សម្ដេចហ៊ុនសែន អះអាងថាចិនមិនយកកម្ពុជា ជារដ្ឋមួយក្រោមឥទ្ធិពលរបស់ខ្លួនឡើយ។ សម្ដេចបន្តថា ចិនក៏មិនចង់ឃើញប្រទេសដទៃជ្រៀតជ្រែកផ្ទៃក្នុងចិន មកបំបែកបំបាក់ ខេត្តរបស់ចិនដែរ។ យ៉ាងណា លោកសមរង្ស៊ីប្រធានស្ដីទីនៃអតីតគណបក្សសង្រ្គោះជាតិ កាលពីថ្មីៗនេះ បានព្រមានថា នៅពេលនេះ កម្ពុជាកំពុងធ្លាក់ក្នុងស្ថានភាពអាណានិគមបែបថ្មីរបស់ចិនហើយ។
លោកនួនបូរិន ជូនសេចក្ដីរាយការណ៍៖
សម្ដេចហ៊ុនសែននៅថ្ងៃសុក្រទី១ មិនា នេះ បានប្រកាសថា កម្ពុជាមិនស្ថិតក្រោមការត្រួតត្រារបស់ចិន ហើយចិនក៏មិនចង់ត្រួតត្រាប្រទេសណាមួយនោះដែរ។
សម្ដេចបញ្ជាក់ថា គោលនយោបាយការបរទេស កម្ពុជា និង ចិន មានចរន្ដពីរត្រូវរ៉ូវគ្នា។
ដោយលើកឡើងអំពីសមិទ្ធផលមួយចំនួនពីការជួយ អភិវឌ្ឍន៍ ក្រោមគំរោងជំនួយរបស់ចិន សម្ដេចហ៊ុនសែន មើលទៅ និយាយការពារចិនដោយជំទាស់នូវអ្វីដែលមជ្ឈដ្ឋានខ្លះបារម្ភថាចិន ជាប្រទេសវាតទីនិយម គឺមិនមែនដូច្នេះទេ។ សម្ដេចថា ដែនដីកោះតៃវ៉ាន់ឬទីបេ ខេត្ត ជីងជាំងក្ដី ក៏ចិន មិនចង់ឱមានការបំបែករដ្ឋដែរ។
ការថ្លែងរបស់នាយករដ្ឋមន្ត្រីកម្ពុជាធ្វើឡើងនៅចំពោះមុខប្រជាពលរដ្ឋ បុគ្គលិកមន្ទីរពេទ្យរាប់ពាន់នាក់ ក៏ដូចជាកឯកអគ្គរដ្ឋទូតចិន លោក វ៉ាង វិនធាន ដែលមានវត្តមាននៅក្នុងពិធីសម្ពោធការដ្ឋានសាងសង់មន្ទីរពេទ្យ “មិត្តភាពកម្ពុជា-ចិន ត្បូងឃ្មុំ” នៅព្រឹកថ្ងៃសុក្រនេះ។
ចំពោះ បញ្ហាចិន និង កម្ពុជា លោកសមរង្ស៊ី ប្រធានស្ដីទីនៃអតីតគណបក្សសង្រ្គោះជាតិ តែងតែនិយាយថា កម្ពុជាបានធ្លាក់ក្រោមអាណានិគមថ្មីរបស់ចិនទៅហើយ ដែលលោកថា ជនជាតិចិនមកនៅខេត្តព្រះសីហនុ ជាច្រើនពាន់នាក់នេះ គឺប្រៀបបានជាការធ្វើនិគមជនមួយនៅកម្ពុជា ដើម្បីតកូនតទៅ។ លោកបន្តថា កម្ពុជា ធ្លាក់ក្រោមឥទិ្ធពលចិន នៅពេលនេះ ទាំងសេដ្ឋកិច្ចនិងនយោបាយ។ ជាមួយគ្នានេះ លោកសមរង្ស៊ីក៏បានចេញលិខិតព្រមានអ្នកវិនិយោគចិនអោយដឹង ថានៅថ្ងៃក្រោយពលរដ្ឋកម្ពុជាអាចនឹងងើបឡើងប្រឆាំងឥទ្ធិពលចិននៅកម្ពុជា។
យ៉ាងណា អ្នកនាំពាក្យរាជរដ្ឋាភិបាលលោកផៃស៊ីផាន បានហៅការព្រមានរបស់លោកសមរង្ស៊ីថា មិនមានតម្លៃនិងឥទ្ធិពលលើការដឹកនាំរបស់សម្ដេចនាយករដ្ឋមន្ត្រីឡើយ។ លោកថានាសម័យទំនើបនេះ គ្មានប្រទេសណាមួយល្ងង់ឱ្យខ្លួនក្រោមអាណានិគមប្រទេសមួយឡើយ៕
