កាលពីព្រឹកថ្ងៃពុធ ទី ២៨ ខែកក្កដា ឆ្នាំ២០២១ អង្គការមណ្ឌលព័ត៌មានស្ត្រីកម្ពុជា បានដឹកនាំវគ្គបណ្ដុះបណ្ដាលមួយដល់អ្នកសារព័ត៌មានវ័យក្មេងកម្ពុជា ស្ដីពីការលើកម្ពស់ស្ត្រី និងយុវជនក្នុងភាពជាអ្នកដឹកនាំ។ វគ្គបណ្ដុះបណ្ដាលនេះធ្វើឡើងក្រោមជំនួយពីទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID) តាមរយ: អង្គការតម្លាភាពកម្ពុជា ដែលមានរយ:ពេលពីរថ្ងៃគឺនៅថ្ងៃទី២៨-២៩ ខែ កក្កដា ឆ្នាំ២០២១ នៅឯសណ្ឋាគារ Hyatt Regency Phnom Penh។ ក្រោមការចូលរួមរបស់លោកស្រី អ៊ុង ច័ន្ទថុល នាយិកាប្រតិបត្តិនៃអង្គការមណ្ឌលព័ត៌មានស្ត្រីកម្ពុជា គឺមានសិក្ខាកាមដែលជាសមាជិកចំនួន ១១ នាក់ ក្នុងនោះមាន៦ នាក់ ជាអ្នកសារព័ត៌មានស្ត្រីវ័យក្មេងមកពីស្ថាប័នចំនួនបួនផ្សេងៗគ្នា ក្នុងរាជធានីភ្នំពេញ។
លោកស្រី អ៊ុង ច័ន្ទថុល នាយិកាប្រតិបត្តិនៃអង្គការមណ្ឌលព័ត៌មានស្ត្រីកម្ពុជា(WMC)
វគ្គបណ្ដុះបណ្ដាលនេះដែរ ធ្វើឡើងក្នុងគោលបំណងបំប៉នអ្នកសារព័ត៌មាន ជាពិសេសអ្នកសារព័ត៌មានវ័យក្មេងអោយមានជំនាញច្បាស់លាស់ក្នុងសរសេរអត្ថបទព័ត៌មាន ក៏ដូចជាការបញ្ជ្រាប និងផ្សព្វផ្សាយបញ្ហាទាក់ទងស្ត្រី យេនឌ័ លុបបំបាត់ការរើសអើង អំពើហិង្សាលើស្ត្រី ពិសេស ការលើកកម្ពស់ស្ត្រី និងយុវជនក្នុងភាពជាអ្នកដឹកនាំ។
តាមការស្រាវជ្រាវចុងក្រោយស្ដីពី “ភាពជាអ្នកដឹកនាំរបស់ស្ត្រី និងយុវជននៅក្នុងប្រទេសកម្ពុជា ” ទើបនឹងចេញផ្សាយកាលពីថ្ងៃទី19 ខែមីនា ឆ្នាំ 2021 ដោយអង្គការតម្លាភាពកម្ពុជា បានអោយដឹងថា ស្ត្រី និងយុវជន នៅតែមានចំនួនតិចតួចនៅក្នុងវិស័យសាធារណ: ពិសេសក្នុងតួនាទីជាអ្នកដឹកនាំ ទាំងនៅក្នុងថ្នាក់មូលដ្ឋាន និងថ្នាក់ជាតិ។
បញ្ហានេះ សិក្ខាកាមម្នាក់ ដែលធ្វើការផ្នែកសារព័ត៌មាន ក្នុងសា្ថប័នមួយនៅរាជធានីភ្នំពេញ បានលើកឡើងថា ស្ត្រីគួរតែចូលរួមអោយបានច្រើនក្នុងការចូលរួមកិច្ចការសង្គម ពិសេសស្ត្រីក្នុងវិស័យអ្នកដឹកនាំនេះតែម្ដង។
