ភ្នំពេញ៖ ជាថ្មីម្ដងទៀតបន្ទាប់ពីសម្ដេច ហ៊ុន សែន ប្រមុខដឹកនាំរាជរដ្ឋាភិបាលអំពាវនាវឲ្យមន្ដ្រី ជួយទិញស្រូវ ប្រជាកសិករ ដែលជួបប្រទះបញ្ហាស្រូវធ្លាក់ថ្លៃកាលពីពេលកន្លងទៅរួចមក។
នៅថ្ងៃទី ២២ កញ្ញា នេះក្នុងពិធីចែកសញ្ញាបត្រ ដល់និស្សិតសាកលវិទ្យាល័យពុទ្ធិសាស្ត្រ នៅសណ្ឋាគារសុខាភ្នំពេញ សម្ដេច ហ៊ុន សែន អំពាវនាវដល់ពលរដ្ឋខ្មែរ ជួយទិញស្រូវប្រជាកសិករខ្មែរច្រើនថែមទៀត គឺការចូលរួមជួយកសិករខ្មែរ។ ប្រសាសន៍នាយករដ្ឋមន្ដ្រីដូចនេះ ត្រូវបានអ្នកជំនាញកសិកម្មបង្ហាញការសាទរ។ ក៏ប៉ុន្ដែអ្នកជំនាញកសិកម្មយល់ថា ការអំពាវនាវរបស់សម្ដេច ហ៊ុន សែន គឺត្រឹមតែជាវិធីសាស្ដ្រក្នុងរយៈពេលខ្លីប៉ុណ្ណោះ។ លោក លៀ ស៊ីណា រាយាការណ៍៖
ក្នុងពិធីចែកសញ្ញាបត្រ នេះ សម្ដេចនាយករដ្ឋមន្ដ្រី ហ៊ុន សែន បានថ្លែងអំណរគុណដល់មន្ដ្រីទាំងអស់ ដែលបានចូលរួមជួយទិញស្រូវប្រជាកសិករខ្មែរ ដែលកំពុងជួបប្រទះបញ្ហាស្រូវធ្លាក់ថ្លៃ។
សម្ដេចបញ្ជាក់ថា ការធ្លាក់ថ្លៃស្រូវរបស់កសិករខ្មែរ រាជរដ្ឋាភិបាលបានព្យាយាមជួយតាមគ្រប់រូបភាព។
សម្ដេច ហ៊ុន សែន ក៏បានអំពាវនាវដល់គ្រួសារដែលមានលទ្ធភាពឲ្យជួយទិញស្រូវពីកសិករ ដើម្បីស្ដុកទុក ដែលជាគោលបំណង ជួយសម្រួលដល់ការលំបាករបស់កសិករខ្មែរ។
សម្ដេច ហ៊ុន សែន៖ «អំពាវនាវ តទៅទៀតឲ្យជួយទៅដល់កសិករយើង អង្ករខ្មែរឆ្ងាញ់សង្ឃឹមថាយើងទទួលទានអង្កររបស់យើងហើយគ្រួសារនីមួយៗ មានលទ្ធិភាពទិញស្រូវយកមកស្ដុកទុក ប៉ុន្ដែកុំស្ដុកទុកនៅបាត់ដំបង ឬបន្ទាយមានជ័យ ឬពោធិសាត់ដែលកំពុងមានបញ្ហាស្រាប់យកមកស្ដុកផ្ទះខ្លួនមក»។
កាលពីសប្ដាហ៍មុន សម្ដេច ហ៊ុន សែន ក៏បានបញ្ជាឱ្យ បញ្ចេញសាច់ប្រាក់ ២៧លានដុល្លារដើម្បី ជួយសម្រួល កសិករ និង ជួយធ្វើ តម្លៃស្រូវមានតម្លៃឡើងវិញ។ វិធានការនេះ ក៏ទទួលបានការសាទរពីអ្នកជំនាញខាងកសិកម្មផងដែរ។
