ភ្នាក់ងារអង្គការសហប្រជាជាតិផ្នែកសិទ្ធិស្ត្រីកំពុងឃ្លាំមើលទិដ្ឋភាពនៃប្រទេសទូទាំងពិភពលោកដែលធ្វើពិធីអបអរសាទរទិវាអន្តរជាតិ នារី៨មីនា ក្រោមប្រធានបទរួមួយគឺ«ពេលវេលាមកដល់ហើយ»។
អគ្គលេខាធិការអង្គការសហប្រជាជាតិ Antonio Guterres នឹងថ្លែងសុន្ទរកថាចេញពីបុរីញូយ៉កដោយលោកនឹងផ្ដោតពីប្រធានបទនេះ ហើយធ្វើការអំពាវនាវសុំឱ្យប្រទេសជាសមាជិកទាំងអស់រួមគ្នាលើកកម្ពស់សិទ្ធិស្ត្រីក្នុងគ្រប់វិស័យទាំងស្ត្រីរស់នៅជនបទនិងទីក្រុង។
ទិវាអន្តរជាតិនារី៨មីនា ត្រូវបានប្រារព្ធជារៀងរាល់ឆ្នាំ ។ សម្រាប់៨មីនាឆ្នាំ២០១៨នេះ គឺជាខួប ទី១០៧។គោលបំណងនៃការប្រារព្ធនេះគឺ ដើម្បី ឆ្លុះបញ្ចាំងអំពីសមិទ្ធផលរបស់ស្ត្រី និង បញ្ហារបស់ស្ត្រី ក្នុងរយៈមួយឆ្នាំ ដែលស្ត្រីទូទាំងពិភពលោក បានជួបផលលំបាក។ គោលបំណងនៃការប្រារព្ធនេះ ក៏ជំរុញឱ្យមាន សមភាពការងារ នៅក្នុងស្ថានប័នជាតិអន្តរជាតិធ្វើយ៉ាងណាកុំឱ្យមានគម្លាតឆ្ងាយពេករវាងបុរសនិងស្ត្រី។
ពិភពលោកអបអរសាទរទិវាអន្តរជាតិនារី៨មីនា មានរូបភាពខុសៗគ្នា មិនមានអ្វីខុសប្លែងពីឆ្នាំមុននោះទេ។ នៅឆ្នាំ២០១៨នេះ ប្រទេសមួយចំនួន បានប្រើប្រាស់ប្រធានបទនៃការអបអរសាទរទិវាអន្តរជាតិនារី៨មីនានេះ មានខុសៗគ្នា ទោះបី អង្គការសហប្រជាជាតិ បានកំណត់ប្រធានបទរួមក៏ដោយ។ តែយ៉ាងណា ប្រធានបទនៃប្រទេសទាំងនោះ សុទ្ធតែជំរុញនិងលើកទឹកចិត្តស្ត្រី ក្នុងវិស័យសាធារណៈឱ្យមានចំនួនកាន់ច្រើនដោយចាត់ទុកស្ត្រីជាអាទិភាពមួយនៃកម្លាំងសេដ្ឋកិច្ច។
តែជាមួយគ្នានេះ ស្រី្តនៅប្រទេសមួយចំនួន បានចាប់យកឱកាសនេះ ដើម្បីធ្វើការតវ៉ា អំពីសិទ្ធិស្ត្រី ដែលត្រូវបានបំភ្លេច និងរំលោភបំពាន។ ស្ត្រីនៅប្រទេសមួយចំនួននៅអាស៊ីអាគ្នេយ៌និងអាស៊ីខាងត្បូង បានដើរតវ៉ាអំពាវនាវឱ្យរដ្ឋាភិបាល ផ្ដល់ឱកាសឱ្យបានច្រើនដល់ស្ត្រីក្នុងសកម្មភាពសង្គម ។
