ភ្នំពេញ៖ នៅព្រឹកថ្ងៃទី៥ ខែកញ្ញា ឆ្នាំ២០១៦នេះ សម្ដេចនាយករដ្ឋមន្ដ្រី ហ៊ុន សែន រួមទាំងគណៈប្រតិភូជាន់ខ្ពស់កម្ពុជា បានធ្វើ ដំណើរទៅចូលរួមកិច្ចប្រជុំកំពូលអាស៊ាន នៅសាធារណរដ្ឋប្រជាធិបតេយ្យប្រជាមានិតឡាវ។ នេះបើតាមការឱ្យដឹងនៅលើហ្វេសប៊ុករបស់សម្ដេច។
ហ្វេសប៊ុកសម្ដេច ហ៊ុន សែន ដដែលបានឱ្យដឹងបន្ថែមថា កិច្ចប្រជុំនេះនឹងប្រព្រឹត្តទៅរយៈពេល ៣ថ្ងៃ ចាប់ពីថ្ងៃទី ០៦ កញ្ញា ដល់ ថ្ងៃទី០៨ កញ្ញា ឆ្នាំ២០១៦។ សម្ដេចនាយករដ្ឋមន្ដ្រី ហ៊ុន សែន បានសរសេរបន្ដថា ក្នុងកិច្ចប្រជុំរយៈពេល ៣ ថ្ងៃនេះ មានជាង១០ អង្គប្រជុំ។
ជាមួយគ្នានេះ សម្ដេចនាយករដ្ឋមន្ដ្រី ហ៊ុន សែន ក៏បានលើកឡើងដែរថា៖ «ក្នុងឋានៈកម្ពុជាជាសមាជិកអាស៊ានមួយ លោកនិងខិតខំចូលរួមចំណែកដើម្បីជោគជ័យ»។
សូមជម្រាបដែរថា ក្នុងអំឡុងនៃកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ ដែលសម្ដេចនាយករដ្ឋមន្ដ្រី ហ៊ុន សែន រួមទាំងថ្នាក់ដឹកនាំអាស៊ានដទៃទៀត នឹងចុះហត្ថលេខាលើសេចក្ដីថ្លែងការណ៍អាស៊ាន ស្ដីពី ការឆ្លើយតបរបស់អាស៊ានទៅនឹងគ្រោះមហន្ដរាយជាផ្នែកមួយនៅក្នុងតំបន់ និងក្រៅតំបន់។
ក្រៅពីការអញ្ជើញចូលរួមក្នុងកិច្ចប្រជុំកំពូលអាស៊ាន សម្ដេច ហ៊ុន សែន នឹងចូលរួមកិច្ចប្រជុំកំពូលវិនិយោគ និងធុរៈកិច្ចអាស៊ានឆ្នាំ ២០១៦ និងកិច្ចប្រជុំកំពូលមេគង្គ-ជប៉ុន លើកទី៨។ បន្ថែមលើពីនេះ សម្ដេចនាយករដ្ឋមន្ដ្រី ហ៊ុន សែន នឹងជួបពិភាក្សាទ្វេភាគីផងដែរ ជាមួយប្រធានាធិបតី រួមទាំងនាយករដ្ឋមន្ដ្រី និងប្រមុខគណៈប្រតិភូនៃប្រទេសមួយចំនួនផងដែរ៕