ចំពោះ ការអំពាវនាវ របស់សម្ដេច ជាថ្មីទៀតនេះ នាយកប្រតិបត្ដិ យកមជ្ឈមណ្ឌលសិក្សា និងអភិវឌ្ឍកសិកម្មកម្ពុជា CEDAC លោក សម វិទូ មានប្រសាសន៍ថា ក្នុងនាមលោកជាអ្នកដែលធ្វើការផ្នែកសិកម្មលោកមានការសាទរប្រសាសន៍សម្ដេច ហ៊ុន សែន គឺមាន សារសំខាន់ ប៉ុន្ដែលោកយល់ឃើញថា នេះពុំមែនជាយន្ដការរយៈពេលវែង អាចជួយកសិករខ្មែរឲ្យផុតពីបញ្ហាទៅថ្ងៃមុខបានទេ។
លោក សម វិទូ៖«តាមពិតទៅប្រសាសន៍គាត់ហ្នឹង គឺល្អដើម្បីឲ្យខ្មែរជួយគាំទ្រផលិតផលរបស់ខ្មែរ ប៉ុន្ដែប្រសាសន៍ហ្នឹងមិនមែនជាយុទ្ធសាស្ដ្រទេ គ្រាន់ជាវិធីសាស្ដ្រក្នុងរយៈពេលខ្លី របៀបដើម្បីជួយសង្គ្រោះទេ ព្រោះធម្មតាបើប្រកាសអញ្ចឹងគឺមានការជួយទិញមែន ប៉ុន្ដែវាត្រឹមក្នុងរយៈពេលខ្លីប៉ុណ្ណោះ ព្រោះមន្ដ្រីអ្នកមានលុយថ្វីបើគាត់ជួយទិញ ៤ ៥ តោន អីមែន ប៉ុន្ដែសួរថាគាត់យកទៅទុកកន្លែង ហើយមានកន្លែងណាដាក់ ប៉ុន្ដែល្អគ្រាន់តែយើងអាចគាំទ្រក្នុងរយៈពេលខ្លី»។
ក្រៅតែពីអំពាវនាវដល់គ្រួសារមានលទ្ធភាពជួយទិញស្រូវកសិករ សម្ដេច ក៏បានស្នើឲ្យមន្ដ្រីដែលបានទិញស្រូវពីកសិករ ត្រូវតែដឹកស្រូវ បានទិញទាំងនោះមកស្ដុកទុក ក្នុងផ្ទះរបស់ខ្លួន ដោយមិនអនុញាតិឲ្យទុកចោលនោះទេ។
សម្ដេច ហ៊ុន សែន៖ «អញ្ចឹងអ្នកដែលទិញស្រូវទាំងប៉ុន្មាន មេត្ដាដឹកស្រូវយក មក ហាល នឹងផ្ទះខ្លួនមកហើយមកកិននៅភ្នំពេញមក បើទិញទុកនៅឯណោះដដែលវាដដែលទេ»។
ប្រទេសកម្ពុជា ត្រូវបាន គេដាក់រហស្សនាម ថាជា ប្រភពនៃកសិកម្ម ស្រូវ ធំមួយបើធៀបនឹង ប្រទេសជាច្រើន ទៀត នៅក្នុង តំបន់ អាស៊ីអាគ្នេយ៌ ។ ពលរដ្ឋខ្មែរ ជាង៧០ ភាគរយ មានមុខរបរ កសិកម្ម ។ តែបែបនេះក្ដី ទីផ្សារនាំអង្ករ ចេញកម្ពុជា នៅតែមានទំហំតូច បើធៀបនឹងប្រទេសជិតខាង។ ប្រទេសថៃជាប់ចំណាត់ថ្នាក់លេខ ២ និង វៀតណាម លេខ៣ ដែលនាំអង្ករទៅលក់នៅទីផ្សារ អន្តរជាតិ។ ចំណែក កម្ពុជា ជាប់លេខ៩ ។ នេះបើ តាម របាយការណ៍មួយរបស់ អ្នកសេដ្ឋកិច្ច នៃ វិស័យ ស្រូវ អាស៊ី ដែលបានចុះផ្សាយតាមរយៈគេហទំព័រ Maps of the World ដែលបានចុះផ្សាយកាលពីថ្ងៃ៨ ខែមិថុនា ឆ្នាំ២០១៦ ៕