យោងតាមលទ្ធផល នៃការស្រាវជ្រាវខាងលើក៏បង្ហាញផងដែរថា កត្តាដែលរួមចំណែកនាំឲ្យមានស្ថានភាពនេះគឺមានកត្តាចម្បងចំនួនបី រួមមាន វប្បធម៌ សង្គម និងសេដ្ឋកិច្ច។ ហើយការសិក្សាដដែលនេះក៏បានរកឃើញថា ផ្នត់គំនិត និងឥរិយាបថវាយតម្លៃជាមុនចំពោះសមត្ថភាព និងតួនាទីរបស់ស្ត្រី ដែលមនុស្សទូទៅតែងរំពឹងទុក ក៏ជាឧបសគ្គចម្បងបំផុតដែលរារាំងស្ត្រី មិនឲ្យក្លាយជាអ្នកដឹកនាំបាន។
ចំពោះយុវជនវិញ ការសិក្សារកឃើញថា មានឧបសគ្គចម្បងចំនួន ៧ ដែលរារាំងពួកគេមិនអាចឈានទៅកាន់តួនាទីជាអ្នកដឹកនាំបាន។ ឧបសគ្គទាំងនោះ មានដូចជា ការបន្ទច់បង្អាក់ពីឪពុកម្តាយ ដោយខ្លាចកូនពួកគេមានបញ្ហាពេលចូលរួមកិច្ចការសង្គមឬនយោបាយ ការរើសអើងលើអាយុ ការធ្វើចំណាកស្រុកដើម្បីការងារ អំពើបក្ខពួកនិយម និងកង្វះជំនាញទន់ជាដើម។
លោកស្រី សេង រាសី នាយិកាប្រតិបត្តិនៃអង្គការ សីលការ (SILAKA)
យ៉ាងណាម៉ិញ លោកស្រី សេង រាសី ដែលជានាយិកាប្រតិបត្តិនៃអង្គការ សីលការ បានលើកឡើងនៅក្នុងវគ្គបណ្ដុះបណ្ដាលនេះដែរថា បើចង់អោយស្ត្រីចូលរួមក្នុងកិច្ចការសង្គម លុះត្រាតែសង្គមទាំងមូលចូលរួមលុបបំបាត់ និងផ្លាស់ប្ដូរផ្នត់គំនិត មិនរីកចម្រើនមួយចំនួន ដូចជាស្ត្រីមិនគួររៀនបាន ខ្ពស់ជាដើម ដើម្បីបង្កើនលទ្ធភាព និងជំរុញទឹកចិត្តអោយពួកគាត់ ចូលរួមដឹកនាំគ្រប់វិស័យមិនថាក្នុងស្ថាប័នរដ្ឋ សាធារណៈ ឬអង្គភាពណាមួយនោះទេ ។
ជារួម អត្ថប្រយោជន៍សម្រាប់សង្គម គឺនៅពេលមានចំនួនស្ត្រីច្រើន នៅក្នុងមុខតំណែងជាអ្នកដឹកនាំកាន់តែច្រើន វាអាចផ្សារភ្ជាប់ជាមួយ នឹងការប្រយុទ្ធប្រឆាំង និងការយាយីផ្លូវភេទនៅកន្លែងធ្វើការ ហើយអត្ថប្រយោជន៍នៃចីរភាពសេដ្ឋកិច្ចនេះ ក៏ផ្ដល់ឱកាសអោយស្ត្រីចៀសផុត ពីការជួញដូរ ក៏ដូចជាអំពើរហិង្សា ក្នុងគ្រួសារ និងឈានទៅរកសមភាពយេនឌ័រ ដែលក្នុងនោះស្ត្រីមានសិទ្ធនៅក្នុងការសម្រេចចិត្ត លើគ្រប់វិស័យ។ ដូច្នេះ វាពិតជាចាំបាច់ ក្នុងការធានាឱ្យមានការចូលរួមរបស់ស្ត្រីកាន់តែច្រើននៅក្នុងមុខតំណែងជាអ្នកដឹកនាំ៕
ខាងក្រោមនេះជាសកម្មភាពរបស់សិក្ខាកាម នៅក្នុងវគ្គបណ្ដុះបណ្ដាល៖