en     km
en     km

បក្ស​សង្គ្រោះ​ជាតិ​ក្រោយ​ពី​រុះរើ​មេ​បក្ស​

Share

ភ្នំពេញ៖ នៅ​ថ្ងៃ​ព្រ​ហ​ស្ប​ត្តិ៍​ទី​២​ខែ​មិ​នា​ សមាជ​វិសាមញ្ញ​របស់​គណបក្ស​សង្គ្រោះ​ជាតិ​បាន​បោះ​​ឆ្នោត​ជ្រើសតាំង​លោក​កឹ​ម​ សុខា​ ជា​ប្រធាន​គណបក្ស​ជំនួស​លោក​ សម​ រ​ង្ស៊ី​។​ ជាមួយ​គ្នា​នោះ​ អនុប្រធាន​គណបក្ស​ចំនួន​បី​រូប​ទៀត​ក៏​ត្រូវ​បាន​ជ្រើសតាំង​ផង​ដែរ​។​

អ្នក​ពិនិត្យ​ស្ថានការណ៍​នយោបាយ​មើលឃើញ​ថា​រចនា​ដឹកនាំ​ថ្មី​របស់​គណបក្សប្រឆាំង​អាច​​​នឹង​ជួយ​កែសម្រួល​ស្ថានការណ៍​តានតឹង​នយោបាយ​បាន​មួយ​កម្រិត​។​ហើយ​ក៏​អាច​នឹង​ដោះ​ស្រាយ​​ហានិភ័យ​នៃ​ការ​រំលាយ​គណបក្ស​បាន​មួយ​រយៈ​ផង​ដែរ​។​

ស្តាប់សំឡេង៖

លោក កឹម សុខា ប្រធានគណបក្សសង្គ្រោះជាតិ ថ្លែងការណ៍ពេលសមាជវិសាញ្ញ កាលពីថ្ងៃទី ២ មីនា ឆ្នំា ២០១៧។ រូបភាពហ្វេសប៊ុក លោក កឹម សុខា
លោក កឹម សុខា ប្រធានគណបក្សសង្គ្រោះជាតិ ថ្លែងការណ៍ពេលសមាជវិសាញ្ញ កាលពីថ្ងៃទី ២ មីនា ឆ្នំា ២០១៧។ រូបភាពហ្វេសប៊ុក លោក កឹម សុខា
ប៉ុន្មាន​ស​ប្តា​ហ៍​ក្រោយ​ពី​លោក​សម​ រ​ង្ស៊ី​ ដែល​កំពុង​ស្ថិត​ក្នុង​ការ​និរទេស​ខ្លួន​នៅ​ក្រៅប្រទេស​ ក្រោយ​ពី​ជាប់​បណ្តឹង​ជុំ​ខ្លួន​បាន​លាលែង​ពី​ប្រធាន​គណបក្ស​សង្គ្រោះ​ជាតិ​ដែល​ជា​គណ​បក្ស​ប្រឆាំង​ធំ​និង​មាន​សក្តានុពល​ក្នុង​ប្រទេស​កម្ពុជា​ គណបក្សប្រឆាំង​នេះ​បាន​បើក​សមាជ​វិសា​មញ្ញ​​ជា​បន្ទាន់​ភ្លាមៗ​ដើម្បី​ជ្រើសរើស​ប្រធាន​គណបក្ស​ថ្មី​។​

នៅ​ថ្ងៃ​ព្រ​ហ​ស្ប​ត្តិ៍​ម្សិលមិញ​នេះ​សមាជ​ដែល​មាន​អ្នកចូលរួម​ប្រមាណ​ជាង​១០០០​នាក់​បាន​ សំរេច​ជ្រើសតាំង​ លោក​ កឹ​ម​ សុខា​ អតីត​អនុប្រធាន​គណបក្ស​ ជា​ប្រធាន​បក្ស​ជំនួស​លោក​សម​ រ​ង្ស៊ី​។​

ហើយ​សមាជ​វិសាមញ្ញ​ដដែល​នេះ​ក៏​បាន​ជ្រើសរើស​ឥស្សរជន​បី​រូប​ទៀត​ជា​អនុប្រធាន​គណ​បក្ស​​នោះ​គឺ​លោក​ប៉ុ​ល​ ហំ​ម​ លោ​កអេង​ ឆៃ​អ៊ា​ង​ និង​លោកស្រី​ មួ​ សុខ​ហួរ​។​

