សហភាពអឺរ៉ុបប្រកាសឱ្យយុវជនកម្ពុជាប្រកួតគ្នាសរសេរអត្ថបទ លើប្រធានបទចំនួន៣ ដែលទាក់ទិននឹង លក្ខណៈសម្បត្តិនៃសមាគមអាស៊ាន បញ្ហាធនធានធម្មជាតិ និង អនាគតរបស់យុវជន ដែលហៅថា«ការវិនិយោគផ្នែកនិពន្ធ អត្ថបទលើយុវជនកម្ពុជា»។
ប្រធានបទទាំង៣នេះគឺ៖
១/តើសមាគមអាស៊ានគួរមានលក្ខណៈដូចសហភាពអឺរ៉ុបដែរឬទេ?
២/ហេតុអ្វីបានជាធនធានធម្មជាតិជាបញ្ហាដែលគួរយកចិត្តទុកដាក់?
3/តើយុវជនគួរធ្វើអ្វីខ្លះដើម្បីកែប្រែអនាគតឲ្យមានភាពល្អប្រសើរ?
ប្រធានបទនេះត្រូវបានរៀបចំដោយ សហភាពអឺរ៉ុប សហការជាមួយសមាគមយុវជនខ្មែរ កាលពីថ្ងៃពុធទី ២៤ខែសីហា នៅការិយាល័យប្រតិភូសហភាពអឺរ៉ុបប្រចាំព្រះរាជាណាចក្រកម្ពុជា។
លោក អាឡាំង វ៉ាន់ដឺស្មីសសិន ភារធារីស្តីទីនៃសហភាពអឺរ៉ុបប្រចាំនៅកម្ពុជា មានប្រសាសន៍ក្នុងសន្និសីទប្រកាសបើកការប្រកួតនិពន្ធអត្ថបទឆ្នាំ២០១៦ថា៖ «ប្រធានបទទាំង៣ដែលបានជ្រើសរើសសម្រាប់ការដាក់ប្រកួតនេះ នឹងអនុញ្ញាតឲ្យនិស្សិតអធិប្បាយពីអត្ថន័យនៃបាវចនា ឯកភាពចម្រុះ និង ចក្ខុវិស័យតែមួយ អត្តសញ្ញាណតែមួយ សហគមន៍តែមួយ ព្រមទាំងមូលហេតុកំណើនសេដ្ឋកិច្ចរឹងមាំ ដែលចាំបាច់ត្រូវធ្វើឲ្យបានគ្រប់ជ្រុងជ្រោយ និង ប្រកបដោយភាពបៃតង»។
តាមលោក អាឡាំង វ៉ាន់ដឺស្មីសសិន ការប្រកួតនេះគឺក្នុងគោលបំណងឲ្យនិស្សិតជាពិសេសយុវជនកម្ពុជាជំនាន់ក្រោយបានបង្ហាញពីឆន្ទៈរបស់ខ្លួន តាមរយៈការតែងនិពន្ធអត្ថបទតែងសេចក្តីនិយាយពីថ្នាក់ដឹកនាំ និង ដៃគូអភិវឌ្ឍ ដើម្បីចូលរួមកំណែទម្រង់គោលនយោបាយនានា ក្នុងតំបន់។
លោកបន្ថែមថា ថ្វីបើស្នាដៃ របស់បេក្ខជនកន្លងមក សហភាពអឺរ៉ុប និង អង្គការដៃគូមិនទាន់ រៀបចំបោះពុម្ពផ្សាយជាសាធារណៈក្តី តែក៏អាចជាធនធានមួយសម្រាប់ថ្ងៃអនាគតផងដែរ។
ចំណែកលោកស្រី សិទ្ធិ ហុងអេង ប្រធានសមាគមយុវជនខ្មែរ KYA បានថ្លែងក្នុងសន្និសីទនេះដែរថាយុវជន ឬ សិស្ស និស្សិតដែលចាប់អារម្មណ៍ អាចដាក់ពាក្យចូលរួមប្រកួត ដោយ ត្រូវមានអាយុចាប់ពី ១៨ ដល់ ២៦ឆ្នាំ ហើយការនិពន្ធអត្ថបទត្រូវសរសេរជាភាសាអង់គ្លេស បារាំង និង អាឡឺម៉ង់។ តាមលោកស្រី ការឈប់ទទួលអត្ថបទប្រកួតគឺ នៅថ្ងៃទី៣០ខែតុលា ឆ្នាំ២០១៦។
លោកស្រី សិទ្ធិ ហុងអេង បន្តថា យុវជន ឬ សិស្ស និស្សិតនឹងមានឱកាសចូលរួមប្រកួតអត្ថបទច្រើនជាងបណ្តាឆ្នាំកន្លងទៅ ពីព្រោះនេះជាឱកាសក្នុងការបញ្ចេញសំលេង ទស្សនៈ របស់យុវជនកម្ពុជា ដើម្បីរួមចំណែកក្នុងការកសាងសង្គមជាតិ។
គួររម្លឹកផងដែរថា នេះជាលើកទី៣ហើយ ចំពោះការរៀបចំការប្រកួតនិពន្ធអត្ថបទ ដែលកាលពីលើកទី១ក្នុងឆ្នាំ២០១៤ ការប្រកួតមានតែមួយប្រធានបទ។ ការប្រកួតលើកទី១នេះ បេក្ខជនចូលរួម និង អ្នកទទួលបានជ័យលាភីមានចំនួនតិចតួច។ ចំណែកលើកទី២ ការប្រកួតនិពន្ធអត្ថបទបានកំណត់ប្រធានបទចំនួន៣ដូចលើកទី៣នេះដែរ ដោយតម្រូវឱ្យបេក្ខជនទទួលបានជ័យលាភីមានចំនួន១០រូប ហើយរង្វាន់លេខ១ គេដាក់រហស្សនាមថា Golden ចំណែកឯអ្នកឈ្នះលេខ២និងលេខ៣គេហៅថារង្វាន់លេខ២,លេខ៣។
ការវិនិយោគផ្នែកនិពន្ធអត្ថបទលើយុវជនកម្ពុជា គឺជាផ្នែកមួយនៃជំនួយអភិវឌ្ឍន៍របស់សហភាពអឺរ៉ុប ក្រោមកិច្ចសហប្រតិបត្តិការទ្វេភាគីរវាងរាជរដ្ឋាភិបាលកម្ពុជា និងអង្គការសង្គមស៊ីវិល៕