ទីក្រុងហាណូយ៖ខ្យល់ព្យុះទីហ្វុងដំរីបានសម្លាប់មនុស្សយ៉ាងហោចណាស់១៩នាក់នៅភាគកណ្តាលនិងភាគខាងត្បូងប្រទេសវៀតណាមនៅសៅរ៍ទី៤ ខែវិច្ឆិកាម្សិលមិញ។នេះបើតាមបណ្តាញព័ត៌មានChannel News Asia។
យោងតាមបណ្តាញព័ត៌មានChannel News Asia ខ្យល់ព្យុះទីហ្វុងដំរីបោកបក់មកដល់នៅម៉ោង៤ព្រឹកម៉ោងនៅក្នុងតំបន់ដែលល្បឿនខ្យល់៩០គីឡូម៉ែត្រក្នុងមួយម៉ោងនាំឲ្យរបើកតំបូលផ្ទះជាង១០០០ខ្នង ធ្វើឲ្យបង្កោលភ្លើងអគ្គសនីដួលនិងដើមឈើរលើងឬស្សដួលរលំ។
តាមប្រភពដដែលយ៉ាងហោចណាស់មនុស្ស១២នាក់បានបាត់ខ្លួននិងផ្ទះសម្បែងជាង៣៧០ខ្នងដួលរលំហើយប្រជាពលរដ្ឋជាង៣៣០០០នាក់ត្រូវបានជម្លៀសចេញ។នេះបើតាមការឲ្យដឹងពីក្រុមរុករកនិងជួយសង្គ្រោះវៀតណាម។
រដ្ឋាភិបាលវៀតណាមបានឲ្យដឹងថាកប៉ាល់ចំនួន៦បានលិចនៅសមុទ្រចិនខាងត្បូងដែលផ្ទុកមនុស្ស៦១នាក់។មនុស្សចំនួន២៥នាក់បានជួយសង្គ្រោះ។ប៉ុន្តែមិនបានផ្តល់ព័ត៌មានលម្អិតអំពីជោគវាសនាអ្នកផ្សេងទៀតទេ។
រដ្ឋាភិបាលវៀតណាមឲ្យដឹងទៀតថាដំណាំជាង៤ម៉ឺនហិចតាត្រូវបានបំផ្លាញ។ដំណាំទាំងនោះរួមមានដំណាំអំពៅ ដំណាំស្រូវនិងដំណាំកៅស៊ូ។ជើងហោះហើរជាង៤០ត្រូវលុបចោល។
កាលពីខែមុនគ្រោះធម្មជាតិទឹកជំនន់បានសម្លាប់មនុស្ស៨០នាក់នៅភាគខាងជើងវៀតណាមខណៈដែលព្យុះសង្ឃរាមួយបានបំផ្លិចបំផ្លាញនៅភាគកណ្តាលកាលពីខែកញ្ញា៕ប្រភព៖Channel News Asia
ប្រភពរូបភាព៖@SINITSYN_NIKITA/via REUTERS