សហជីពសេរីកម្មករនៃព្រះរាជាណាចក្រកម្ពុជា បានចេញសេចក្តីថ្លែងការណ៍ ប្រកាសថ្កោលទោសភ្លាមៗ បន្ទាប់ពីមានជនមិនស្គាល់អត្តសញ្ញាណមួយក្រុម បានធ្វើសកម្មភាពចាប់មន្ត្រីសហជីខ្លួន២រូប។
មន្ត្រីសហជីព២រូប ត្រូវបានចាប់បញ្ចូលរថយន្តដែលគេត្រៀមជាស្រេចទៅបាត់ស្រមោលនោះ ទី១ ឈ្មោះ កញ្ញា យ៉ុង លាភ ជាបុគ្គលិកសហជីពសរេរីកម្មករនៃព្រះរាជាណាចក្រកម្ពុជា និងទី២ឈ្មោះ ទូច ស្រ៊ុន ប្រធានសហជីពសេរីកម្មករ នៃរោងចក្រកាត់ដេរសំលៀកបំពាក់សេរី ខេមបូឌៀ ហ្កាម៉ិន ខូលអិលធីឌី។ ការចាប់ខ្លួនេះ ធ្វើឡើងនៅចំនុចក្បែររោងចក្រកាត់ដេរសំលៀកបំពាក់សេរី ខេមបូឌៀ ហ្កាម៉ិន ខូអិលធីឌី មានទីតាំងឋិតនៅភូមិចំបក់ ឃុំវល្លិ៍ស ស្រុកសំរោងទង ខេត្តកំពង់ស្ពឺ កាលពីព្រឹកថ្ងៃ អង្គារម្សិលមិញនេះ។
ការចាប់ខ្លួនសហជីព២រូបនេះ បន្ទាប់ពី កម្មកររំសាយការធ្វើកូដកម្ម នៅមុខរោងចក្រសេរី។ នៅក្នុងសេចក្តីថ្លែងការណ៍បានបញ្ជាក់ទៀតថា ការចាប់ខ្លួនមន្ត្រីសហជីព២រូប ពីសំណាក់ជនមិនស្គាល់អត្តសញ្ញាណនេះ គឺជាការរំលោភសិទ្ធិបុគ្គលយ៉ាងធ្ងន់ធ្ងរ ដែលធានាដោយច្បាប់ និងបានទាមទារអោយក្រុមជនដៃដល់ ដែលអ្នកឃើញហេតុការណ៍សង្ស័យថា ជាសមត្ថកិច្ចបន្លំស្លៀកពាក់ជាស៊ីវិល ធ្វើសកម្មភាពនេះ ដោះលែងមន្ត្រីសហជីពទាំង២រូប ជាន្ទាន់ ដោយគ្មានលក្ខខណ្ឌ៕