ភ្នំពេញ៖ អ្នកនាំពាក្យក្រសួងវប្បធម៌ និងវិចិត្រសិល្បៈ លោក ថៃ នរៈសត្យា បានលើកទ្បើងថា ប្រជាជនកម្ពុជាពិតជាមានការយល់ដឹងច្រើនជាងមុនទាក់ទងនឹងការអភិរក្សបេតិកភណ្ឌអរូបី ប៉ុន្តែលោកថា ពលរដ្ឋត្រូវតែចូលរួមថែរក្សាបន្ថែមទៀត ដើម្បីផ្សាភ្ជាប់ពាក្យថា វប្បធម៌រលត់ ជាតិរលាយ វប្បធម៌ពន្ធនារាយ ជាតិថ្កើងថ្កាន។ ការលើកទ្បើងបែបនេះបន្ទាប់ពីក្រសួងវប្បធម៌ និងវិចិត្រសិល្បៈធ្វើសិក្ខាសាលាបិទវគ្គបណ្តុះបណ្តាលស្តីពី “ការបង្កើតគម្រោងផែនការសម្រាប់ការពារនិងអភិរក្សបេតិកភណ្ឌអរូបីនៅកម្ពុជា” កាលពីថ្ងៃទី ១២ ខែមីនា ឆ្នាំ២០១៦ ។
លោក ថៃ នរៈសត្យា អ្នកនាំពាក្យក្រសួងវប្បធម៌ មានប្រសាសន៍ថា ការបង្កើតគម្រោងផែនការសម្រាប់ការពារ និងអភិរក្សបេតិកភណ្ឌអរូបីនៅកម្ពុជា មានសារៈសំខាន់ណាស់សម្រាប់ប្រជាពលរដ្ឋកម្ពុជា។ លោក ថៃ នរៈសត្យា បានឱ្យដឹងថា ក្រសួងបានបង្កើតគម្រោងខាងលើនេះជាយូរមកហើយ។ ប៉ុន្តែការបង្កើតឱ្យមានសិក្ខាសាលា ដែលលើកយកប្រធានបទដដែលយកមកនេះ គឺក្នុងគោលបំណងដើម្បីធ្វើការផ្សព្វផ្សាយបន្ថែមទៀតទៅលើអ្វីដែលមានស្រាប់តែប៉ុណ្ណោះ។ លើសពីនេះទៀតលោកថា ចាប់តាំងពីបង្កើតឱ្យមានគម្រោងនេះឡើង ប្រជាពលរដ្ឋមានការយល់ដឹងច្រើនពីការអភិរក្សបេតិកភណ្ឌអរូបីនៅកម្ពុជានេះ។
អ្នកនាំពាក្យក្រសួងវប្បធម៌ និងវិចិត្រសិល្បៈរូបនេះបន្ថែមថា ការបង្កើតឱ្យមានគម្រោងផែនការសម្រាប់ការពារ និងអភិរក្សបេតិកភណ្ឌអរូបីនៅកម្ពុជានេះ បានផ្តល់អត្ថប្រយោជន៍ជាច្រើនទៅដល់សង្គមកម្ពុជា។
ការផ្តល់អត្ថប្រយោជន៍នោះពីព្រោះថា វានឹងជួយថែរក្សាវប្បធម៌ ប្រពៃណីដែលខ្មែរមានតាំងពីយូរណាស់មកហើយនោះ ដល់អ្នកជំនាន់ក្រោយ ។ លោក ថៃ នរៈសត្យាស្នើឱ្យពលរដ្ឋ ទាំងអស់ត្រូវចូលរួមចំណែកការពារ និងអភិរក្សបេតិកភណ្ឌអរូបី ព្រោះវប្បធម៌ ប្រពៃណីនេះ គឺជាអត្តសញ្ញាណរបស់ប្រទេសជាតិ។
