ភ្នំពេញ៖ ក្រោយពីមានការព្រមានរបស់លោកនាយករដ្ឋមន្ត្រីហ៊ុន សែន ជាថ្មីឲុ្យចាប់ខ្លួនចំពោះជនណាដែលនិយាយថា រដ្ឋាភិបាលប្រើប្រាស់ផែនទីក្លែងក្លាយ ក្រុមអ្នកវិភាគនយោបាយ និងសង្គមស៊ីវិល បានបង្ហាញការសោកស្តាយចំពោះការមិនឯកភាពជាតិ ជុំវិញបញ្ហាព្រំដែនកម្ពុជា វៀតណាម។
អ្នកវិភាគនយោបាយ និងក្រុមអង្គការសង្គមស៊ីវិល បានបង្ហាញការព្រួយបារម្ភ ពេលកម្ពុជានៅមានភាពចម្រូងចម្រាសលើបញ្ហាព្រំដែន ព្រួយបារម្ភព្រោះថា ការផ្ទៀងផ្ទាត់ផែនទី មិនបានធ្វើឲ្យមានការរួបរួមជាតិ តែបែរជាបែកបាក់គ្នាទៅវិញ ។
ការលើកឡើងនេះ គឺបន្ទាប់ពីលោកនាយករដ្ឋមន្ត្រីហ៊ុន សែន បានព្រមានជាថ្មីម្តងទៀត កាលពីថ្ងៃទី២៦ ខែសីហា ឆ្នាំ២០១៥ នេះ ឲ្យចាប់ខ្លួនអ្នកដែលចោទប្រកាន់ថា រដ្ឋាភិបាលប្រើប្រាស់ផែនទីចោរ ឬផែនទីក្លែងក្លាយ “អាឡូវសាកហ៊ានបន្តទៀតមើល អ្នកណាក៏ដោយ ហ៊ានប្រើប្រាស់នូវពាក្យថា ផែនទីចោរ ឬផែនទីក្លែងក្លាយ ត្រូវប្រឈមនឹងផ្លូវច្បាប់ជាបន្ទាន់ អត់មានការលើកលែង ហើយអត់រង់ចាំពេលវេលា”។
លោក រស់ រ៉ាវុធ សាស្ត្រាចារ្យផ្នែកវិទ្យាសាស្ត្រនយោបាយ បានលើកឡើងកង្វល់របស់លោកថា ការព្រមាននេះ វាបានបង្ហាញពីទិដ្ឋភាពមិនល្អចំពោះប្រទេសជាតិ។ លោកលើកយកទិដ្ឋភាពបីមកឆ្លុះបញ្ចាំង។ ទិដ្ឋភាពទី១ បង្ហាញពីការអនុវត្តច្បាប់ចំពោះការប្រើប្រាស់សម្តីមិនសមរម្យណាមួយ ទិដ្ឋភាពទី២ បង្ហាញពីការប្រើប្រាស់អំណាច និងទិដ្ឋភាពទី៣ បង្ហាញពីការមិនទុកចិត្តគ្នា បន្ទាប់ពីការផ្ទៀងផ្ទាត់ផែនទី។ លោកបានបន្ថែមថា គ្រាន់តែការផ្ទៀងផ្ទាត់ផែនទី កម្ពុជាមិនឯកភាព ចុះបើយកផែនទីទៅផ្ទៀងផ្ទាត់នឹងផ្ទៃដី តើកម្ពុជាមានការឯកភាពគ្នាយ៉ាងដូចម្តេច? “យើងពិនិត្យឃើញថា គ្រាន់តែផ្ទៀងផ្ទាត់ផែទី យើងមានភាពចម្រូងចម្រាសមិនឯកភាពគ្នាទៅហើយ ចុះទម្រាំតែយកផែនទីទៅផ្ទៀងផ្ទាត់លើផែនដី ថាតើយើងមានភាពចម្រូសចម្រាសគ្នាយ៉ាងម៉េច យើងឯកភាពគ្នាយ៉ាងម៉េចដើម្បីដោះស្រាយជាមួយប្រទេសជិតខាងយើង ”។
ទាក់ទងនឹងបញ្ហានេះដែរ អ្នកវិភាគនយោបាយ និងជាប្រធានអង្គការវេទិការអនាគត លោកអ៊ូ វីរៈ បានថ្លែងថា អ្វីដែលរដ្ឋាភិបាលបានធ្វើកន្លងមក ទាក់ទងនឹងបញ្ហាផ្ទៀងផ្ទាត់ផែទី បានធ្វើឲ្យពលរដ្ឋមានទំនុកចិត្ត លើការប្រើប្រាស់ផែនទី ដើម្បីបោះបង្គោលព្រំដែនកម្ពុជា វៀតណាម។ លោកបន្ថែមថា រដ្ឋាភិបាលគួរតែបន្តបើកទូលាយចំពោះការចូលរួមពីគ្រប់ភាគីពាក់ព័ន្ធ មិនគួរព្រមានឲ្យមានការចាប់ខ្លួន ចំពោះអ្នកដែលនិយាយថា រដ្ឋាភិបាលប្រើប្រាស់ផែនទីក្លែងក្លាយនោះទេ។ លោកថា បើរដ្ឋាភិបាលចាប់ខ្លួនសកម្មជន ឬតំណាងរាស្ត្រគណបក្សប្រឆាំងនោះ គឺធ្វើឲ្យប្រជាជនកាន់តែសង្ស័យចំពោះ ផែនទីដែលរដ្ឋាភិបាលកំពុងប្រើប្រាស់ “បើសិនជាខ្ញុំជារដ្ឋាភិបាល ខ្ញុំឲ្យលោកអ៊ុំ សំអាន យកផែនទីទាំង២៦ផ្ទាំងដែលទើបរកឃើញមកផ្ទៀងផ្ទាត់ជាចំហទៀត ដើម្បីបង្ហាញជាសាធារណជន ហើយបើសិនដូចគ្នាមែនទែន ខ្ញុំមើលទៅ ក្រុមលោកអ៊ុំ សំអាន នឹងអាម៉ាស់ចំពោះមុខសារធារណជនជាង ប៉ុន្តែបើចាប់ខ្លួនគាត់ ឬក៏មានការគំរាមកំហែងណាមួយផ្សេង គឺប្រជាពលរដ្ឋ ស្វ័យប្រវត្តិជឿលោក អ៊ុំ សំអានហ្មង ជឿទ្រឹស្តីថា រដ្ឋាភិបាលមានអីលាក់ អាហ្នឹងជាចិត្តសាស្ត្ររបស់មនុស្ស” ។
គួរម្លឹកថា ការព្រមានរបស់លោកនាយករដ្ឋមន្ត្រីហ៊ុន សែន ឲ្យចាប់ខ្លួនអ្នកណាដែលនិយាយថា រដ្ឋាភិបាលប្រើប្រាស់ផែនទីក្លែងក្លាយ គឺធ្វើឡើងផ្ទួនគ្នាក្នុងចន្លោះពេលមិនដល់មួយសប្ដាហ៍ផង ក្នុងនោះការព្រមានលើកទី១ គឺនៅថ្ងៃទី២១ សីហា ឆ្នាំ២០១៥ និងការព្រមានលើកទី២ធ្វើនៅថ្ងៃទី២៦ សីហា ឆ្នាំ២០១៥ កន្លងទៅថ្មីៗនេះ ៕