ភ្នំពេញ ៖ អាជ្ញាធរជាតិអប្សរា ចេញសេចក្តីប្រកាសព័ត៌មានស្នើឱ្យថ្នាក់ដឹកនាំរបស់គណបក្សសង្គ្រោះជាតិ ត្រូវបំពេញបែបបទតាមនីតិវិធីច្បាប់របស់អាជ្ញាធរជាតិអប្សរា មុននឹងសម្រេចចិត្តប្រារព្ធពិធីបួងសួងតាមបែបព្រះពុទ្ធសាសនានៅបរិវេណខាងមុខប្រាសាទអង្គរវត្តនៅថ្ងៃទី ១៩ ខែមិថុនាស្អែកនេះ ។ ការលើក ទ្បើងដូចនេះ ខណៈគណបក្សសង្គ្រោះជាតិគ្រោងរៀបចំកម្មវិធីសាសនានៅខាងមុខប្រាសាទអង្គរវត្ត ខេត្តសៀមរាប ដែលនឹងមានអ្នកចូលរួមប្រមាណជាង២៥០០នាក់ ។
អាជ្ញាធរជាតិអប្បរាបានចេញសេចក្តីប្រកាសព័ត៌មានមួយកាលពីថ្ងៃទី ១៧ ខែមិថុនាម្សិលម៉ិញ ដោយអំពាវនាវឱ្យថ្នាក់ដឹកនាំគណបក្សសង្គ្រោះជាតិ ត្រូវបំពេញបែបបទតាមនីតិវិធីរបស់អាជ្ញាធរជាតិអប្សរា មុនរៀបចំប្រារព្ធពិធីសាសនានៅថ្ងៃទី ១៩ ខែមិថុនាស្អែកនេះ។
សេចក្តីប្រកាសព័ត៌មាននេះបន្តថា អាជ្ញាធរជាតិអប្បរាមានតួនាទីការពារ និងរៀបចំតំបន់រមណីយដ្ឋានអង្គរ ដែលជាបេតិកភណ្ឌពិភពលោកនិងជាអត្តសញ្ញាណជាតិរបស់កម្ពុជា។ ទន្ទឹមនឹងនេះ ដើម្បីធានាបាននូវសន្តិសុខ សណ្តាប់ធ្នាប់ របៀបរៀបរយ និងចៀសវាងផលប៉ះពាល់ គ្រប់ពិធីទាំងអស់ដោយរាប់បញ្ចូលទាំងពិធីបែបសាសនាផងនោះ តម្រូវឱ្យមានការអនុញ្ញាតត្រួតពិនិត្យនិងសម្របសម្រួលពីអាជ្ញាជាតិអប្សរា។
បើតាមអាជ្ញាធរជាតិអប្សរាកន្លងមកពុំមានពិធីណាមួយរៀបចំនៅក្នុងរមណីយដ្ឋានអង្គរដោយគ្មានការពិនិត្យ សម្របសម្រួល និងអនុញ្ញាតពីស្ថាប័ននេះឡើយ។
ប្រធាននាយកដ្ឋានផ្សព្វផ្សាយនៃអាជ្ញាធរជាតិអប្សរា លោកទ្បុង កុសល បានផ្តល់បទសម្ភាសន៍ជាមួយវិទ្យុស្ត្រីនៅថ្ងៃនេះថា រហូតមកដល់ពេលនេះ អាជ្ញាធរជាតិអប្សរាមិនទាន់ទទួលបានលិខិតស្នើសុំប្រារព្ធពិធីណាមួយពីគណបក្សសង្គ្រោះជាតិនៅឡើយនោះទេ ។
មន្ត្រីអាជ្ញាធរជាតិអប្សរារូបនេះ អំពាវនាវឱ្យថ្នាក់ដឹកនាំគណបក្សសង្គ្រោះជាតិ ត្រូវចូលរួមសហការជាមួយអាជ្ញាជាតិអប្សរាតាមរយៈការដាក់លិខិតមកអាជ្ញាធរ ដើម្បីពិនិត្យពីការប្រារព្ធពិធីសាសនាខាងលើនេះ។ លោកបានបន្ថែមទៀតថា ការប្រារព្ធពិធីសាសនារបស់គណបក្សសង្គ្រោះជាតិ ដែលមិនមានការស្នើសុំទៅអាជ្ញាធរជាតិអប្បរានេះ អាចនឹងធ្វើឱ្យប៉ះពាល់ទៅដល់ភ្ញៀវទេសចរណ៍ ដែលបានចូលមកកំសាន្តនៅក្នុងតំបន់អង្គរ និងអាចបង្ករឱ្យមានបញ្ហាប្រឈមមួយចំនួនទៀត។
«យើងមានការព្រួយបារម្ភចំពោះការរៀបចំពិធីអីដែលមានទំហំធំ មនុស្សច្រើន ហើយមិនមានការពិភាក្សា មិនមានវែកញែកលម្អិតអំពីទីតាំងកន្លែង អំពីស្អីៗហ្នឹងអាចធ្វើឱ្យស្ទះនៅទីកន្លែងហ្នឹង អាចនឹងរំខានដល់អ្នកដែលមកទស្សនាតំបន់រមណីយដ្នានហ្នឹង…»។
ជុំវិញបញ្ហានេះ វិទ្យុស្ត្រី មិនទាន់អាចសុំការបញ្ជាក់បន្ថែមពីអ្នកនាំពាក្យគណបក្សសង្គ្រោះជាតិ បាននៅឡើយទេនៅថ្ងៃនេះ។
ទោះជាយ៉ាងណា មិនមានការបញ្ជាក់ណាមួយពីមន្ត្រីអាជ្ញាធរជាតិអប្បរាថា នឹងមានចំណាត់ការបែបណានោះទេ ប្រសិនបើគណបក្សសង្គ្រោះជាតិនៅតែបន្តប្រារព្ធពិធីបែបសាសនានេះ។ បើតាមសេចក្តីប្រកាសព័ត៌មានរបស់អាជ្ញាធរអប្សរាបានសង្កត់ធ្ងន់ថា អ្នកដែលប្រារព្ធពិធីដោយគ្មានការអនុញ្ញាតនោះ ត្រូវតែទទួលខុសត្រូវទាំងស្រុងចំពោះមុខច្បាប់ជាធរមានពាក់ព័ន្ធនឹងឧបទ្ទវហេតុជាយថាហេតុ ដែលកើតចេញអំពីការប្រារព្ធពិធីនេះ។
សូមជំរាបថា គណបក្សសង្គ្រោះជាតិបានចេញសេចក្តីអំពាវនាវមួយកាលពីថ្ងៃទី ១៥ ខែមិថុនា ដោយជូនដំណឹងទៅដល់អ្នកគាំទ្ររបស់ខ្លួនថា គណបក្សសង្គ្រោះជាតិនឹងរៀបចំកម្មវិធីសាសនាដែលប្រព្រឹត្តិទៅនៅថ្ងៃអាទិត្យ ទី ១៩ ខែមិថុនា ខេត្តសៀមរាប។ កម្មវិធីនេះនឹងមានការចូលរួមពីសមាជិករដ្ឋសភា ព្រឹទ្ធសភា ថ្នាក់ដឹកនាំគណបក្សខេត្ត និងពលរដ្ឋដែលមកពីខេត្តនានា ប្រមាណជាង ២៥០០នាក់។
