ភ្នំពេញ ៖ ក្រសួងធនធានទឹក តាមរយៈសេចក្ដីជូនដំណឹងកាលពីថ្ងៃទី២០ តុលា បានបញ្ជាក់ថា មានវិសម្ពាធ TD មួយ បានកើតឡើងនៅឈួងសមុទ្រថៃ ហើយជះឥទ្ធិពលមកកម្ពុជា បង្កឲ្យរាជធានីខេត្ដស្ទើរទូទាំងប្រទេសមានភ្លៀងក្នុងបរិមាណពីបង្គួរទៅច្រើន។ លើសពីនេះ វិសម្ពាធនេះនឹងបង្កឲ្យទឹកសមុទ្រកម្ពុជា ករកើតជារលកខ្ពស់ៗ ចន្លោះថ្ងៃទី២០ និង ២១ ខែតុលា។
ក្រសួងធនធានទឹកបញ្ជាក់ថា ខេត្ដជាប់តំបន់មាត់សមុទ្រ នឹងមានផ្ទៃមេឃអាប់អួ ហើយនឹងមានភ្លៀងធ្លាក់ខ្លាំង រួមជាមួយខ្យល់បក់មានល្បឿនពី ១៧ ទៅ ១៩ ម៉ែត្រក្នុងមួយវិនាទី។ ដោយឡែកតំបន់ទំនាបកណ្ដាល ពិសេសខេត្ដដែលស្ថិតនៅតាមបណ្ដោយព្រំដែនកម្ពុជា វៀតណាម អាចនឹងមានភ្លៀងធ្លាក់ពីបង្គួរទៅច្រើន។ ចំណែកតំបន់ខ្ពង់រាប ភ្លៀងនឹងធ្លាក់ក្នុងកម្រិតពីតិចទៅមធ្យម។
ទន្ទឹមនិងនេះក្រសួងធនធានទឹក អំពាវនាវដល់ប្រជានេសាទ និងអ្នកធ្វើដំណើរតាមសមុទ្រទាំងអស់ ក្នុងអំឡុងប៉ុន្មានថ្ងៃនេះ ត្រូវបង្កើនការប្រុងប្រយ័ត្នឲ្យបានខ្ពស់ ដើម្បីបញ្ចៀសនូវគ្រោះថ្នាក់ផ្សេងៗ៕