ក្រោយពីមានព័ត៌មានបានចុះផ្សាយថា មានករណីពលរដ្ឋរស់នៅភូមិស្រែគរ ស្រុកសេសាន ខេត្ដស្ទឹងត្រែង បានពុលស្រាចំនួន ១០នាក់ ស្លាប់ម្នាក់ និងមួយចំនួនទៀត ត្រូវបញ្ជូនទៅសង្គ្រោះនៅមន្ទីរពេទ្យ។ បន្ទាប់ពីមានព័ត៌មានផ្សព្វផ្សាយកាលពីថ្ងៃម្សិលមិញនេះ ស្នងការនគរបាលខេត្ដស្ទឹងត្រែង បានចេញមុខបដិសេធចំពោះព័ត៌មាននេះ ជារឿងមិនពិតនោះទេ។
លោក ម៉ៅ តារា ស្នងការនគរបាលខេត្ដស្ទឹងត្រែង បានមានប្រសាសន៍ប្រាប់វិទ្យុស្ដ្រី នៅថ្ងៃអង្គារនេះថា កាលពីម្សិលមិញពិតជាមានករណីពលរដ្ឋបានស្លាប់ម្នាក់ពិតមែន តែមិនមែនស្លាប់ដោយសារករណីពុលស្រាសឡើយ។
លោក ម៉ៅ តារា បានបន្ថែមថា បើយោងទៅតាមព័ត៌មានដែលពលរដ្ឋរាយការណ៍ទៅកាន់សមត្ថកិច្ចដំបូងថា មានករណីពុលស្រា ១០នាក់ ស្លាប់ម្នាក់ និងរងបួសម្នាក់។ ប៉ុន្ដែក្រោយពីការសមត្ថកិច្ច ព្រមទាំងមន្ដ្រីក្រសួងសុខាភិបាល និងអ្នកបច្ចេកទេស ចុះទៅពិនិត្យនៅកន្លែងកើតហេតុ គឺបង្ហាញឱ្យឃើញថា ស្រា ស ដែលពលរដ្ឋពិសានោះ គ្មានសារជាតិពុលអ្វីនោះឡើយ។
លោក ម៉ៅ តារា បានបញ្ជាក់ថា ចំពោះបុរស ឈ្មោះ សុទ្ធ ចាន់ ដែលស្លាប់នោះគឺមូលហេតុបណ្ដាលមកពីខ្យល់គនោះទេ។ ហើយចំពោះពាក្យលេចឮថា មានម្នាក់ក្នុងចំណោម ១០នាក់ ពុលស្រានោះ ក៏មិនពិតដូចគ្នាដែរ។
លោកបន្ថែមថា៖ «ព័តមានដំបូងដូចលោកបានជម្រាបអញ្ចឹង តែក្រោយពីយើងបានចុះធ្វើការស្រាវជ្រាវដោយមាន ខាងក្រសួងមន្ទីសុខាភិបាលខេត្ដ មានកម្លាំងប៉ូលីស និងអ្នកបច្ចេកទេសវិទ្យាសាស្ដ្រហ្នឹងចុះទៅ ហើយតាមពិតមិនមែនការផឹកស្រាស្លាប់ទេ ព្រោះថាអ្នកដែលផឹកស្រាហ្នឹង វា ១០ នាក់ជាង គេទាំងអស់អត់អីទេ លើកលែងតែគាត់វិញស្លាប់ ស្លាបហ្នឹងក្រោយពីយើងធ្វើកោសល្យវិច័យទៅឃើញថា មូលហេតុបណ្ដាលមកពីខ្យល់គ គាត់ហូបស្រាតាំងពីព្រឹករហូតដល់ល្ងាច មិនមែនករណីពុលស្រាទេ ហើតម្នាក់ទៀតនោះព័ត៌មានដំបូង យើងថាគាត់ទៅមន្ទីរពេទ្យ ប៉ុន្ដែពេលដែលយើងចុះទៅដល់កន្លែងកើតហេតុហ្នឹងគាត់ស្រវឹងខ្លាំងពេកគាត់ទៅដេកផ្ទះហ្នឹង ហើយឥឡូវគាត់មានសុខភាពធម្មតាវិញ អត់មានរបួសអីទេ គាត់ស្រវឹងស្រាហ្នឹង»៕