«មហាជនរបស់យើងគួរតែចូលរួម យើងគួរតែជួយលើកស្ទួយ ជួយគាំទ្រនៅអ្វីដែលយើងមើលឃើញថាក្រសួងក៏ដូចជាប្រទេសជាតិ ក៏ដូចជារដ្ឋាភិបាលយើងបានដើរទៅលើផ្លូវមួយដែលស្រមស្របហើយផ្លូវនេះអត់មានខុសនោះទេមិនមានឃើញផ្លូវមួយណាដែលគួរឱ្យទិះទៀននោះទេ..»។
ទាក់ទងនឹងការលើកទ្បើងខាងលើនេះដែរ អ្នកស្រាវជ្រាវខាងប្រវត្តិសាស្ត្រ អរិយធម៌ និងវប្បធម៌ខ្មែរ លោក មីសែល ត្រាណេ មានប្រសាសន៍ជាមួយវិទ្យុស្ត្រីនៅថ្ងៃនេះថា ពលរដ្ឋខ្មែរបច្ចុប្បន្នពិតជាមានសន្ទុះយល់ដឹងច្រើនជាងមុន ទាក់ទងនិងការអភិរក្សបេតិកភណ្ឌអរូបីនេះ។
លោក មីសែល ត្រាណេ បន្ថែមទៀតថា ប្រសិនបើអាចរក្សាបាននៅវប្បធម៌នេះ ប្រទេសជាតិនឹងកាន់តែមានការរីកចំរើនខ្លាំង ជាពិសេសធ្វើឱ្យពលរដ្ឋស្គាល់ពីមរតកដូនតា ដែលបានរក្សាទុកឱ្យអ្នកជំនាន់ក្រោយ។ ប៉ុន្តែលោកថា ទន្ទឹមនឹងនឹងមានសន្ទុះនៃការយល់ដឹងនេះ ក្រសួងសាមី ក៏ដូចជារដ្ឋាភិបាលត្រូវតែពង្រឹងយុទ្ធសាស្ត្ររបស់ខ្លួនបន្ថែមទៀត ដើម្បីធ្វើយ៉ាងណាផ្សព្វផ្សាយទៅដល់សាធារណជនឱ្យមានការយល់ដឹងកាន់តែច្រើនថែមទៀតពីតម្លៃវប្បធម៌ ប្រពៃណី វប្បធម៌ខ្មែរ។
«ដើម្បីបង្កើនការអភិរក្សវាងាយទេ អ្នកដឹកនាំលោកត្រូវតែមានបេះដូងជាអ្នកអភិរក្ស លោកត្រូវតែដាក់ទម្ងន់ទៅលើវប្បធម៌ជាតិ យើងមិនអាចលើកតម្លៃវប្បធម៌អ្នកដទៃជាងវប្បធម៌ជាតិឯងនោះទេ… »។
សូមបញ្ជាក់ផងដែរថា ក្រសួងវប្បធម៌ និងវិចិត្រសិល្បៈ បានធ្វើសិក្ខាសាលាបិទវគ្គបណ្តុះបណ្តាលស្តីពីការបង្កើតគម្រោងផែនការសម្រាប់ការពារនិងអភិរក្សបេតិកភណ្ឌអរូបីនៅកម្ពុជា កាលពីថ្ងៃទី ១២ ខែមីនា ឆ្នាំ ២០១៦នេះ។ ការធ្វើសិក្ខាសាលានេះ ក្នុងគោលបំណងដើម្បីធ្វើការផ្សព្វផ្សាយបន្ថែមទៀត ទៅដល់អ្នកចូលរួមក៏ដូចជាសាធារណជនគ្រប់រូបត្រូវយល់ដឹងពីតម្លៃនៃការថែរក្សាវប្បធម៌ ប្រពៃណី ជាពិសេសការអភិរក្សការពារ និងអភិរក្សបេតិកភណ្ឌអរូបីនៅកម្ពុជាឱ្យបានគង់វង្ស៕
