ភ្នំពេញ៖ នាយករដ្ឋមន្ត្រីកម្ពុជា សម្ដេច ហ៊ុន សែន ភា្ញក់ផ្អើលចំពោះសាលក្រមរបស់សាលាដំបូងរាជធានីភ្នំពេញ ដែលសម្រេចសេចក្ដីឱ្យមេដឹកនាំសហជីព ទទួលការផ្តន្ទាទោសទាំងដែលអ្នកពុំមានបានប្រព្រឹត្តបទល្មើស។
អត្ថាធិប្បាយជូនដោយ លោក សោម លាភ៖
សម្ដេច ហ៊ុន សែន អះអាងថា អ្នកទាំងបីនាក់គឺស្អាតស្អំហើយសម្ដេចថាមានភស្តុតាង និងមានសាក្សីគ្រប់គ្រាប់ក្នុងការបញ្ជាក់នូវរឿងនេះ។ យ៉ាងណា នាយករដ្ឋមន្ត្រីរូបនេះ ណែនាំឱ្យអ្នកទាំងនោះដាក់ពាក្យប្ដឹងទៅឧទ្ធរណ៍ដើម្បីជំទាស់លើសេចក្ដីសម្រេចនេះ។
មកដល់ថ្ងៃទី ១១ ខែ ធ្នូ ឆ្នាំ ២០១៨ សាលាដំបូងរាជធានីភ្នំពេញ បានចេញសាលក្រមសម្រេចផ្តន្ទាទោសមេដឹកនាំសហជីពទាំង ៦ នាក់ ក្នុងម្នាក់ៗមានទោសរយៈពេល២ឆ្នាំ និង ៦ ខែ តែទោសនេះត្រូវបានព្យួរ និងពិន័យជាប្រាក់ចំនួន ៣៥លានរៀលផងដែរ។
ក្រុមមេដឹកនាំសហជីពទាំង៦រូបគឺ លោក រ៉ុង ឈុន ប្រធានសហភាពសហជីពកម្ពុជា លោក ជា មុន្នី ប្រធានសហជីពសេរីកម្មករកម្ពុជា លោក អាត់ ធន ប្រធានសហភាពការងារកម្ពុជា អ្នកស្រី យ៉ាង សោភ័ណ្ឌ ប្រធានសម្ព័ន្ធសហជីពកម្ពុជា ប៉ាវ ស៊ីណា ប្រធានសម្ព័ន្ធសហជីពចលនាកម្មករកម្ពុជា និង លោកស្រី ម៉ម ញឹម ប្រធានសហព័ន្ធសហជីពជាតិនៃឧស្សាហកម្មវាយនភណ្ឌ។
សម្តេច ហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃពុធទី១២ធ្នូនេះ បានចុះជួបសំណេះសំណាលជាមួយកម្មករ កម្មការិនីចំនួន ជាងមួយម៉ឺននាក់ នៅខេត្តកំពង់ស្ពឺតែ ក្នុងឱកាសនោះ សម្ដេច បានបញ្ជាក់ថា សម្ដេច បានតាមដានសំណុំរឿងក្ដីរបស់មេសហជីពកម្ពុជាយ៉ាងយកចិត្តទុក។
កន្លងមក សម្ដេចនាយករដ្ឋមន្ត្រីកម្ពុជា បានណែនាំដល់មេសហជីពដែលជាប់បណ្ដឹងនៅតុលាការ ត្រូវបញ្ជូនសំណុំរឿងទៅក្រសួងការងារ និងបណ្ដុះបណ្ដាលវិជ្ជាជីវៈ ដើម្បីឱ្យសហការជាមួយក្រសួងយុត្តិធម៌ដើម្បីពន្លឿនការសម្រេចលើរឿងក្ដីទាំងនេះ។
យ៉ាងណាមិញ សម្ដេច ហ៊ុន សែន បានថ្លែងចំពោះមុខកម្មករកម្មការនីថា អ្នកដែលពាក់ព័ន្ធនៅករណីកុបកម្មនៅផ្លូវវែងស្រេងគឺត្រូវតែជាប់ទោស ហើយនេះគឺផ្លូវច្បាប់។ សម្ដេច បញ្ជាក់ថា ព្រឹត្តិការណ៍នៅផ្លូវវែងស្រែងនេះ ជាព្រឹតិ្តការណ៍ផ្តួលរំលំរដ្ឋាភិបាល ដូចនេះអ្នកដែលពាក់ព័ន្ធត្រូវទទួលទោស។
