អង្គការពលកម្មអន្តរជាតិ (ILO) បានព្យាករណ៍ថា ចំនួនមនុស្សនៅលើសកលលោកជិត ២០០ លាននាក់ គ្មានការងារធ្វើ នៅក្នុងឆ្នាំ ២០១៦ ហើយចំនួននេះនឹងកើនឡើងដល់ ២០០ លាននា ក់នៅក្នុងឆ្នាំ ២០១៧ ខាងមុខ ដោយសារសក្តានុពលការងារមានការថមថយ។
យោងតាមរបាយការណ៍របស់អង្គការ ILO ដែលមានចំណងជើងថា៖ «ទស្សនវិស័យការងារ និងសង្គមពិភពលោក»ចេញផ្សាយនៅថ្ងៃទី ២០ មករា ឆ្នាំ ២០១៦ បានឱ្យដឹងថា ការបន្តអូសបន្លាយបញ្ហាគ្មានការងារធ្វើកាន់តែមានកម្រិតខ្ពស់ នៅតាមបណ្តាប្រទេសទើបរីកចម្រើន និងប្រទេសកំពុងអភិវឌ្ឍន៍ ជាពិសេសប្រទេសប្រេស៊ីល ចិន និងបណ្តាប្រទេសផលិតប្រេងនានា ដែលបញ្ហានេះ ធ្វើឱ្យប៉ះពាល់យ៉ាងខ្លាំងដល់ពិភពការងារ ។
លោក Guy Ryder អគ្គនាយកអង្គការ មានប្រសាសន៍ថា មានបុរស និងស្ត្រីជាច្រើននាក់ កំពុងតែធ្វើការងារទទួលប្រាក់ខែទាប នៅក្នុងប្រទេសដែលមានសេដ្ឋកិច្ចទើបងើបឡើង និងប្រទេសកំពុងអភិវឌ្ឍន៍ ហើយនិន្នាការនេះកាន់តែមានច្រើន ក្នុងប្រទេសអភិវឌ្ឍផងដែរ។
លោក Ryder សន្និដ្ឋានថា បញ្ហាកង្វះការងារ ឬការងារមិនសមរម្យនាំឲ្យមនុស្សងាកទៅរកការងារមួយចំនួន មិនរៀបរយ ដែលធម្មតាការងារដែលមានផលិតភាពទាប ប្រាក់ឈ្នួលទាប និងពុំមានកិច្ចគាំពារពីសង្គម។
យោងតាមរបាយការណ៍ ILO ដដែលបានបញ្ជាក់ថា អ្នកគ្មានការងារធ្វើនឹងមានចំនួន ១,១ លាននាក់ថែមទៀត ក្នុងឆ្នាំ ២០១៧ បន្ថែមពីលើចំនួនអ្នកដែលគ្មានការងារធ្វើសរុបលើពិភពលោក។
ប្រធាននាយកដ្ឋានស្រាវជ្រាវរបស់អង្គការ (ILO) លោក Raymond Torres បានពន្យល់ថា បរិយាកាសសេដ្ឋកិច្ចគ្មានស្ថេរភាពពាក់ព័ន្ធនឹងលំហូរមូលធនមានការឡើងចុះមិនថិតថេរនៃទីផ្សារហិរញ្ញវត្ថុ គឺមិនទាន់អាចបំពេញមុខងារបានល្អប្រសើរនៅឡើយ។ លើសពីនេះទៅទៀត កង្វះតម្រូវការក្នុងសកលលោកទាំងមូលនឹងបន្តប៉ះពាល់លើសហគ្រាស និងបន្ទុចបង្អាក់ដល់ការវិនិយោគ ការបង្កើតការងារកាន់តែខ្លាំងថែមទៀត។
លោក Torres បន្តថា អ្នកតាក់តែងគោលនយោបាយចាំបាច់ត្រូវពង្រឹងគោលនយោបាយមុខរបរ និងការងារ រួមទាំងដោះស្រាយបញ្ហាវិសមភាពដ៏លើសលុបនេះជាបន្ទាន់ ។
គួរកត់សម្គាលផងដែរថា អត្រាអ្នកគ្មានការងារធ្វើ សម្រាប់ប្រទេសអភិវឌ្ឍន៍មានការថយចុះពី ៧,១% ក្នុងឆ្នាំ ២០១៤ មកនៅត្រឹម ៦,៧% ក្នុងឆ្នាំ ២០១៥ កន្លងមក៕