ជា​ការ​ពិត​ការ​ការ​រៀបចំ​រចនា​សម្ព​ន្ធ័​ដឹកនាំ​ថ្មី​របស់​គណបក្ស​សង្គ្រោះ​ជាតិ​នៅ​ពេល​នេះ​មិន​មែន​​​​ស្ថិត​ក្នុង​គម្រោង​យូរអង្វែង​ជា​យូរ​មក​ហើយ​របស់​គណបក្សប្រឆាំង​នេះ​ទេ​។​

ប៉ុន្តែ​មូល​ហេតុ​​ ដែល​នៅ​ពីក្រោយ​កា​រវិ​វត្ត​នេះ​ត្រូវ​គេ​មើលឃើញ​ថា​បាន​កើតឡើង​ក្រោយ​ពី​សម្ពាធ រុញ​ច្រាន​ពី​គណបក្ស​ប្រជាជន​កម្ពុជា​ដែល​កំពុង​កាន់​អំណាច​តាម​រយៈ​ការ​ធ្វើ​វិសោធនកម្ម​ច្បាប់​​​ស្តី​ពី​គណបក្ស​នយោបាយ​។

​ច្បាប់​វិសោធនកម្ម​នេះ​បាន​ចែង​ពី​ការ​ហាមឃាត់​ឥស្ស​រ​ជន​នយោបាយ​មិន​ឲ្យ​ធ្វើ​ជា​ប្រធាន​ឬ​អនុប្រធាន​គណបក្ស​នយោបាយ​ប្រសិនបើ​ឥស្សរជន​រូប​​នោះ​មានទោស​ឧក្រិដ្ឋ​ជាប់​ខ្លួន​។

មួយវិញទៀត​បើសិនជា​ទោស​នោះ​មាន​លក្ខណៈ​កាន់តែ​ធ្ងន់ធ្ងរ​ អាច​ឈាន​ដល់​ការ​រំលាយ​គណបក្ស​ដែល​ស្ថិត​ក្រោម​ការ​ចាត់​ដឹកនាំ​របស់​អ្នកនយោបាយ​រូប​នោះ​ទៀត​ផង​។​

​ដូច្នេះ​នៅ​ពេល​ដែល​លោក​សម​ រ​ង្ស៊ី​កំពុង​តែ​ជាប់​បណ្តឹង​យ៉ាង​ហោច​ណាស់​ចំនួន​ប្រាំ​ក្នុង​នោះ​បណ្តឹង​ចំនួន​ពីរ​ត្រូវ​បាន​បើក​សវនាការ​។​ហើយ​លោក​សម​ រ​ង្ស៊ី​ ត្រូវ​បាន​ផ្តន្ទាទោស​ឲ្យ​ជាប់​ពន្ធនាគារ​ទៀត​ផង​។​

​ហេតុ​យ៉ាងនេះ​ហើយ​ហានិភ័យ​នៃ​ការ​រំលាយ​គណបក្ស​សង្គ្រោះ​ជាតិ​នឹង​មាន​កម្រិត​កាន់តែ​ខ្ពស់​ បើសិនជា​លោក​សម​ រ​ង្ស៊ី​ មិន​លាលែង​ពី​ដំណែង​នោះ​ទេ​។​ ចុះ​តើ​ការ​ជ្រើសតាំង​លោក​កឹ​ម​ សុខា​ ជំនួស​លោក​សម​ រ​ង្ស៊ី​ អាច​នឹង​អាច​ដោះស្រាយ​បញ្ហា​អ្វីខ្លះ​សំរាប់​គណបក្ស​ប្រឆាំង​​?

