អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ បានចេញសេចក្តីប្រកាសព័ត៌មានជាសាធារណៈស្តីអំពីការពន្យារពេលនៃការកំណត់ដាក់លិខិតប្រកាសបង់ប្រាក់ពន្ធ-អាករគ្រប់ប្រភេទប្រចាំខែមករា ឆ្នាំ២០១៦ ដល់សហគ្រាសជាអ្នកជាប់ពន្ធទូទៅ។
យោងតាមសេចក្ដីជូនដំណឹងរបស់អគ្គនាយដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ នៅថ្ងៃទី១៥ ខែកុម្ភៈ ឆ្នាំ២០១៦ បានឱ្យដឹងថា ដើម្បីសម្រួលដល់ការទទួលនិងបង់ប្រាក់ពន្ធ ក៏ដូចជាផ្ដល់ឱកាសជូនអ្នកជាប់ពន្ធ ដើម្បីធ្វើការកែប្រែព័ត៌មានសហគ្រាសរបស់ខ្លួន ឱ្យស្របតាមប្រព័ន្ធគ្រប់គ្រងថ្មីនេះ អគ្គនាយកដ្ឋានពន្ធដារសម្រេច ពន្យារកាលបរិច្ឆេទ នៃការកំណត់ដាក់លិខិតប្រកាស និងបង់ប្រាក់ពន្ធ-អាករគ្រប់ប្រភេទ ប្រចាំខែមករា ឆ្នាំ២០១៦ ដែលត្រូវផុត កំណត់កាលបរិច្ឆេទ កាលពីនៅថ្ងៃទី១៥ ខែកុម្ភៈ រហូតដល់ថ្ងៃទី១៩ ខែកុម្ភៈវិញ។
តាមសេចក្ដីជូនដំណឹងដដែលបានបន្ថែមថា មូលហេតុនៃការពន្យារពេលកាលបរិច្ឆេទ នៃការកំណត់ដាក់លិខិតប្រកាសបង់ប្រាក់ពន្ធ-អាករគ្រប់ប្រភេទប្រចាំខែមករា ឆ្នាំ២០១៦ នេះ គឺដោយសារតែពិនិត្យឃើញថា អ្នកជាប់ពន្ធមួយចំនួនមានការយល់ដឹងមិនទាន់ច្បាស់អំពី ប្រព័ន្ធគ្រប់គ្រងនេះ ស្របពេលដែលអ្នកជាប់ពន្ធមួយចំនួនផ្សេងទៀតបានធ្វើការផ្លាស់ប្ដូរ អាសយដ្ឋានរបស់ខ្លួន ដោយមិនទាន់បានជូនដំណឹងទៅរដ្ឋបាលសារពើពន្ធ ឬមិនទាន់បាន ធ្វើបច្ចុប្បន្នភាពព័ត៌មានសហគ្រាសរបស់ខ្លួន ដែលការណ៍នេះធ្វើឱ្យមានភាពរាំងស្ទះក្នុងការ បង់ប្រាក់ពន្ធ៕
