មនុស្សស្ទើរគ្រប់រូបតែងប្រាថ្នាឱ្យជីវិតខ្លួន ការរស់នៅរបស់ខ្លួន រស់សមប្រកបដោយសេចក្តីសុខនិងមានសុភមង្គល ។ ប៉ុន្តែដើម្បីទទួលបានសុភមង្គលនៅក្នុងដំណើរជីវិត មនុស្សម្នាក់ៗបានជំនះឧបសគ្គ រនាំងធម្មជាតិ សម្ពាធពីបរិស្ថានជុំវិញខ្លួន ហើយរមែងតែងជួបប្រទះបញ្ហាជាច្រើនជំពូកក្នុងជីវិត ។ មានមធ្យោបាយ ១០ យ៉ាង សាមញ្ញបំផុត ដើម្បីរក្សាតម្លៃខ្លួនក្នុងភាពវិជ្ជមានខ្ពងខ្ពស់និងឈ្នះឧបសគ្គនៅក្នុងជីវិតរបស់ប្រចាំថ្ងៃ ៖
១. ការផ្តល់តម្លៃដល់ខ្លួនឯង ៖ ជ្រើសរើសលើកតម្កើង មើលខ្លួនឯងក្នុងភាពវិជ្ជមានប្រកបដោយទំនុកចិត្ត ភាពជឿជាក់ និងភាពជោគជ័យ ។
២. ការស្តាប់ ៖ ស្តាប់ការនិយាយរបស់អ្នកដទៃ និង កែសម្រួលប្រសិនបើវាជាការពិត ។ ការស្តាប់ល្អ គឺជាការស្តាប់ដោយប្រើបេះដូង មិនមែនប្រើអារម្មណ៍តបតចំពោះការគិតរបស់អ្នកដទៃនោះទេ ព្រោះយើងមិនអាចដឹងថា ការគិតរបស់យើងត្រឹមត្រូវរហូតទេ ។
៣. ទំនួលខុសត្រូវ ៖ ដើម្បីរក្សាតម្លៃខ្លួនក្នុងភាពវិជ្ជមានខ្ពងខ្ពស់ ព្រមទាំងឈ្នះឧបសគ្គនៅក្នុងជីវិតរបស់ប្រចាំថ្ងៃ ការទទួលខុសត្រូវ ឬ ទំនួលខុសត្រូវសំខាន់ណាស់ចំពោះមនុស្សម្នាក់ៗ ។ តែងតែមានទំនួលខុសត្រូវជានិច្ចចំពោះអ្វីដែលខ្លួនបានធ្វើ ពោលគឺហ៊ាននិយាយ ហ៊ានធ្វើ ។
៤. កសាងភាពខ្លាំង ៖ កសាងមូលដ្ឋានជីវិតឱ្យរឹងមាំ ទាំងចំណេះដឹង និង ជំនាញ ។ កសាងភាពខ្លាំងរបស់ខ្លួនដោយមិនចាំបាច់ប្រៀបធៀបជាមួយអ្នកដទៃដែលមានភាពរុងរឿងជាង ទើបជាជម្រើសល្អបំផុត ព្រោះដំណើរជីវិតរបស់មនុស្សមិនដូចគ្នានោះទេ ។
៥. រក្សាចិត្ត ៖ រក្សាចិត្តឱ្យនឹងន កុំរំភើបហួសហេតុចំពោះអ្វីដែលអ្នកធ្វើបានល្អ ។ គ្រប់កាលៈទេសៈត្រូវរក្សានិងនិយាយល្អពីខ្លួនឯង និង អ្នកដទៃ ។
៦. កុំធ្វើតាមបង្គាប់អ្នកដទៃ ៖ យើងមិនមែនជាមនុស្សអាត្មានិយមទេ ។ បញ្ឈប់ការធ្វើតាមអ្នកដទៃនូវអ្វីដែលគេចង់ឱ្យអ្នកធ្វើ ដែលមិនមែនជាចិត្តពិតរបស់អ្នកប៉ងធ្វើ ។
៧. គោលដៅ ៖ គ្រប់ការធ្វើដំណើរសុទ្ធសឹងតែមានគោលដៅ ប្រសិនបើគ្មានគោលដៅនោះអ្នកនឹងវង្វេងមិនខាន ។ ត្រូវសរេសរគោលដៅនិងបញ្ជាក់អំពីពេលវេលារួចរាល់របស់វា ។
៨. និមិត្តរូប ៖ ស្វែងរកអ្វីមួយទុកជាគម្រូសម្រាប់ខ្លួនឯង ឬ ជានិមិត្តរូបរបស់ខ្លួន ។ សរសេរសៀវភៅ ធ្វើអំពើល្អ បរិច្ចាគទាន បង្ហាញគំនិតល្អដល់មិត្តភក្តិរបស់អ្នក… ។
៩. មិនបោះបង់ ៖ រក្សាការព្យាយាមជានិច្ចមិនបោះបង់ ទើបទទួលបានជោគជ័យ និង មានតម្លៃខ្ពង់ខ្ពស់សម្រាប់ជីវិត ។
១០. ការប្តេជ្ញា ៖ រាល់ទង្វើ ឬអ្វីដែលសម្រេចចិត្តថាធ្វើ ត្រូវតែធ្វើប្រកបដោយគុណភាពខ្ពស់ ព្រោះបើអ្នកគ្មានការប្តេជ្ញាបែបនេះទេ ទង្វើនោះនឹងសាបរលាបទៅតាមខ្យល់ដង្ហើមជាពុំខាន ៕
រៀបរៀងដោយ ម៉ៅ សំណាង
