នៅថ្ងៃទី ២៥កក្កដា នេះលោកបណ្ឌិត កែម ឡី ដែលខ្មាន់កាំភ្លើងបាញ់សម្លាប់លោក កាលពីថ្ងៃទី១០កក្កដា បានលាយើងជារៀងរហូតហើយ។ រាងកាយរបស់លោក ត្រូវបានបញ្ចុះ ក្នុងព្រះធរណីដែលជាការប្រាប់ថា យើងលែងបានឃើញមុខលោកទៀតហើយ។ ស្ថិតក្នុងស្ថានភាពក្រៀមក្រំ ទុក្ខសោកយ៉ាងខ្លាំងហើយនោះអ្នកអានវិយោគកថា កាន់តែធ្វើឱ្យ រំជួលថែមទៀត។ វិយោគកថាបានបញ្ជាក់ថាលោកបណ្ឌិត កែម ឡី គឺជាធនធានមនុស្សខ្មែរដ៏កម្រជា អ្នកចេះដឹងម្នាក់ដ៏ក្លាហាន ហ៊ានបូជាជីវិតដើម្បីសង្គម និងគ្រួសារ។
អ្នកអាន វិយោគកថាកាន់តែធ្វើអោយក្ដុកក្ដួលទៀតនោះ ដោយពោលពាកក្យថាលោកបណ្ឌិតលាយើង រហូតហើយ គឺគ្មានថ្ងៃវិលវិញឡើយ។ សូមស្ដាប់ កញ្ញា ជុំ ជោកជាតា រាយការណ៍បន្ត៖
វិយោគកថា៖«លោកបណ្ឌិត កែម ឡី ជាទីស្រឡាញ់ និងគោរពនៃយើងទាំងអស់គ្នា យើងខ្ញុំជាភរិយា បុត្រា ម្ដាយ បងប្អូនប្រុសស្រី មិត្តភក្ដិនៃប្រជាជនខ្មែរក្នុងនិងក្រៅប្រទេសជាច្រើនឥតគណនា ពិតជាមានការសោកស្ដាយ និងសោកសៅយ៉ាងខ្លាំងចំពោះការបាត់បង់លោកបណ្ឌិត»។
នេះជាវិយោគកថា ដែលសូត្ររៀបរាប់ដោយ តំណាងយុវជនម្នាក់ របស់លោកបណ្ឌិត កែម ឡី ក្នុងពិធីបញ្ចុះសពលោកនៅថ្ងៃនេះ។
ក្នុងវិយោគកថា រៀបរាប់រឿងរ៉ាវរបស់លោក បណ្ឌិត កែម ឡី ដែលមានរយៈពេលជាង៥នាទីនេះ បានបង្ហាញ ពីទុក្ខសោក និងភាពស្ដាយស្រណោះយ៉ាងក្រៀមក្រំ របស់ក្រុមយុវជន ដែលមានលើលោកបណ្ឌិត កែម ឡី។ ជាពិសេសវិយោគកថានេះ បាននិយាយពីវិរៈភាពរបស់លោកដែលជួយបណ្ដុះបណ្ដាល ធនធានយុវជនឱ្យចេះស្រឡាញ់ជាតិ កសាងជាតិ ទៅថ្ងៃអនាគត។ វិយោគកថាបានបន្ដដូចនេះទៀតថា៖«ពេលវេលាតិចតួចណាស់ ដែលលោកបណ្ឌិតបានរស់នៅ និងជួយគាំទ្រ ជ្រោមជ្រែងយើង បន្ទាប់ពីចាប់កំណើតរបស់លោកបណ្ឌិត កាលពីថ្ងៃទី១៩ ខែតុលា ឆ្នាំ១៩៧០ រហូតដល់ថ្ងៃទី១០ ខែកក្កដា ឆ្នាំ២០១៦ ដែលជាថ្ងៃបញ្ចប់ជីវិតលោកបណ្ឌិត ដោយឃាតករយង់ឃ្នង និងបក្សពួកបាញ់សម្លាប់ »។
