អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ ប្រមូលពន្ធបានជិត១ពាន់លានដុល្លារ គិតត្រឹម រយៈពេល ៩ខែ ក្នុងឆ្នាំ២០១៥នេះ។ ការប្រមូលពន្ធឆ្នាំនេះ កើនឡើងចំនួន២៥ភាគរយ បើធៀបទៅនិងឆ្នាំ២១០៤ កន្លងទៅ។ ជុំវិញការប្រមូលពន្ធនេះ អ្នកជំនាញផ្នែកសេដ្ឋកិច្ច និងអ្នកស្រាវជ្រាវពីការអភិវឌ្ឍន៍សង្គមលើឡើងថា ជាផលវិជ្ជមានមួយរបស់កម្ពុជានៃការប្រមូលពន្ធចូលរដ្ឋ។
ការបង្ហាញលទ្ធផលនេះ ធ្វើឡើងតាមរយៈសេចក្តីប្រកាសព័ត៌មាន នៃកិច្ចប្រជុំបូកសរុបលទ្ធផល ការងារប្រមូលពន្ធប្រចាំខែកញ្ញា និង ប្រចាំត្រីមាសទី៣ ឆ្នាំ២០១៥ របស់អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុបាន ចុះផ្សាយកាលថ្ងៃទី០៦ តុលា ។
ជុំវិញការប្រមូលពន្ធនេះ លោក គី សេរីវន្ឍន៍ បណ្ឌិតផ្នែកសេដ្ឋកិច្ច និងជាមន្ត្រីផ្នែកស្រាវជ្រាវនៃរាជបណ្ឌិតសភាកម្ពុជាបានឲ្យដឹងថា ការប្រមូលពន្ធបានជិត១ពាន់លានដុល្លារនេះ គឺជារឿងប្រសើររបស់រដ្ឋាភិបាល សម្រាប់ធ្វើការចាយវាយរបស់រដ្ឋ ។ លោកថា ការប្រមូលពន្ធកើនឡើង ជាង២៥ភាគរយនេះ បានបង្ហាញពីប្រសិទ្ធភាពនៃការប្រមូលពន្ធរបស់អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ មានលក្ខណល្អប្រសើរជាងមុន ព្រោះថវិកាចូលរដ្ឋ ជាជាងចូលហោប៉ៅឯកជន។
លោកថា៖ «ជាទូទៅវាតែងតែមានហើយ លេចធ្លាយ មិនគ្រប់១០០ភាគរយទេ ប្រទេសណាក៏ដូចប្រទេសណាដែរ ប៉ុន្តែយើងពីវឌ្ឍនៈភាពកើននៃការកើននេះ តាមការប្រកាសរបស់អគ្គនាយកដ្ឋានពន្ធដារ គឺ ឃើញថា បានប្រសើរជាងមុន»។
ស្រដៀងគ្នានេះដែរ លោក បណ្ឌិត មាស នី អ្នកសិក្សាស្រាវជ្រាវពីការអភិវឌ្ឍសង្គម បានឲ្យដឹងថាការចំណូលពន្ធដែលកើនឡើងជាង ២៥ភាគរយ សម្រាប់ឆ្នាំ២០១៥នេះ ជាសញ្ញាណល្អមួយនៃការខិតខំប្រឹងប្រែងរបស់រដ្ឋាភិបាល។
ទោះបីយ៉ាងណាក៏ដោយលោកថា រដ្ឋាភិបាលត្រូវតែខំប្រឹងបន្ថែមទៀត ទៅលើការប្រមូលពន្ធដារនេះ ព្រោះនៅពេលសមាហរណកម្មអាស៊ានចូលមកដល់នាខាងមុខ ប្រទេសកម្ពុជានឹងមានការបន្ធូរពន្ធច្រើន ដូច្នេះកម្ពុជាអាស្រ័យទៅលើតែការយកពន្ធក្នុងស្រុកប៉ុណ្ណោះ ។ លោកមានប្រសាសន៍ថា «ការប្រមូលពន្ធ កើនប៉ុណ្ណោះ ក៏មិនទាន់អស់ពីលទ្ធភាពដែលព័ន្ធនៅប្រទេសខ្មែរអាចប្រមូលបាននៅឡើយទេ ។ យើងឃើញ ថានៅមានការហូរហៀរចេញទៅក្រៅច្រើន ប៉ុន្តែនេះខ្ញុំគិតថា វាជាដំណើរវិជ្ជមានរបស់រដ្ឋាភិបាលនៅក្នុងវិស័យនៃការប្រមូលពន្ធ»។
សូមបញ្ជាក់ថា ក្នុងរយៈពេល០៩ខែ ដូចគ្នានេះ មានការកើនឡើងនូវចំណូលពន្ធតាមប្រភេទសំខាន់ៗមួយចំនួនដូចជា ពន្ធលើប្រាក់ចំណេញមានការកើនឡើងប្រមាណ ២៧,៦ភាគរយ ពន្ធលើប្រាក់បៀវត្ស មានការកើនឡើងប្រមាណ ២១,៣ភាគរយ។
ចំណែកឯចំណូលពន្ធ តាមសកម្មភាពអាជីវកម្ម ក៏មានការកើនឡើងស្ទើរទាំងអស់ដែរ ក្នុងនោះរួមមានផ្នែកសេវាហិរញ្ញវត្ថុ កើនឡើងប្រមាណ៤០ភាគរយ ផ្នែកទូរគមនាគមន៍កើនឡើងប្រមាណ១៤,៣ភាគរយ ផ្នែកផលិតថ្នាំជក់ កើនឡើងប្រមាណ១២៧,៩ភាគរយ ផ្នែកផលិតសម្លៀកបំពាក់ កើនឡើងប្រមាណ១៧,៥ភាគរយ និងផ្នែកដឹកជញ្ជូន និងទេសចរណ៍ កើនឡើងប្រមាណ ១១,៩ភាគរយ។
ចំណែករីឯផ្នែកកសិកម្មកើនឡើងប្រមាណ ៦២,៨ភាគរយ ។ ដោយឡែកផ្នែកផលិតម្ហូមអាហារកើនឡើងប្រមាណ ១៥ភាគរយ និងផ្នែកផលិតយានយន្តកើនឡើងប្រមាណ ១៧២,៨ភាគរយ៕
