដែរ»។
យ៉ាងនេះក្ដី លោកយ៉ង សាំងកុមារ ក៏សម្ដែងការព្រួយបារម្ភផងដែរថា ការនាំស្រូវអង្ករចេញច្រើនពេក អាចនាំឲ្យប៉ះពាល់ដល់សន្ដិសុខស្បៀងនៅកម្ពុជា ឬអាចធ្វើឲ្យតម្លៃអង្ករក្នុងប្រទេសកើនឡើង ធ្វើឲ្យប៉ះពាល់ដល់ជីវភាពពលរដ្ឋដទៃទៀត ដែលមិនមែនជាអ្នកផលិតស្បៀង ។ លោកមានប្រសាសន៍បន្តថា៖ «យើងត្រូវបារម្ភអំពីរឿងបញ្ហាសន្តិសុខស្បៀង បញ្ហារឿងតម្លៃអង្ករដែរ។ អីចឹង រដ្ឋាភិបាលយើងត្រូវធ្វើប៉ាន់ស្មានឲ្យបានច្បាស់លាស់ ឲ្យបានទិន្នន័យមួយប្រាកដប្រជាថា ឆ្នាំ២០១៥-១៦ ហ្នឹង ផលស្រូវសរុបដែលយើងរំពឹងថាប្រមូលបានប៉ុន្មាន ហើយ ហើយយើងអាចលើសប៉ុន្មានខ្វះប៉ុន្មានអីចឹង ដើម្បីងាយស្រួលគ្រប់គ្រង»។
យោងតាមការផ្សាយរបស់ អង្គការកសិកម្ម និងស្បៀងអាហាររបស់អង្គការសហប្រជាជាតិ (FAO) នៅខែតុលា ឆ្នាំ២០១៥ ឲ្យដឹងថា ទិន្នផលអង្ករនៅឆ្នាំ២០១៥នេះនឹងធ្លាក់ចុះ២លាន៦សែនតោន ឬស្មើនឹងសូន្យក្បៀស៤ភាគរយបើធៀបនឹងទិន្នផលឆ្នាំ២០១៤ កន្លងទៅ។ FAO ឲ្យដឹងដែរថា មូលហេតុដែលនាំឲ្យផលិតផលអង្ករធ្លាក់ចុះនៅឆ្នាំនេះដោយសារការប្រែប្រួលអាកាសធាតុធម្មជាតិ និងជាពិសេសគឺបាតុភូតធម្មជាតិអ៊ែល នីណូ (El Nino)។
កាលពីដើមរដូវវស្សាឆ្នាំ២០១៥នេះ ប្រទេសថៃដែលជួបគ្រោះរាំងស្ងួតធ្ងន់ធ្ងរបានប្រកាសថា នឹងកាត់បន្ថយការនាំចេញអង្ករត្រឹមតែ២លានតោនប៉ុណ្ណោះ ដែលជាធម្មតាប្រទេសនេះអាចនាំអង្ករចេញទៅលក់នៅក្រៅប្រទេសជិត១០លានតោនក្នុងមួយឆ្នាំៗ។
ចំណែកឯនៅប្រទេសភូមាវិញ ដោយសារគ្រោះទឹកជំនន់ អាជ្ញាធរប្រទេសនេះបានប្រកាសថា នឹងបិទការនាំអង្ករចេញទាំងស្រុង។
អង្គការ FAO បានព្យាករថា នៅឆ្នាំ២០១៥នេះ ប្រទេសនៅក្នុងតំបន់អាស៊ីនឹងអាចផលិតអង្ករបានជាង ៦៧២លានតោន ដែលចំនួននេះទាបជាងទិន្នផលឆ្នាំ២០១៤ កន្លងទៅ៕
