(សៀមរាប) អនុប្រធានមន្ទីរទេសចរណ៍ខេត្តសៀមរាបបានឱ្យដឹងថា មានភ្ញៀវទេសចរអន្ដរជាតិ ជាង ៧ពាន់នាក់ ក្នុងនោះមានភ្ញៀវទេសចរជាតិ ជាង ៣៥០០នាក់ នៅថ្ងៃទី២២ ខែមីនា ឆ្នាំ២០១៨នេះ បានចូលទស្សនាបាតុភូតព្រះអាទិត្យរះចំកណ្ដាលកំពូលប្រាង្គប្រាសាទង្គវត្ត នៅក្នុងទឹកដីខេត្តសៀមរាប។
តាម លោក សោ វិសិដ្ឋ អនុប្រធានមន្ទីរទេសចរណ៍ខេត្តសៀមរាប បាតុភូតដែលបានកើតឡើងខាងលើនេះ គឺ កើតឡើង ២ដងជារៀងរាល់ឆ្នាំគឺលើកទី១ នៅខែមីនា និងលើកទី២ នៅខែកញ្ញា។
សំឡេង លោក សោ វិសិដ្ឋ ៖
គួរបញ្ជាក់ដែរថា បាតុភូតព្រះអាទិត្យរះចំកណ្តាលកំពូលប្រាសាទអង្គរវត្តបានកើតនៅចន្លោះរវាងពីម៉ោង ៥ ទៅម៉ោង ៧ព្រឹក នៅចន្លោះពីថ្ងៃទី២០ ដល់ថ្ងៃទី ២២ខែមីនា ឆ្នាំ២០១៨នេះ។
តាមសេចក្តីជូនដំណឹងរបស់ក្រសួងទេសចរណ៍ចុះកាលពីថ្ងៃទី១២ ខែមីនា ឆ្នាំ២០១៨ គឺ ព្រឹត្តិការណ៍ដ៏មហាអស្ចារ្យនេះ ក្រសួងក៏មានការរៀបចំការប្រកួតប្រជែងថតរូបស៊ែលហ្វី (Angkor Selfie Photo Contest) លើកទីបី ក្រោមប្រធានបទ «Selfie អង្គរអច្ឆរិយៈ» ដោយជ្រើសរើសរួបថតដែលមានអ្នកគាំទ្រច្រើនជាងគេពីលេខ១ ដល់លេខ៣ ដើម្បីទទួលលិខិតសរសើរចេញពីក្រសួងទេសចរណ៍ និងរង្វាន់លើកទឹកចិត្តលេខ១ ចំនួន ១លានរៀល, លេខ២ ចំនួន ៨០ម៉ឺនរៀល, និងលេខ៣ ចំនួន ៥០ម៉ឺនរៀល ផងដែរ ៕
ព័ត៌មានលម្អិតសូមចូលទៅកាន់ហ្វេសប៊ុកផេករបស់ក្រសួងទេសចរណ៍៖ Ministry of Tourism, Cambodia !