​ពិតមែន​ហើយ​ ការ​ឡើង​កាន់​តួនាទី​ជា​ប្រធាន​គណបក្ស​របស់​លោក​កឹ​ម​ សុខា​ អាច​នឹង​ជួយ​ដោះស្រាយ​បញ្ហា​ចំពោះ​មុខ​បាន​មួយ​ចំនួន​។​

ដំបូង​គឺ​ដោះស្រាយ​បញ្ហា​ប្រឈម​របស់​គណបក្ស​។​បញ្ហា​ប្រឈម​ដែល​មិន​មាន​មេ​បក្ស​ដឹក​នាំ​​​ជា​ច្រើន​ឆ្នាំ​មក​ហើយ​ក្រោយ​ពី​លោក​សម​ រ​ង្ស៊ី​ រត់គេច​ពី​បណ្តឹង​ហើយ​ទៅ​ស្នាក់​នៅ​ឯ​បរទេស​។​

ហើយ​លោក​កឹ​ម​ សុខា​ បាន​ដើរតួ​ជា​ប្រធាន​ស្តីទី​គណបក្ស​ក៏​ច្រើន​ឆ្នាំ​មក​ដែរ​។​ ភាព​នៅ​ដាច់​ឆ្ងាយ​ពី​ការ​ដឹកនាំ​របស់​លោក​សម​ រ​ង្ស៊ី​ បាន​បង្ក​ឲ្យ​មាន​ផលវិបាក​ក្នុង​ការ​ចាត់ចែង​និង​ការ​ដោះ​ស្រាយ​បញ្ហា​ដែល​បាន​និង​កំពុង​កើតឡើង​ចំពោះ​គណបក្សប្រឆាំង​ជា​ពិសេស​ក្នុង​ពេល​ដែល​ការ​បោះ​ឆ្នោត​ជ្រើសរ​សើ​ក្រុមប្រឹក្សា​ឃុំ​ សង្កាត់​កាន់តែ​ខិត​កៀក​ជិត​មក​ដល់​។​

បញ្ហា​ប្រឈម​បន្ទាប់​នោះ​គឺ​ដំណើរការ​របស់​គណបក្ស​សង្គ្រោះ​ជាតិ​ក្រោយ​ពី​ការ​លាលែង​របស់​លោក​សម​ រ​ង្ស៊ី​។​

បើ​ទោះជា​លោក​សម​ រ​ង្ស៊ី​ ស្ថិត​នៅ​ក្រៅប្រទេស​ហើយ​មិន​បាន​ដឹកនាំ​នយោបាយ​ដោយ​ផ្ទាល់​​ដៃ​ ប៉ុន្តែ​ការ​លាចាក​ពី​ភាព​ជា​អ្នកដឹកនាំ​របស់​លោក​ចង់​ឬ​មិន​ចង់វា​នៅ​តែ​ជា​កិច្ចការ​ត្រូវ​ដោះស្រាយ​និង​ជ្រើសរើស​មេ​បក្ស​ថ្មី​មក​ជំនួស​ដើម្បី​យ៉ាង​ហោច​ណាស់​រក្សា​លំនឹង​ផ្លូវចិត្ត​របស់​សកម្មជន​និង​អ្នកគាំទ្រ​នយោបាយ​។​ បន្ថែម​ពី​នោះ​ទៀត​វត្តមាន​របស់​លោក​កឹ​ម​ សុខា​ ឡើង​ធ្វើ​ជា​ប្រធាន​គណបក្ស​សង្គ្រោះ​ជាតិ​ទំនង​គឺជា​ការ​ចង់បាន​របស់​គណបក្ស​ប្រជាជន​កម្ពុជា​ផង​ដែរ​។​ជា​ពិសេស​សម្តេច​នាយក​រដ្ឋ​ មន្ត្រី​ហ៊ុន​ សែន​។​

​ដូច្នេះ​ហើយ​ទើប​បានជា​ភ្លាមៗ​ក្រោយ​ពី​សមាជ​វិសាមញ្ញ​របស់​គណបក្ស​សង្គ្រោះ​ជាតិ​បាន​លើក​លោក​កឹ​ម​ សុខា​ ឲ្យ​ធ្វើ​ជា​ប្រធាន​គណបក្ស​សង្គ្រោះ​ជាតិ​ សម្តេច​នាយក​រដ្ឋមន្ត្រី​ហ៊ុន​ សែន​ ក្នុង​នាម​ជា​ប្រធាន​គណបក្ស​ប្រជាជន​កម្ពុជា​បាន​ផ្ញើ​សារ​អបអរសាទរ​លោក​កឹ​ម​ សុខា​ ភ្លាមៗ​ដែរ​។​ ប៉ុន្មាន​ម៉ោង​ក្រោយមក​លោក​កឹ​ម​ សុខា​ បាន​ថ្លែងអំណរគុណ​តប​លោក​សម្តេច​ប្រមុខ​បក្ស​កាន់​អំណាច​ផង​ដែរ​។​

