ភ្នំពេញ៖ នគរបាលចរាចរណ៍នឹងធ្វើការពិន័យយ៉ាងម៉ឺងម៉ាត់បំផុត ចំពោះអ្នកបំពានច្បាប់ចរាចរណ៍ផ្លូវគោក ចាប់ពីថ្ងៃទី១៥ មីនា តទៅ។ ការពិន័យយ៉ាងម៉ឺងម៉ាត់ក្នុងការអនុវត្តច្បាប់ចរាចរណ៍នេះ ធ្វើឡើងក្នុងគោលបំណង បង្កើនសកម្មភាពត្រួតពិនិត្យការអនុវត្តច្បាប់ តាមរយៈការផាកពិន័យយ៉ាងម៉ឺងម៉ាត់បំផុត ព្រមទាំងអំពាវនាវដល់ពលរដ្ឋទាំងអស់ ត្រូវបង្កើនស្មារតីគោរពច្បាប់ចរាចរទាំងអស់គ្នា។
សេចក្តីជូនដំណឹងរបស់គណៈកម្មាធិការជាតិសុវត្ថិភាពចរាចរណ៍ផ្លូវគោកកាលពីថ្ងៃទី ១១ ខែមីនា កន្លងទៅ បានឱ្យដឹងថា ចាប់ពីថ្ងៃទី១៥ ខែមីនា តទៅ មន្ត្រីចរាចរណ៍ផ្លូវគោកនឹងបង្កើនសកម្មភាពត្រួតពិនិត្យការអនុវត្តច្បាប់បន្ថែមទៀត ដោយធ្វើការផាកពិន័យយ៉ាងម៉ឺងម៉ាត់បំផុត។ ការផាកពិន័យនេះនឹងធ្វើចំពោះអ្នកបើកបរមិនពាក់មួកសុវត្ថិភាព ការបើកបរលើសល្បឿនកំណត់ ការបើកបរក្រោមឥទ្ធិពលនៃជាតិស្រវឹង មិនគោរពសិទ្ធិអាទិភាព ការដឹកជញ្ជូនលើសចំណុះបង្កឱ្យធ្លាក់ ឬអូសសម្ភារៈលើផ្លូវបង្កើតធូលីដីហុយ ឬធ្វើឱ្យរំខានផ្សេងៗទៀតដល់សណ្តាប់ធ្នាប់សាធារណៈ ព្រមទាំងត្រួតពិនិត្យពិន័យលើលក្ខណៈបច្ចេកទេសយានយន្តជាដើម។
លោក ទី ឡុង អនុប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់នៃក្រសួងមហាផ្ទៃ មានប្រសាសន៍ជាមួយវិទ្យុស្ត្រីនៅថ្ងៃនេះថា ការផាកពិន័យយ៉ាងម៉ឺងម៉ាត់បំផុតរបស់នរគបាលចរាចរនេះ ធ្វើឡើងដើម្បីឱ្យការអនុវត្តន៍ច្បាប់ចរាចរណ៍ផ្លូវគោកមានប្រសិទ្ធភាព។ លោក ទី ឡុង បានបន្តទៀថា កន្លងទៅរដ្ឋាភិបាលបានពន្យារពេល អនុញ្ញាតិឱ្យពលរដ្ឋបំពេញបែបបទ ឬលិខិតស្នាមផ្សេងៗពាក់ព័ន្ធនឹងការប្រើប្រាស់មធ្យោបាយធ្វើដំណើរផ្ទាល់ខ្លួន។ ប៉ុន្តែចាប់ពីថ្ងៃទី១៥ ខែមីនាខាងមុខ ការរឹតបន្តឹងឱ្យប្រជាពលរដ្ឋគោរពច្បាប់ និងជំរុញឱ្យប្រជាពលរដ្ឋរួមអនុវត្តច្បាប់ចរាចរណ៍ផ្លូវគោកថ្មីនេះ ធ្វើដោយម៉ឺងម៉ាត់បំផុត ព្រោះកន្លងទៅ មានចំណុចមួយចំនួនមិនទាន់បានអនុវត្ត ឬមានការលើកលែង។
«ពីមុនមកដោយសារមានករណីមួយចំនួន ពាក់ព័ន្ធនឹងបញ្ហាឯកសារ យើងបានលើកលែង… ប៉ុន្តែចាប់តាំងពីថ្ងៃទី ១៥ ខាងមុខនេះតទៅ យើងនឹងអនុវត្តច្បាប់នេះឱ្យពេញលេញនូវចំណុចមួយចំនួន ដែលមិនទាន់បានអនុវត្តតាំងពីខែមួយកន្លងមកនេះ»។
