នៅថ្ងៃទី ០២ ខែធ្នូ ឆ្នាំ២០១៥ អង្គការអ្នករាយការណ៍គ្មានព្រំដែន និងមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ ហៅកាត់ថា CCIM បានបង្ហាញលទ្ធផលស្រាវជ្រាវ ស្តីពីប្រព័ន្ធផ្សព្វផ្សាយនៅកម្ពុជា ។ លទ្ធផលស្រាវជ្រាវនេះ បានបង្ហាញថា ប្រព័ន្ធផ្សព្វផ្សាយនៅក្នុងប្រទេសកម្ពុជា មានលក្ខណៈជាកម្មសិទ្ធិប្រមូលផ្តុំ ដែលធ្វើឱ្យប្រព័ន្ធផ្សព្វផ្សាយកម្ពុជាស្ថិតក្នុងគ្រោះថ្នាក់។
លទ្ធផលស្រាវជ្រាវស្តីពីប្រព័ន្ធផ្សព្វផ្សាយនៅកម្ពុជា បានរកឃើញថា ប្រព័ន្ធផ្សព្វផ្សាយនៅកម្ពុជាមានលក្ខណៈជាកម្មសិទ្ធប្រមូលផ្តុំ ដែលធ្វើឱ្យប្រព័ន្ធផ្សព្វផ្សាយកម្ពុជាស្ថិតក្នុងគ្រោះថ្នាក់។
លោកស្រីclothilde coz អ្នកស្រាវជ្រាវជាន់ខ្ពស់នៃគម្រោង «ឃ្លាំមើលភាពជាម្ចាស់កម្មសិទ្ធិនៃប្រព័ន្ធផ្សព្វផ្សាយ» បានបង្ហាញលទ្ធផលនៃការស្រាវជ្រាវថា ទូរទស្សន៍ជាប្រព័ន្ធផ្សព្វផ្សាយដែលមានប្រជាប្រិយភាពជាងគេ ហើយមានការប្រមូលផ្តុំជាងគេផងដែរ ។ ក្នុងនោះទូរទស្សន៍ចំនួន៤ដែលមានប្រជាប្រិយភាពជាងគេ មានអ្នកទស្សនាសរុបប្រមាណ៧៨%។
លោកស្រីបន្តថា ស្ថានីយ៍ទូរទស្សន៍៧ ក្នុងចំណោម១០ មានម្ចាស់ដែលមានពាក់ព័ន្ធនឹងគណបក្សកាន់អំណាច មានន័យថាពួកគេអាចទទួលប្រាក់ខែពីរដ្ឋាភិបាល ឬត្រូវតែងតាំងជាទីប្រឹក្សា។
អ្នកស្រាវជ្រាវជាន់ខ្ពស់រូបនេះ បានបង្ហាញការរកឃើញទៀតថា ផ្នែកបោះពុម្ពផ្សាយក៏មានការប្រមូលផ្តុំខ្ពស់ដែរ ក្នុងនោះមានការសែត ទស្សនាវដ្តីនាំមុខ៤ ដែលមានអ្នកអានសរុប៥៩%។ លោកស្រីបន្ថែមថា ចំណែកស្ថានីយវិទ្យុលំដាប់នាំមុខ៤ មានអ្នកស្តាប់៤៣% នៃអ្នកស្តាប់អ្នកទាំងអស់ក្នុងប្រទេសកម្ពុជា បង្ហាញថា មានការប្រមូលផ្តុំមធ្យម។
លោក ប៉ា ងួនទៀង នាយកប្រតិបត្តិមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ បានថ្លែងថា ភាគច្រើនប្រព័ន្ធផ្សព្វផ្សាយនៅកម្ពុជា គ្រប់គ្រងដោយគណបក្សកាន់អំណាច ។ លោកបានមានប្រសាសន៍បន្តថា ម្ចាស់កម្មសិទ្ធិនៃប្រព័ន្ធផ្សព្វផ្សាយមួយណា ដែលមាននិន្នាការទៅរកគណបក្សនយោបាយណាមួយ នោះនឹងទាញចរន្ត ឱ្យទៅបម្រើគណបក្សនយោបាយដែលខ្លួនស្រលាញ់ ដែលវាជំរុញឱ្យជះឥទ្ធិពលទៅលើសាធារណជន ឱ្យមាននិន្នាការបែបហ្នឹងដែរ។
