ភ្នំពេញ៖ ក្រសួងការបរទេស និងសហប្រតិបត្ដិការអន្ដរជាតិ បានចេញសេចក្ដីជូនព័ត៌មានមួយ ស្ដីពីការទៅចូលរួមមហាសន្និបាតអង្គការសហប្រជាជាតិ លើកទី ៧១ ដែលជាការជួបប្រជុំគ្នារវាងប្រទេស ១៩៣ នៅទូទាំងពិភពលោក។
មហាសន្និបាតអង្គការសហប្រជាជាតិនេះ នឹងប្រព្រឹត្ដទៅចាប់ពីថ្ងៃទី ២០ ដល់ថ្ងៃទី ២៥ ខែ កញ្ញា ឆ្នាំ ២០១៦ នៅទីក្រុងញូវយ៉ក សហរដ្ឋអាមេរិក ។
បើតាមសេចក្ដីជូនព័ត៌មានដដែលនេះបញ្ជាក់ថាលោក ប្រាក់ សុខុន ទេសរដ្ឋមន្ដ្រី រដ្ឋមន្ដ្រីការបរទេស និងសហប្រតិបត្ដិការអន្ដរជាតិ គឺជាអ្នកដឹកនាំគណប្រតិភូ អញ្ជើញទៅចូលរួមមហាសន្និបាត អង្គការសហប្រជាជាតិ លើកទី ៧១ នេះ។
តាមសេចក្ដីជូនដំណឹងនេះលោក ប្រាក់ សុខុន នឹងចូលរួមប្រជុំជាច្រើនទៀត មានដូចជា ប្រជុំរវាង រដ្ឋមន្ដ្រីការបរទេសអាស៊ានជាមួយ ប្រធានមហាសន្និបាតនៃអង្គការសហប្រជាជាតិលើកទី ៧១ និងអគ្គលេខាធិការ អង្គការសហប្រជាជាតិ ។
ជាមួយគ្នានេះ លោក ប្រាក់ សុខុន ក៏នឹងជួបប្រជុំក្រៅផ្លូវការជាមួយថ្នាក់រដ្ឋមន្ដ្រីអាស៊ាន និង សហរដ្ឋអាមេរិក ក៏ដូចជា កិច្ចប្រជុំក្រៅផ្លូវការ ជាមួយរដ្ឋមន្ដ្រីការបរទេសអាស៊ាន សម័យប្រជុំពេញអង្គពិសេស នៃរដ្ឋមន្ដ្រីការបរទេសអាស៊ានដែលផ្ដោតទៅលើការអភិវឌ្ឍន៍ ប្រកបដោយចីរភាព។
ក្នុងដំណើរចូលរួមមហាសន្និបាតអង្គការសហប្រជាជាតិនេះ ក៏មានកិច្ចប្រជុំថ្នាក់រដ្ឋមន្ដ្រីអាស៊ាន នៃសម្ព័ន្ធភាពប៉ាស៊ីហ្វិកលើទី ០៣ ផងដែរ។
សូមជម្រាបថាមហាសន្និបាតអង្គការសហប្រជាតិលើទី ៧១ ដែលប្រារព្ធឡើងនៅទីក្រុង ញ៉ូវយ៉ក នេះដែរ លោក ប្រាក់ សុខុន ក៏នឹងឡើងថ្លែងសុន្ទរកថាក្រោមប្រធានបទ «គោលដៅនៃការអភិវឌ្ឍន៍ប្រកបដោយចីរភាព និង ការជំរុញជា សកល ក្នុងការផ្លាស់ប្ដូរពិភពលោក»។
តាមសេចក្ដីជូនដំណឹងដដែលនេះ លោកទេសរដ្ឋមន្ដ្រី រដ្ឋមន្ដ្រីការបរទេស នឹងមានជំនួបទ្វេភាគីមួយចំនួនជាមួយរដ្ឋមន្ដ្រីការបរទេស និងប្រមុខគណៈប្រតិភូនៃប្រទេសមួយចំនួនផងដែរ។
យ៉ាងណា ក៏ដោយសេចក្ដីជូនព័ត៌មានរបស់ក្រសួងការបរទេស និងសហប្រតិបត្ដិការអន្ដរជាតិមិនបាន បញ្ជាក់ណាមួយ ថា ត្រូវឆ្លើយតបចំពោះការវាយប្រហារថា កម្ពុជា ជារដ្ឋរំលោភសិទ្ធិមនុស្ស ដែលថោ្កលទោស ដោយប្រទេសចំនួន ៣៦ នៃក្រុមប្រឹក្សាសិទ្ធិមនុស្ស អង្គការសហប្រជាជាតិនោះទេ ៕
