ភ្នំពេញ៖ អង្គការសមាគមខ្មែរកម្ពុជាក្រោម និងអង្គការការពារសិទ្ធិជនជាតិភាគតិចបាន សម្ដែងការខកចិត្ត ដោយសារតែក្រសួងមហាផ្ទៃបដិសេធមិនទទួលសំណើ របស់អង្គការទាំង២នេះដែលសុំកាន់អត្តសញ្ញាណប័ណ្ណ។
លោក សឺន ជុំសុធន ប្រធានមន្ដ្រីស៊ើបអង្កេតផ្នែកសិទ្ធិមនុស្សនិងដីធ្លីនៃសមាគមខ្មែរកម្ពុជាក្រោម ដើម្បីសិទ្ធិមនុស្សនិងអភិវឌ្ឍន៍ បានប្រាប់វិទ្យុស្ដ្រីនៅថ្ងៃអង្គារទី១២កក្ដដានេះថា ការស្នើសុំរបស់ពួកគេត្រូវបរាជ័យ ព្រោះក្រសួងមហាផ្ទៃធ្វើការបដិសេធមិនទទួលការស្នើសុំនេះ។ លោកថាការពិតក្រសួងមានសមត្ថកិច្ច រឿងនេះ។ កញ្ញា ជុំ ជោគជាតា រាយការណ៍ព័ត៌មានលម្អិត៖
លោក សឺន ជុំសុធន មានប្រសាសន៍ថាសមាគមខ្មែរកម្ពុជាក្រោមនិងអង្គការការពារសិទ្ធិជនជាតិភាគតិច បានដាក់លិខិតមួយទៅក្រសួងមហាផ្ទៃ ដើម្បីសុំធ្វើអត្ដសញ្ញាណប័ណ្ណ ឱ្យពលរដ្ឋខ្មែរក្រោម ដែលរស់នៅខេត្តកំពង់ឆ្នាំង និងខេត្តសៀមរាប ប៉ុន្ដែការស្នើសុំនេះ ត្រូវបានបដិសេធ។
លោក សឺន ជុំសុធន ៖«លទ្ធផលការដាក់ស្នើរសុំរបស់សមាគមខ្មែរកម្ពុជាក្រោម ក្រសួងមហាផ្ទៃបានបដិសេធ ដោយមិនទទួលយកលិខិតស្នើរសុំរបស់ពួកយើង លិខិតក៏គេមិនបានទទួល ហើយការស្នើរចារទៅលើលិខិតហ្នឹង ក៏គេមិនបានចារដែរ ហើយគេ(ក្រសួងមហាផ្ទៃ) បែរជាច្រានអោយយើងហ្នឹង និងណែនាំអោយយើងទៅដាក់នៅអគ្គនាយកដ្ឋាន អត្ដសញ្ញាណកម្មវិញ»។
អង្គការការពារសិទ្ធិជនជាតិភាគតិច និងសមាគមខ្មែរកម្ពុជាក្រោមដើម្បីសិទ្ធិមនុស្ស និងអភិវឌ្ឍន៍ បានដាក់លិខិតស្នើសុំនេះទៅរដ្ឋមន្ដ្រីក្រសួងមហាផ្ទៃ កាលពីថ្ងៃម្សិលមិញ។
ក្នុងលិខិត អង្គការទាំងពីរបានរកឃើញថា បច្ចុប្បន្នខ្មែរកម្ពុជាក្រោម នៅក្នុងមូលដ្ឋានមួយចំនួន នៃព្រះរាជាណាចក្រកម្ពុជា គឺត្រូវបានអាជ្ញាធរបដិសេធ ពុំព្រមធ្វើអត្ដសញ្ញាណប័ណ្ណសញ្ជាតិខ្មែរ ជូនពួកគាត់នោះឡើយ ទោះបីជាពួកគាត់ទាំងនោះ មួយចំនួនមានអត្ដសញ្ញាណប័ណ្ណគំរូចាស់ ហួសសុពលភាពហើយក៏ដោយ។
បើតាមការលើកឡើងរបស់ លោក សឺន ជុំសុធន មូលហេតុដែលអាជ្ញាធរដែនដីពុំព្រមធ្វើអត្ដសញ្ញាណប័ណ្ណ សញ្ជាតិខ្មែរគឺដោយសារអាជ្ញាធរដែនដីមួយចំនួន ចាំបាច់សុំបញ្ជា និងការយល់ព្រម ពីក្រសួងមហាផ្ទៃជាមុន មុននឹងសម្រេចធ្វើអត្ដសញ្ញាណប័ណ្ណនេះ។
លោក សឺន ជុំសុធន ថា ការបដិសេធម្ដងហើយម្ដងទៀតពីអាជ្ញាធរដែនដី ក៏ដូចជាពីក្រសួងមហាផ្ទៃ ធ្វើអោយពួកគាត់យល់ថា រដ្ឋាភិបាលកម្ពុជាកំពុងរើសអើងពូសាសន៍ និងមិនគោរពតាមព្រះរាជបន្ទូលរបស់ព្រះបាទនរោតម្ដសីហនុ ដែលធ្លាប់បានលើកឡើង។
«អាជ្ញាធរទាំងនោះ មិនបានស្ដាប់ នូវ (ព្រះរាជបន្ទូល)អតីតព្រះមហាក្សត្រ ព្រះបាទនរោត្ដមសីហនុ កាលព្រះអង្គនៅមានព្រះជន្ម ព្រះអង្គបានទៅទីក្រុងប៉េកាំង ដោយព្រះអង្គបាន…»។
ជុំវិញរឿងនេះ វិទ្យុស្ដ្រីមិនអាចសុំការឆ្លើយតបពីអ្នកនាំពាក្យក្រសួងមហាផ្ទៃ និងអ្នកនាំពាក្យអគ្គស្នងការនគរបាលជាតិបានទេ នៅថ្ងៃនេះ ដោយទូរស័ព្ទចូលពុំមានអ្នកលើក។
យ៉ាងនេះក្ដី វិទ្យុស្ត្រីក៏មិនអាចសុំការឆ្លើយតបពី អ្នកនាំពាក្យ គណបក្សប្រជាជនកម្ពុជា ឬអ្នកនាំពាក្យរដ្ឋាភិបាល ជុំវិញ ការចោទថាមានការរើសអើងជាតិសាសន៍ ដែលលើកឡើងដោយ លោក សឺន ជុំសុធន ប្រធានមន្ដ្រីស៊ើបអង្កេតផ្នែកសិទ្ធិមនុស្ស និងដីធ្លីនៃសមាគមខ្មែរកម្ពុជាក្រោម ដើម្បីសិទ្ធិមនុស្សនិងអភិវឌ្ឍន៍។
បើតាមលោក សឺន ជុំសុធន ពលរដ្ឋ ដែលបានដាក់ពាក្យបណ្ដឹងមកកាន់អង្គការការពារសិទ្ធិជនជាតិភាគតិច និងសមាគមខ្មែរកម្ពុជាក្រោម ដែលបានស្នើសុំទៅក្រសួងមហាផ្ទៃ ធ្វើអត្ដសញ្ញាណប័ណ្ណ គឺពលរដ្ឋនីមួយៗនៅតាមឃុំក្នុងខេត្តសៀមរាប និងខេត្តកំពង់ឆ្នាំងមានជាង១៥គ្រួសារ។
តាមរដ្ឋធម្មនុញ្ញ ពលរដ្ឋខ្មែរក្រោមក៏ត្រូវបានធានាដោយរដ្ឋធម្មនុញ្ញ ថាជាពលរដ្ឋខ្មែរផងដែរ៕