នៅប្រទេសហ្វីលីពីនក្រោមការដឹកនាំរបស់ប្រធានាធិបតីឌូទើតេ ក្រុមស្ត្រីបានដើរតវ៉ាតាមផ្លូវទាមទរឱ្យមេដឹកនាំរូបនេះ ទទួលស្គាល់សិទ្ធិរបស់ស្ត្រីខណៈពួកលើកបដា ប្រឆាំងនឹងអំណាច របស់លោកទើតេ ដែលនិយមហិង្សា។ នៅប្រទេសប៉ាគិស្ថាននិងអាហ្គានិស្ថាន ក្រុមស្ត្រីបានលើកបដា ដោយសរសេរថា កុំចាត់ទុកកម្មការិនី ជាទាសកររបស់ខ្លួន ។
នៅប្រទេសវៀតណាម ស្ត្រីជាប៉ូលិសចរាចរបានបង្ហាញខ្លួនយ៉ាងសង្ហា កាន់ឆ័ត្រធ្វើចរាចរនៅលើដងវិថីនានានៅរដ្ឋធានីហាណូយដែលជាការធ្វើឱ្យមានការភ្ញាក់ផ្ញើលជាខ្លាំងដល់អ្នកធ្វើដំណើរ។ យ៉ាងណា ក៏ដោយស្ត្រីប៉ូលិសចរាចរទាំងនោះបានទទួលការសរសើរពីអ្នកធ្វើដំណើរ។
នៅប្រទេសចិន ស្ត្រីជាភរិយារបស់កម្មាភិបាលបក្សកុំម្មុយនិស្តបាន បាននាំគ្នាធ្វើដំណើរទៅកាន់ សាលប្រជុំរបស់ប្រជាជន ដោយកាន់បាច់ផ្កា ជូនស្ត្រីថ្នាក់ដឹកនាំបក្សដោយក្ដីរំភើប។
នៅប្រទេសភូមា លោកស្រីអ៊ុងសានស៊ូជី ថ្លែងសុន្ទរកថា ដោយទឹកមុខស្ងួតដោយសារ វិបត្តិសិទ្ធិមនុស្ស នៃសហគមន៍ម៉ូស្លីមរ៉ូហ៊ីងយ៉ា ដែលរងទុក្ខទោស ដោយសារការវាយបង្ក្រាបដោយពួកយោធា។ តែបែបនេះក្ដី លោកស្រីនៅតែ ទទូចសុំឱ្យចាត់ទុកស្ត្រីជាចលករមួយនៃសង្គមមនុស្ស ដែលមិនអាចខ្វះបានឡើយ។
ចំណែកនៅប្រទេសឥណ្ឌាវិញ នាយករដ្ឋមន្ត្រីណារិនដ្រាម៉ូឌី បាន ទៅជួបស្ត្រីម្នាក់អាយុ១០៦ឆ្នាំ ដោយលើកដៃសំពះ និងចាត់ទុកស្ត្រីរូបនេះថា ជាមាតានៃកូនស្រីដ៏ល្អ ទោះជាបីជាក្រីក្រ តែត្រូវរកប្រាក់ដើម្បីសង់បង្គន់អនាម័យឱ្យកូនស្រី។
នៅប្រទេសមួយចំនួននៅអឺរ៉ុប ដូចជានៅប្រទេស អង់គ្លេស អៀឡង់ ជាដើម ក្រុមស្ត្រី ធ្វើក្បួនអបអរសាទរ ដោយទឹកមុខរីករាយនៃការសម្ដែងសិទ្ធិរបស់ពួកគេ។
តែទន្ទឹមនឹងនេះ ស្ត្រីនៅប្រទេសមួយចំនួន ទំនងមិនបានដឹងថា ថ្ងៃនេះ ជាទីវាសិទិ្ធនារីអន្តរជាតិ៨មីនានេះទេ។ ពួកគាត់នៅតែដេកលើគំនរសម្រាម ដើម្បីរកប្រាក់ចិញ្ចឹមកូនជាទីស្រឡាញ់ដែលធ្វើយ៉ាងណាអោយកូនបានទៅសាលារៀន៕
