ភ្នំពេញ៖ក្រោយព្រះរាជពិធីបុណ្យអុំទូករយៈពេល ៣ថ្ងៃ បានបញ្ចប់អ្នកសង្កេតការណ៍ក្នុងស្រុកមួយចំនួនដែលវិទ្យុស្ដ្រីបានសុំធ្វើការបកស្រាយបានលើកឡើងថា ចំនួនអ្នកដែលមកលេងកំសា ន្ដក្នុងព្រះរាជពិធីបុណ្យអុំទូកនៅឆ្នាំនេះគឺ ថយចុះយ៉ាងខ្លាំង។ ពួកគាត់បានពន្យល់បន្ដថា មានកត្តាជាច្រើនដែលនាំឱ្យពលរដ្ឋមកទស្សនាក្នុងពិធីនេះមានការថយចុះ ដែលកត្តាទាំងនោះមានដូចជាស្ថានការណ៍នយោបាយ សន្តិសុខសង្គម ជាដើម។ តែបែបនេះក្ដី រដ្ឋមន្ដ្រីក្រសួងទេសចរ ណ៍អះអាងថា ពលរដ្ឋមកកំសាន្តពិធីបុណ្យអុំទូកនៅឆ្នាំនេះ គឺមានរហូតដល់ ៣លាននាក់ ដែលកើនជាងឆ្នាំមុនៗ។
លោក សន ជ័យ នាយកប្រតិបត្តិសម្ព័ន្ធគណនេយ្យភាពសង្គមកម្ពុជា ដែលបានតាមដានពីស្ថានភាពនៃពិធីបុណ្យអុំទូក បានលើកឡើងថា ចំនួនពលរដ្ឋមកទស្សនាពិធីបុណ្យអុំទូកនៅឆ្នាំនេះមិនមានចំនួនច្រើនដូចបណ្ដាឆ្នាំនមុនទេ គឺមានការថយចុះយ៉ាងខ្លាំង។ លោកបញ្ជាក់ពីមូលហេតុដែលនាំឱ្យពលរដ្ឋមកមើលពិធីនេះមានការថយចុះ។
លោក សន ជ័យ ៖«បើយើងមើលជារួម ឆ្នាំ២០១៦ គឺជាការចាប់ផ្ដើមឡើងវិញនៃព្រះរាជពិធីបុណ្យអុំទូក បន្ទាប់ពីមានការរត់ជាន់គ្នាស្លាប់ដោយអនោចអាធម៌ នៅលើស្ពានកោះពេជ្រ កាលពីឆ្នាំ២០១០ ហើយឆ្នាំបន្ដមកទៀតយើងឃើញថា កម្ពុជាយើងបានជួបប្រទះនូវហេតុការណ៍មួយចំនួន ដោយមានការថយចុះយ៉ាងច្រើនបើប្រៀបធៀបនឹងឆ្នាំ២០១០»។
តែទោះជាយ៉ាងណាការកត់សម្គាល់របស់អ្នកអង្កេតការណ៍ហាក់ដូចជានៅឆ្ងាយពីគ្នាពីការលើកឡើងរបស់លោក ថោង ខុន ។ លោក ថោង ខុន រដ្ឋមន្ដ្រីក្រសួងទេសចរណ៍បានឱ្យវិទ្យុស្ដ្រីដឹងថា នៅឆ្នាំ២០១៦នេះ អ្នកមកលេងកំសាន្ដក្នុងព្រះរាជពិធីបុណ្យអុំទូករយៈពេល ៣ថ្ងៃ រាប់ចាប់ពីថ្ងៃទី ១៣ ដល់ថ្ងៃទី១៥វិច្ឆិកា គឺមានប្រមាណ ៣លាននាក់ដែលចំនួននេះបានកើនឡើងប្រហែលជា ៣០ភាគរយបើធៀបទៅនឹងឆ្នាំមុនៗ។
លោក ថោង ខុន៖«ប្រហែលជាង២លាន ហើយឆ្នាំនេះវា ៣លាន កើនប្រហែលជា៣០ ភាគរយ »។
តែតាមបណ្ដាញផ្សាយព័ត៌មាននានានិងពលរដ្ឋមួយចំនួនដែលបានទៅលេងកំសាន្តបានឱ្យដឹងថា ថ្ងៃទី១ នៃព្រះរាជពិធីបុណ្យឃើញថា ពលរដ្ឋមកលេងកំសាន្តប្រហែលជា ៦០ម៉ឺន ទៅ ៧០ម៉ឺននាក់ហើយថ្ងៃទី២មានការកើនឡើងជាងមួយលាននាក់។ ចំណែកថ្ងៃទី៣ ជាថ្ងៃបិទបញ្ចប់ក៏មានការកើនឡើងថែមទៀតតែចំនុចនេះធ្លាក់ចុះបើប្រៀបធៀបកាលពី ៤ឆ្នាំមុន។
