ភ្នំពេញ៖ លោក អ៊ុំ សំអាន តំណាងរាស្ត្រគណបក្សសង្គ្រោះជាតិ ដែលជាប់ចោទករណីរឿងព្រំដែននិងឯកសារផែនទី ជាមួយប្រទេសវៀតណាម បានចោទសម្ដេច ហ៊ុន សែន ថាបានធ្វើរដ្ឋប្រហារ រដ្ឋធម្មនុញ្ញ និងជាមេដឹកនាំផ្ដាច់ការ។
ការថ្លែងរបស់ លោក បានធ្វើឡើងនៅ ពេលសមត្ថកិច្ច នាំលោកចូលសវនាការ នៅថ្ងៃនេះ នៅតុលាការកំពូល ករណីលោកសុំនៅក្រៅឃុំ។
នៅពេលជាមួយគ្នានេះ តំណាងរាស្ត្របក្សប្រឆាំង ដែលសកម្មរឿងព្រំដែនរូបនេះ ក៏បាន ទទូចឱ្យពលរដ្ឋខ្មែរ ងើបឡើង ផ្លាស់ប្ដូរ មេដឹកនាំប្រទេស ដែលលោក ថា ផ្ដាច់ការ និង មិនបំរើ ផលប្រយោជន៍ខ្មែរ បច្ចុប្បន្នតាមរយៈ ការបោះឆ្នោត ខាងមុខនេះ។
យ៉ាងណា ក៏ដោយ វិទ្យុស្ត្រីនៅមិនទាន់ សុំការឆ្លើយតបពី អ្នកនាំពាក្យ រដ្ឋាភិបាល និងអ្នកនាំពាក្យបក្សប្រជាជនកម្ពុជា បាននៅឡើយទេ នៅព្រឹកថ្ងៃពុធនេះ។
លោក អ៊ុំ សំអាន ត្រូវបានសមត្ថកិច្ចចាប់ខ្លួននៅ ថ្ងៃទី១០មេសានៅកណ្ដាលយប់ពេលលោកចុះពីលើ យន្តហោះ មកពីសហរដ្ឋអាមេរិក។ លោកត្រូវបានចោទ ករណីក្លែងឯកសារផែនទី និង ញុះញុង បង្កចលាចល សង្គម ដោយសារលោកបង្ហោះផែនទី ហើយចោទរដ្ឋាភិបាល ប្រើផែនទី បោះបង្គោលព្រំដែនជាមួយ វៀតណាមថាជាផែនទីក្លែងក្លាយ៕
|