សង្រ្គាមពាណិជ្ជកម្មអាមេរិក-ចិន៖ រដ្ឋការរបស់លោកដូណាល់ត្រាំបាននិយាយថានៅក្នុងសប្ដាហ៍នេះក្រសួងពាណិជ្ជកម្មនឹងបញ្ចេញតារាងទំនិញ ដែលនាំចូលពីប្រទេសចិន គឺជាការដាក់ទណ្ឌកម្មប្រឆាំងចិនករណីលួចកម្មសិទ្ធិបញ្ញា។
តាមបណ្ដាញផ្សាយព័ត៌មានChannel News Asia ការកំណត់តារាងទំនិញពីប្រទេសចិន អាចធ្វើអាមេរិក ទាញបានតម្លៃនាំចូល ហក់ឡើងពី៥០ទៅ៦០ពាន់លានដុល្លារក្នុងមួយឆ្នាំៗ។
តាមប្រភពដដែលនេះ អាមេរិកនឹងបង្ហាញតារាងមុខទំនិញនេះ ចាប់ពីថ្ងៃសុក្រសប្ដាហ៍នេះ ដែលការពិតលោកត្រាំបានចុះហត្ថលេខា កំណត់ពន្ធលើទំនិញទាំងនោះរួចហើយ កាលពីថ្ងៃទី ២២ មីនា ។
សហរដ្ឋអាមេរិកបានប្រកាសថា ខ្លួននឹងប្ដឹងចិនករណីការលួចកម្មសិទ្ធិបញ្ញាទៅអង្គការពាណិជ្ជកម្មពិភពលោក បើចិនមិនទទួលស្គាល់ថា ខ្លួនបានប្រព្រឹត្តបែបនេះ។
ការដែលអាមេរិកបានព្រមានដូចនេះ ជាការឆ្លើយតបមួយបន្ទាប់ពីចិនកាលពីថ្ងៃអាទិត្យទី ១មេសា បានចាត់ការធ្វើមុនអាមេរិក ដោយបានសម្រេចដាក់ពន្ធគយលើទំនិញនាំចូលពីអាមេរិកដល់ទៅ ១២៨មុខ មានតម្លៃ ៣ពាន់លានដុល្លារ ក្នុងនោះមានទាំងផ្លែឈើ និងសាច់ជ្រូក។
ក្រុងប៉េកាំងបានចាត់វិធានការបែបនេះ គឺជាការសងសឹកទៅរដ្ឋបាលប្រធានាធិបតីអាមេរិក លោក ដូណាល់ ត្រាំ ដែលបានសម្រេចដាក់ពន្ធគយលើការនាំចូលដែកថែប និងអាលុយមីញ៉ូមពីប្រទេសចិន ដោយជំរុញឲ្យមានការព្រួយបារម្ភអំពីសង្គ្រាមពាណិជ្ជកម្មរវាងប្រទេសមហាអំណាចសេដ្ឋ កិច្ចទាំងពីរនេះ។
លោក ដូណាល់ ត្រាំ បានថ្លែងម្ដងហើយម្ដងទៀតប្រឆាំងនឹងអតុល្យភាពជញ្ជីងពាណិជ្ជកម្មជាមួយប្រទេសចិន ដោយមេដឹកនាំអាមេរិករូបនេះ បានសន្យាអំឡុងពេលយុទ្ធនាការបោះឆ្នោតកាលពីឆ្នាំ២០១៦ថា នឹងលុបបំបាត់ចោលនូវឱនភាពពាណិជ្ជកម្មរបស់អាមេរិកជាមួយប្រទេសមហាអំណាចសេដ្ឋកិច្ចធំទីពីរនេះ៕