តំណាងរាស្ត្រគណបក្សសង្គ្រោះជាតិ លោក គង់ សុភា និងញ៉យ ចំរើន នឹងចេញពីមន្ទីរពេទ្យប្រទេសថៃនៅថ្ងៃទី ២៤ វិច្ឆិកា ឆ្នាំ ២០១៥ ស្អែកនេះ ក្រោយពីក្រុមគ្រូពេទ្យជំនាញពិនិត្យឃើញថាតំណាងរាស្ត្រគណបក្សសង្គ្រោះជាតិទាំងពីររូបនេះ មានអាការៈធូរស្រាលហើយនោះ។
លោកគង់ សភា បានសរសេរនៅលើហ្វេសប៊ុកផ្ទាល់ខ្លួនរបស់លោកថា លោក និងញ៉យ ចំរើន នឹងវិលត្រឡប់មកកាន់ប្រទេសកម្ពុជាវិញនៅថ្ងៃទី២៤ ខែវិច្ឆិកាស្អែកនេះ តាមជើងហោះហើរ បាងកកអ៊ែវ៉េ នៅម៉ោង ២និង៤០នាទីរសៀល នឹងមកដល់ប្រលានយន្តហោះអន្តរជាតិភ្នំពេញ។
តំណាងរាស្ត្រ គង់ សភា បានសរសេរថា «លោក គង់ សភាអ្នកតំណាងរាស្ត្រមណ្ឌលខេត្តស្វាយរៀង និងលោក ញ៉យ ចំរើន អ្នកតំណាងរាស្ត្រមណ្ឌលខេត្តកំពង់ចាម ដែលរងគ្រោះក្នុងព្រឹត្តិការណ៍ដ៏ឃោរឃៅប៉ុនប៉ងវាយសម្លាប់ មកលើតំណាងរាស្ត្រទាំងពីរ កាលពីថ្ងៃទី២៦ខែ តុលាឆ្នាំ២០១៥កន្លងទៅនេះ ហើយបានមកសំរាកព្យាបាលនៅ មន្ទីរពេទ្យ Phyathai II អស់រយៈពេល ២៨ថ្ងៃ ក្រោយពីក្រុមគ្រូពេទ្យបានពិនិត្យយ៉ាងយកចិត្តទុកដាក់ និងប្រាប់ថា ៖ពួកយើងខ្ញុំបានធូរស្បើយបានបន្តិចហើយៗអាចចេញពីមន្ទីពេទ្យបាន»។
សូមរម្លឹកថា លោក គង់ សភា និងលោក ញ៉យ ចំរើន ត្រូវបានជនមិនស្គាល់អត្តសញ្ញាណមួយក្រុមវាយដំ បណ្តាលឲ្យរងរបួសធ្ងន់ នៅក្បែរវិមានរដ្ឋសភា កាលពីថ្ងៃទី២៦ ខែតុលា ឆ្នាំ២០១៥ ។ កាលពីថ្ងៃទី៣ ខែវិច្ឆិកា ឆ្នាំ២០១៥ ជនដៃដល់បីនាក់ ចូលបង្ហាញខ្លួនចំពោះមុខសមត្ថកិច្ច និងត្រូវបានសាលាដំបូងរាជធានីភ្នំពេញ សម្រេចបញ្ជូនពួកគេ ទៅឃុំខ្លួនបណ្តោះអាសន្ន ក្នុងពន្ធនាគារព្រៃស ក្រោយការចោទប្រកាន់ពីបទបង្កហិង្សាដោយចេតនា និងធ្វើឲ្យខូចខាតទ្រព្យសម្បត្តិមានស្ថានទម្ងន់ទោស៕