លោកបន្តទៀតថា ភាពជាម្ចាស់កម្មសិទ្ធិនៃប្រព័ន្ធផ្សព្វផ្សាយ ក៏ពាក់ព័ន្ធនឹងការផ្តល់អាជ្ញាប័ណ្ណផងដែរ ។ លោកបន្ថែមថា នៅក្នុងប្រទេសដែលមានប្រជាធិបតេយ្យរឹងមាំមួយចំនួន គេមានគណៈកម្មការឯករាជ្យមួយ ក្នុងវាយតម្លៃ និងផ្តល់អាជ្ញាប័ណ្ណទៅឱ្យប្រព័ន្ធផ្សព្វផ្សាយ ។ លោកថាដើម្បីធ្វើឱ្យមានការប្រែប្រួលប្រព័ន្ធផ្សព្វផ្សាយនៅកម្ពុជា សង្គមស៊ីវិលនឹងធ្វើការតស៊ូមតិ ដើម្បីធ្វើឱ្យមានការកែទម្រង់នៅថ្នាក់ជាតិ ដូចជា ការបង្កើតគណៈកម្មការឯករាជ្យ និងនីតិវិធីនៃការផ្តល់អាជ្ញាប័ណ្ណជាដើម។
ឆ្លើយតបនឹងលទ្ធផលនៃការស្រាវជ្រាវនេះ លោក អ៊ុក គឹមសេង អនុរដ្ឋលេខាធិការក្រសួងព័ត៌មាន បានថ្លែងថា លោកមិនទាន់អាចវាយតម្លៃភា្លមៗបាននោះទេ ត្រូវមានការសិក្សាឱ្យបានច្បាស់សិន ។ ទោះជាយ៉ាងណា អនុរដ្ឋលេខាធិការក្រសួងព័ត៌មានរូបនេះ មានប្រសាសន៍ថា មិនថាតែប្រទេសកម្ពុជាទេ ដែលមានប្រព័ន្ធផ្សព្វផ្សាយមានលក្ខណៈបែបហ្នឹង នៅតាមបណ្តាប្រទេសធំៗ មួយចំនួន បុគ្គលណាដែលមានធនធានហិរញ្ញវត្ថុច្រើន គេអាចបង្កើតប្រព័ន្ធផ្សព្វផ្សាយតាមដែលអាចធ្វើទៅបាន ។ លោកបន្តថា ប្រទេសកម្ពុជាមិនមែនមានតែបណ្តាញផ្សព្វផ្សាយធំ ៤ ឬ៥ស្ថាប័ននោះទេ នៅមានបណ្តាញផ្សព្វផ្សាយតូចៗជាច្រើនទៀត ដែលបង្ហាញពីស្ថានភាពនៅប្រទេសកម្ពុជា។
ចំពោះការស្នើឱ្យបង្កើតស្ថាប័ន ក្នុងការសិក្សា និងផ្តល់អាជ្ញាប័ណ្ណដល់ប្រព័ន្ធផ្សព្វផ្សាយឯករាជ្យ លោក អ៊ុក គឹមសេង បានមានប្រសាសន៍ថា បច្ចុប្បន្ននេះកម្ពុជាមានក្រសួងមានសមត្ថកិច្ចរួចហើយ ដូច្នេះរដ្ឋាភិបាលមិនចាំបាច់ត្រូវបង្កើតទៀតនោះទេ។
សូមជម្រាបថា ការសិក្សាស្រាវជ្រាវរបស់អង្គការអ្នករាយការណ៍គ្មានព្រំដែន និងមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ ក្រោមគម្រោង «ឃ្លាំមើលភាពជាម្ចាស់កម្មសិទ្ធិនៃប្រព័ន្ធផ្សព្វផ្សាយ» បានធ្វើការស្រាវជ្រាវចាប់ពីថ្ងៃទី២៨ ខែកញ្ញា ដល់ថ្ងៃទី៣០ ខែវិច្ឆិកា ឆ្នាំ២០១៥។ គម្រោងនេះ គឺជាការសិក្សាស្រាវជ្រាវជាសកល និងជាកិច្ចប្រឹងប្រែងតស៊ូមតិ ដើម្បីលើកកម្ពស់តម្លាភាព និងប្រព័ន្ធផ្សាយចម្រុះក្នុងកម្រិតអន្តរជាតិ៕