ក្នុងវិយោគកថា សូត្រដោយតំណាងយុវជននេះក៏ បានបង្ហាញយ៉ាងច្បាស់ពីទឹកចិត្តរបស់ពួកគេ ដែលមានចំពោះលោកបណ្ឌិត បានធ្វើអោយពលរដ្ឋខ្មែរនឹកឃើញទាំងអួលដើមក នឹកដល់ពាក្យសម្ដី ដែលលោកបណ្ឌិតធ្លាប់និយាយ ធ្វើអោយពលរដ្ឋខ្មែរយល់កាន់តែច្បាស់ ពីការលាចាក របស់លោក។
វិយោគថាបានរៀបរាប់ ដូចនេះទៀត៖«លោកបណ្ឌិត ដឹងខ្លួនឯងថា នឹងមានគ្រោះថ្នាក់ដល់ជីវិត ប៉ុន្ដែលោកបណ្ឌិតមិនរាថយឡើយ លោកបណ្ឌិត បានបង្រៀនយើងអោយកាន់តែយល់ច្បាស់ពីសេរីភាព ហើយការបង្រៀនទាំងអស់នោះ បានធ្វើជាគំរូដោយផ្ទាល់ខ្លួនលោក មិនចេះតែនិយាយផ្ទាល់មាត់នោះទេ ប៉ុន្ដែបានធ្វើដោយដង្ហើម និងភាពជាគំរូនៃសេចក្ដីក្លាហាន ដែលមានបុព្វបុរសខ្មែរខ្លះធ្លាប់បានធ្វើមកហើយ ដូចជាលោកតាឃ្លាំងមឿន លោកឧញ៉ាក្រឡាហោមគង់ លោកតា សឿន គុយ លោក ជា វិជ្ជា លោក ឈុត វុទ្ធី កេ្ដរិ៍ឈ្មោះរបស់លោកបណ្ឌិត អណ្ដែតខ្ពស់ក្នុងចំណោមវីរះជន អ្នកស្នេហាជាតិទាំអស់នោះ វីរះបណ្ឌិត កែម ឡី ជាទីស្រឡាញ់ មនុស្សគេភ័យខ្លាចណាស់សេចក្ដីស្លាប់ ថ្វីត្បិតតែដឹងថាគេចមិនផុតក៏ដោយ ស្អែករួចបន្ដដំណើរទៅមុខ»។
លោកបណ្ឌិតបានលាចាកចេញពីបុត្រ ភរិយា មាតុភូមិ និងយើងទាំងអស់គ្នានោះ ពិតជាបានបែកគ្នារៀងរហូតហើយ ពេលវេលារំកិលទៅលឿនណាស់ ក្នុងពេលដែលលោកបណ្ឌិតរស់នៅជាមួយយើង តែជាការរស់នៅជាមួយដែលពោរពេញដោយក្ដីទុកចិត្ត កក់ក្ដៅ ក្ដីស្រឡាញ់ និងការគោរពគ្នាទៅវិញទៅមក សន្ដានចិត្តគិតប្រយោជន៍រួម គិតឧត្ដមប្រយោជន៍ជាតិជាធំ របស់លោកបណ្ឌិត ជាភាពគំរូដែលខ្មែរគ្រប់មជ្ឈដ្ឋាន និងគ្រប់ជំនាន់ ធ្វើជាព្រេងនិស្ស័យ និងដំណើរឈានទៅរកសេរីភាព និងអភិវឌ្ឍន៍។
ខាងក្រោមនេះ គឺជាការអានវិយោគថាដោយយុវជនម្នាក់នៅពេល រំកិលសពលោកបណ្ឌិត ដាក់ចូលក្នុងមឈូសទៅ ក្នុងព្រះធរណី។
វិយោគកថាដែលចូលមកបញ្ចប់នេះគឺកាន់តែធ្វើឱ្យរន្ធត់ចិត្តទៀតនោះ គឺបានពោលពាក្យថា សូមឧទិសកុសល ជូនលោកបណ្ឌិតឱ្យទៅកាន់ ឋានបរមសុខ និងទទួលផលបុណ្យមកវិញ ។ សូមលោកបណ្ឌិត កែម ឡី សម្រាន្តលង់លក់ចុះពួកយើងលាលោកហើយ។