នាយករដ្ឋមន្ត្រីកម្ពុជាធ្លាប់បានអះអាងថា សម្ដេច នៅមានការសោកស្ដាយ ដែលមិនបានសម្លាប់អ្នកដែលចូលរួម និងបង្កើតចលនានេះ។
ក្នុងចំណោមអ្នកទាំង ៦ នាក់នោះ ដែលសាលាដំបូងសម្រេចផ្តន្ទាទោសនោះ សម្ដេច ហ៊ុន សែន ធានាថា មានមេដឹកនាំសហជីព ៣ នាក់ មិនមានកំហុសទេ ហើយសម្ដេចមានភស្តុតាង និងសាក្សី។ សម្ដេច អាចនឹងបញ្ជូនសាក្សីប្រសិនបើមានប្រយោជន៍ដល់ការសម្រេចរបស់តុលាការ និងអ្នកទាំងនោះ។
សម្តេចបានអះអាងថា មនុស្សបីនាក់ដែលមិនមានកំហុស មាន លោក អាត់ ធន លោក ជា មុន្នី និង លោក ប៉ាវ ស៊ីណា គឺមិនជាប់ពាក់ព័ន្ធឡើយ ដោយសម្តេចអាចបញ្ជូន លោក កែវ រ៉េម៉ី ប្រធានគណៈកម្មាធិការសិទ្ធិមនុស្សកម្ពុជា និងលោក សាយ សុភាព ឱ្យធ្វើជាសាក្សី។
សម្ដេច ហ៊ុន សែន សាក្សីទាំងពីរនាក់នេះដឹងច្បាស់ និងអាចបញ្ជាក់ថា អ្នកទាំងបីនាក់នោះមិនបានចូលរួមក្នុងព្រឹត្តិការណ៍ផ្លូវវែងស្រេងនោះទេ។
លោក អាត់ ធន ប្រធានសហភាពការងារកម្ពុជា ប្រាប់វិទ្យុស្រ្តីថា លោក មានការខកចិត្តជាខ្លាំងចំពោះសេចក្ដីសម្រេចរបស់សាលាដំបូងរាជធានីភ្នំពេញបែបនេះ។
លោក បន្ថែមថា ការថ្លែងរបស់នាយករដ្ឋមន្ត្រីកម្ពុជាបែបនេះ គឺជាការល្អ ក្នុងការធ្វើឱ្យសាលាឧទ្ធរណ៍ពិចារណាសម្រេចសេចក្ដីឱ្យពួកគ្មានទោស។
មេដឹកនាំសហជីពទាំង ៦នាក់ ត្រូវចោទពីបទផ្តើមគំនិតក្នុងអំពើហិង្សាដោយចេតនាមានស្ថានទម្ងន់ទោស ផ្តើមគំនិតក្នុងអំពើធ្វើឲ្យខូចខាតដោយចេតនាមានស្ថានទម្ងន់ទោស ផ្តើមគំនិតក្នុងអំពើគំរាមកំហែងថា នឹងធ្វើឲ្យខូចខាតដែលភ្ជាប់នូវបញ្ជាអ្វីមួយ និងពីបទផ្តើមគំនិត ក្នុងអំពើប្រើមធ្យោបាយដើម្បីជាឧបសគ្គដល់ចរាចរណ៍សាធារណៈ ប្រព្រឹត្តនៅចំណុចមុខសួនឧស្សាហកម្មកាណាឌីយ៉ា ផ្លូវវ៉េងស្រេង អំឡុងថ្ងៃទី២៥ ខែធ្នូ ឆ្នាំ២០១៣ រហូតដល់ថ្ងៃទី១៣ ខែមករា ឆ្នាំ២០១៤។
កុបកម្មនេះ ធ្វើឡើងក្រោយលទ្ធផលនៃការបោះឆ្នោតជាតិអាណត្តិទី ៥ ឆ្នាំ ២០១៣៕
អត្ថបទដោយ៖ លោក សោម លាភ