ទន្ទឹមនឹងការរឹតបន្តឹងច្បាប់ចរាចរណ៍ដ៏ម៉ឺងម៉ាត់នាពេលខាងមុខនេះ អនុប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់មានប្រសាសន៍ថា ប្រជាពលរដ្ឋគ្រប់រូបដែលជាអ្នកបញ្ជាមធ្យោបាយធ្វើដំណើរផ្សេងៗ ចាំបាច់ត្រូវតែមានលិខិតស្នាមដែលច្បាប់តម្រូវឱ្យមានដាក់ជាប់ខ្លួនរាល់ពេលបើកបរ។ លោកថា ការចូលរួមគោរពច្បាប់ និងអនុវត្តច្បាប់ចរាចរណ៍បានល្អ នឹងធ្វើឱ្យប្រជាពលមិនខាតបង់ពេលវេលា ឬប្រាក់កាស់ឡើយ។ ចំណែកការផាកពិន័យជាទឹកប្រាក់ក្នុងបទល្មើសផ្សេងៗ ដាច់ខាតពលរដ្ឋត្រូវសុំបង្កាន់ដៃបង់ប្រាក់ពីមន្ត្រីនរគបាលចរាចរណ៍។
ជុំវិញបញ្ហានេះ លោក សន ជ័យ នាយកប្រតិបត្តិសម្ព័ន្ធគណនេយ្យភាពសង្គមកម្ពុជា មានប្រសាសន៍ថា ការអនុវត្តន៍ច្បាប់ចរាចរណ៍ផ្លូវគោកចាប់តាំងពីដើមខែឆ្នាំ ២០១៦ កន្លងទៅ រហូតទល់ពេលនេះ ប្រជាពលរដ្ឋកម្ពុជាភាគច្រើន ហាក់ពុំទាន់យល់ដឹងច្រើនពីច្បាប់នេះឡើយ។ ទន្ទឹមគ្នានេះដែរ លោក សន ជ័យ បានកត់សម្គាល់ថា ការផ្សព្វផ្សាយពីច្បាប់ចរាចរណ៍ក្នុងរយៈពេលចុងក្រោយនេះ មានលក្ខណៈទូលំទូលាយច្រើន ប៉ុន្តែបញ្ហាប្រឈមក្នុងការអនុវត្តច្បាប់នេះ គឺអ្នកអនុវត្តច្បាប់ពុំយកចិត្តគោរពច្បាប់ដែលរដ្ឋាភិបាលបានដាក់ចេញឡើយ។
លោក សន ជ័យ មានប្រសាសន៍បន្តថា ទោះបីគរបាលចរាចរណ៍ចាប់ផ្តើមពិន័យចំពោះអ្នកបើកបរមិនគោរពច្បាប់តឹងតែងយ៉ាងណាក៏ដោយ ក៏វិធានចាប់បង្ខំឱ្យប្រជាពលរដ្ឋគោរពច្បាប់មួយនេះ នឹងមិនមានប្រសិទ្ធិភាពឡើយ ព្រោះសេចក្តីព្រាងច្បាប់ចរាចរណ៍ផ្លូវគោកថ្មីដែលទើបនឹងដាក់ឱ្យប្រើប្រាស់នាពេលថ្មីៗនេះ រដ្ឋាភិបាលហាក់មិនបានពិភាក្សាទូលំទូលាយនិងពិនិត្យគ្រប់ជ្រុងជ្រោយនោះទេ។
លោក សន ជ័យ បានសង្កត់ធ្ងន់ថា ដើម្បីឱ្យកាត់បន្ថយអត្រាគ្រោះថ្នាក់ចរាចរណ៍នៅក្នុងសង្គម រាជរដ្ឋាភិបាលគួរតែពិនិត្យទៅលើកត្តាមួយចំនួន ដូចជាការត្រួតពិនិត្យរៀបចំគំនូសសញ្ញាចរាចរណ៍ ដាក់ស្លាកចរាចរណ៍ឡើងវិញ ព្រមទាំងការត្រួតពិនិត្យចំពោះរថយន្តធំៗដឹកទំនិញនាពេលបច្ចុប្បន្ន និងការបើកបរហួសល្បឿនកំណត់ជាដើម។
សូមជម្រាបថា ច្បាប់ចរាចរណ៍ផ្លូវគោកថ្មីត្រូវបានរដ្ឋាភិបាលដាក់ឱ្យប្រជាពលគោរពនិងអនុវត្តកាលពីថ្ងៃទី ០១ ខែមករា ឆ្នាំ ២០១៦ កន្លងទៅ។ បន្ទាប់ពីរដ្ឋាភិបាលដាក់ឱ្យអនុវត្តច្បាប់នេះ មានសាធារណមតិជាច្រើនរិះគន់យ៉ាងចាស់ដៃនៅក្នុងសង្គមចំពោះការពិន័យក្នុងមាត្រាមួយចំនួនក្នុងច្បាប់។ ការរិៈគន់នេះ បានធ្វើឱ្យប្រមុខរដ្ឋាភិបាលកម្ពុជា សម្តេច ហ៊ុន សែន លើកលែងបន្ធូបន្ថយចំណុចមួយចំនួនក្នុងច្បាប់ចរាចរណ៍ផ្លូវគោកថ្មីនេះ៕