ជុំវិញរឿងនេះអ្នកវិភាគក្នុងស្រុកមួយចំនួនគិតថា មូលហេតុដែលនាំអោយអ្នកមកលេងកំសាន្ដក្នុងព្រះរាជពិធីបុណ្យអុំទូកធ្លាក់ចុះដោយសារតែទីមួយ កត្តានយោបាយ ទីពីរចំណូលរបស់ពលរដ្ឋនៅតាមជនបទមិនអំណោយផល កត្តាទីបីពលរដ្ឋខ្មែរធ្វើ ចំណាកស្រុកច្រើន និងទីបួន បញ្ហាអសន្ដិសុខ។
លោកសូចន្ថា សាស្ត្រាចារ្យ វិទ្យាសាស្ត្រនយោបាយ បានពន្យល់បន្ថែមថាចំនួនអ្នកមកលេងកំសាន្តថយចុះនេះ កើតឡើងដោយសារការប្រឈមនៃសង្គម។
លោក សូ ចន្ថា ៖«សម្រាប់ខ្ញុំ ខ្ញុំមើលឃើញថា មូលហេតុមានច្រើនដែលនាំអោយចំនួនពលរដ្ឋដែលមកទស្សនា មកកំសាន្ដនៅក្នុងកម្មវិធីបុណ្យអុំទូកដែលជាប្រពៃណីខ្មែរនេះ ទីមួយ. អាចកត្តានយោបាយ មាន័យថា …»។
តាមលោកសាស្ដ្រចារ្យបញ្ហារត់ជាន់គ្នាស្លាប់នៅលើស្ពានពេជ្រ ក៏ជាមូលហេតុដែលនាំអោយពលរដ្ឋខ្មែរមិនសូវ សម្រុកទៅមើលពិធីបុណ្យអុំទូកផងដែរ។
លោក សូ ចន្ថា៖«ពលរដ្ឋដែលមានការភ័យខ្លាចដែរ យើងឃើញថា គាត់អាចលើក ឬក៏មើលឃើញពីបទពិសោធន៍នៃការស្លាប់របស់ពលរដ្ឋនៅស្ពានពេជ្រ កាលពីប៉ុន្មានឆ្នាំមុននោះ»។
ទាក់ទងនឹងរឿងនេះដែរ អ្នកវិភាគពីបញ្ហាសង្គម និងជាសាស្ដ្រចារ្យ ទស្សនៈវិជ្ជា លោក ហេង ស្រ៊ាង បានពន្យល់លើចំនុចនេះដែរថាតាមការកត់សម្គាល់របស់គាត់គឺអ្នកមកលេងកំសាន្ដក្នុងពិធីបុណ្យអុំទូកមិនមានច្រើនដូចមុនៗទេ ។
លោក ហេង ស្រ៊ាង ៖«ជាបឋមខ្ញុំត្រូវនិយាយពីខ្លួនខ្ញុំដែរ ខ្ញុំក៏អត់ដើរលេងដែរ គ្រួសារខ្ញុំបងប្អូនខ្ញុំសាច់ ញាតិខ្ញុំ ភាគច្រើន ក៏អត់ដើរលេងដែរ ទីមួយ.គេគិតថាសង្គមនៅអត់មានសុវត្តិភាពទេ មានតែការបាញ់សម្លាប់ មានតែការគ្រោះថ្នាក់ចរាចរ មានតែការចាប់គំរាមកំហែងដូច្នេះ រួមតែខ្ញុំ និងគ្រួសារខ្ញុំ គឺ អត់ដើរទេ…»។
សូមរម្លឹកថា ពិធីបុណ្យអុំទូក បណ្ដែតប្រទីប អកអំបុក សំពះព្រះខែ បានខកខានយ៉ាងតិច៤ឆ្នាំ បើរាប់ចាប់ពីឆ្នាំ ២០១១ មក។ ពិធីនេះបានរៀបចំឡើងវិញម្ដងនៅឆ្នាំ ២០១៤ ក្រោយពីមានដំណោះស្រាយនយោបាយ។ ប៉ុន្ដែចំនួនអ្នកមកទស្សនាមានការថយចុះបើប្រៀបធៀបមុនឆ្នាំ២០១០ ដែលចំនួនពលរដ្ឋមានរហូតដល់ទៅ ២លាន៥សែននាក់៕
