អង្គការសង្គមស៊ីវិល បានជំរុញឱ្យរដ្ឋាភិបាលអនុវត្តច្បាប់ស្តីពីការត្រួតពិនិត្យផលិតផលថ្នាំជក់ ឱ្យកាន់តែមានប្រសិទ្ធភាពខ្ពស់ ដើម្បីទប់ស្កាត់ផលប៉ះពាល់ដល់អ្នកប្រើប្រាស់ និងអ្នកស្រូបផ្សែងពីអ្នកជក់បារី។
លោក ធូ វិរៈ រាយការណ៍ព័ត៌មាននេះ៖
«ការត្រួតពិនិត្យផលិតផលថ្នាំជក់» ដល់ប្រព័ន្ធផ្សព្វផ្សាយព័ត៌មាននៅទីស្តីការក្រសួងព័ត៌មាន នាព្រឹកថ្ងៃព្រហស្បតិ៍នេះ។
លោកវេជ្ជបណ្ឌិត យ៉ិល ដារ៉ាវុធ បានឱ្យដឹងទៀតថា បារីអាចធ្វើឲ្យអ្នកជក់មានជម្ងឺមហារីកគ្រប់ប្រភេទ ដូចជាមហារីកសួត និងមហារីកមាត់ ជាដើម។ លោកបន្តថា ជាទូទៅអ្នកជក់បារីចាប់ពី ២ កញ្ចប់ក្នុងមួយថ្ងៃ រយៈពេល ១០ ឆ្នាំ អ្នកជក់នឹងអាចប៉ះពាល់សួត ជាពិសេសបង្កឲ្យមានជំងឺមហារីក និងត្បៀតសសៃឈាមក្នុងខួរក្បាល។
លោកវេជ្ជបណ្ឌិត មានប្រសាសន៍ផងបន្ថែមថា៖ «ចំពោះស្រី្តស្រូបផ្សែងបារីពីប្តី ឬស្ត្រីជក់បារីបង្ករឲ្យប៉ះពាល់មាត់ស្បូន សម្រាលកូនមិនគ្រប់គីឡូ អត់ប្រាជ្ញា និងរលាក់សួតទារក»។
នាយកប្រតិបត្តិអង្គការចលនា ដើម្បីសុខភាពកម្ពុជា លោកវេជ្ជបណ្ឌិត មុំ គង់បានលើកឡើងដែរថា បន្ទាប់ពីច្បាប់ស្តីពីការត្រួតពិនិត្យផលិតផលថ្នាំជក់ ចាប់ផ្តើមអនុវត្តន៍កាលពីចុងឆ្នាំ២០១៥ កន្លងមក លោក សង្កេតឃើញថា ការផ្សព្វផ្សាយផលលិតផលថ្នាំជក់ ត្រូវបានកាត់បន្ថយច្រើន។ ប៉ុន្តែនៅតែមានការផ្សព្វផ្សាយមួយចំនួន នៅតាមផ្សារទំនើប ផ្សារម៉ាត និងកន្លែងលក់គ្រឿងទេសជាដើម។
លោក មុំ គង់បានបានឲ្យដឹងទៀតថា៖ «ដើម្បីការពារសុខភាពប្រជាពលរដ្ឋឲ្រមានសុខភាពល្អ រាជរដ្ឋាភិបាលត្រូវតែ ហាមឃាត់ការផ្សព្វផ្សាយផលិតផលថ្នាំជក់ បង្កើតគោលនយោបាយការពារអ្នកមិនជក់បារី ពិសេស ស្ត្រី និងកុមារ ដែលស្រូបផ្សែងបារីពីគេ និងដាក់បំរាមសុខភាពជារូបភាពធំៗលើកញ្ចប់ផលិតផលថ្នាំជក់។លើសពីនេះទៀត រាជរដ្ឋាភិបាល ត្រូវតែដំឡើងពន្ធការនាំចូលផលិតផលថ្នាំជក់ ឲ្យកាន់តែខ្ពស់ ទើបអាចកាត់បន្ថយអត្រានៃការនាំផលិតផលថ្នាំជក់នេះ មានប្រសិទ្ធភាព»។
ថ្លែងនៅក្នុងសិក្ខាសាលានេះ រដ្ឋមន្ត្រីក្រសួងព័ត៌មាន លោក ខៀវ កាញ្ញារិទ្ធ បានព្រមាននឹងចាត់វិធានការតាមផ្លូវច្បាប់ ចំពោះស្ថានីយវិទ្យុ ទូរទស្សន៍ កាសែត គ្រប់ស្ថាប័នទាំងអស់ មិនអនុញ្ញាតឲ្យផ្សាយ ផលិតផលថ្នាំជក់នោះទេ។ លោក រដ្ឋមន្ត្រីក្រសួងព័ត៌មានរូបនេះ បានអំពាវនាវដល់អ្នកសារព័ត៌មានទាំងអស់ជួយផ្សាព្វផ្សាយឲ្យបានទូលំទូលាយពីផលប៉ះពាល់នៃផលិតផលថ្នាំជក់។
បើតាម លោកវេជ្ជបណ្ឌិត យ៉ិល ដារ៉ាវុធ បញ្ជាក់បន្ថែមថា មានអ្នកស្លាប់ដោយសារការជក់បារីក្នុង១ឆ្នាំៗ ប្រមាណ៦លាននាក់ និងអ្នកមិនចេះជក់ តែស្រូបផ្សែងបារីពីគេ មានអត្រាស្លាប់រហូតដល់ទៅ ៦សែននាក់។ សម្រាប់តែប្រទេសកម្ពុជា មានអ្នកស្លាប់ដោយការជក់បារីប្រមាណ១ម៉ឺននាក់ក្នុងមួយឆ្នាំៗ ក្នុងនោះបុរសបាត់បង់ជិតច្រើនជាងមនុស្សស្ត្រី ដោយមិនទាន់រាប់បញ្ចូលអ្នកស្លាប់ដោយសារស្រូបផ្សែងបារីពីគេនៅឡើយ៕
