ភ្នំពេញ៖ ប្រធានគណៈកម្មការសិទ្ធិមនុស្ស ទទួលពាក្យបណ្ដឹង អង្កេត ទំនាក់ទំនងរដ្ឋសភា ព្រឹទ្ធសភា នៃរដ្ឋសភា បានច្រានចោលការកោះ ហៅ លោក កឹម សុខា ពាក់ព័ន្ធនឹងករណីខ្សែអាត់សំឡេងស្នេហា ដែលយុវជនមួយក្រុមប្ដឹង លោក កឹម សុខា ឱ្យចូលបំភ្លឺករណីនេះនៅរដ្ឋសភា។
តាមរយៈលិខិតរបស់លោក អេង ឆៃអ៊ាង មួយសន្លឹកដែលបានផ្ញើជូនលោក ហេង សំរិន ប្រធានរដ្ឋសភា នៅថ្ងៃទី២៨ ខែមីនា ឆ្នាំ២០១៦ នេះ បានឱ្យដឹងថា ទាក់ទងនឹងញ្ញតិ្ដរបស់ ក្រុមយុវជន ស្រី ចំរើន ដាក់ប្ដឹងឱ្យលោកកឹម សុខា ចូលបំភ្លឺចំពោះខ្សែអាត់សំឡេងកាលពីថ្ងៃទី២៥ ខែមីនា ឆ្នាំ២០១៦ នោះ គឺពុំមានមាត្រា និងប្រការណាមួយនៃរដ្ឋធម្មនុញ្ញ បានចែងពីការកោះហៅលោក កឹម សុខា មកបំភ្លឺក្នុងករណីនេះឡើយ។
ប៉ុន្ដែទន្ទឹមនឹងនេះ អគ្គលេខាធិការរដ្ឋសភា បានផ្ញើលិខិតមួយទៀតទៅឱ្យលោក កឹម សុខា ឱ្យបានឆាប់តាមដែលអាចធ្វើទៅបាន ព្រោះចាត់ទុកលិខិតរបស់យុវជន ស្រី ចំរើន នោះ ថា ជាលិខិតរបស់ពលរដ្ឋធម្មតា ដូចជាញត្តិរបស់ពលរដ្ឋផ្សេងទៀតដែលរដ្ឋសភា ធ្លាប់បានអនុវត្ត។
សូមជម្រាបថា ករណីរបស់លោក កឹម សុខា នេះ ត្រូវបានអង្គភាពប្រឆាំងអំពើពុករលួយ ប្រកាសចាត់ការប្រឆាំងនឹងអ្នកនយោបាយរូបនេះដែរ ក្រោយពេលយុវជនមួយបានដាក់ពាក្យប្ដឹង លោក កឹម សុខា ថាបានប្រព្រឹត្តអំពើពុករលួយ ទិញលំនៅដ្ឋានមួយឱ្យស្រីកំណាន់ គឺកញ្ញា ខុម ចាន់ដារាទី ហៅ ស្រីមុំ៕