​ត្រង់​ចំណុច​នេះ​គេ​អាច​រាប់​បញ្ចូល​បាន​ថា​ជា​សញ្ញា​ទន់ភ្លន់​មួយ​រវាង​គណបក្ស​គូប្រជែង​ដ៏​មុត​​​​ស្រួច​ទាំង​ពីរ​នេះ​។​វា​គឺជា​សញ្ញា​នៃ​ភាព​ធូរស្រាល​ស្ថាន​ការ​នយោបាយ​បាន​មួយ​កម្រិត​នៅ​ពេល​ដែល​ប្រមុខ​បក្ស​ប្រឆាំង​និង​ប្រមុខ​បក្ស​កាន់​អំណាច​ហ៊ាន​បង្ហាញ​សំដែង​ទឹកចិត្ត​បែប​នេះ​ដាក់​គ្នា​។​

បើ​ទោះបីជា​ទឹកចិត្ត​បែប​នេះ​ត្រូវ​គេ​មើលឃើញ​ថា​គឺជា​ការ​សំដែង​ជា​លក្ខណៈ​កា​ទូត​និង​ផ្លូវការ​ក៏​ដោយ​។​ហើយ​បើ​ទោះ​វា​គ្រាន់តែ​ជា​កាយវិកា​ កា​ទូត​ ប៉ុន្តែ​វា​គឺជា​វប្បធម៌​ថ្មី​មួយ​ដែល​គណបក្ស​ប្រជាជន​កម្ពុជា​មិន​ដែល​ធ្លាប់​ធ្វើ​ទាល់តែ​សោះ​។

​ហើយ​វា​ក៏​ជា​កាយវិកា​បង្ហាញ​ពី​ការ​ទទួលយក​គំរូ​ប្រជាធិបតេយ្យ​របស់​មេដឹកនាំ​គណបក្ស​ប្រជាជន​តាម​រយៈ​ការ​ស្វា​គម​បក្ស​ប្រជែង​របស់​ខ្លួន​។​ ​ប្រសិនបើ​កាយវិកា​បែប​នេះ​នឹង​មាន​ជា​បន្ត​ទៅ​ទៀត​នោះ​ ទំនងជា​វប្បធម៌​ស​ន្ទា​រវាង​គណបក្សប្រឆាំង​និង​គណបក្សកាន់អំណាច​ដែល​​​បាន​ស្លាប់​ទៅ​ហើយ​នោះ​ អាច​រស់​ឡើង​វិញ​បាន​។​

ដោយឡែក​ចំណុច​មួយទៀត​ដែល​ប្រសិនជា​គេ​ពិនិត្យ​មើល​ដំណើរ​នយោបាយ​ដែល​ស្ថិត​ក្នុង​​ភាព​តានតឹង​ក្នុង​ពេល​កន្លង​មក​ ការ​ឡើង​ធ្វើ​ជា​មេ​បក្ស​សង្គ្រោះ​ជាតិ​របស់​លោក​កឹ​ម​ សុខា​​ នៅ​ពេល​នេះ​ទំនងជា​ដើរ​ស្រប​នឹង​ពាក្យ​ចរ​ចាម​អារាម​ដែល​ថា​មាន​ចេតនា​បែប​ណា​មួយ​​​ចង់​បំបែក​គណបក្សប្រឆាំង​ជា​ពិសេស​ការ​បំបែក​ការ​ដឹកនាំ​របស់​លោក​សម​ រ​ង្ស៊ី​ ចេញ​ពី​លោក​កឹ​ម​ សុខា​។​

ដូចនេះ​ជា​រូបភាព​លោក​សម​ រ​ង្ស៊ី​ ត្រូវ​ខ្ទាត​ចេញពី​រង្វង់​នយោបាយ​បើ​ទោះជា​អនុលោម​តាម​គោលការណ៍​ស្ម​គ្រ័​ចិត្ត​ក៏​ដោយ​។​

​ចំណុច​មួយទៀត​ការ​ឡើង​កាន់​ដំណែង​ជា​មេ​បក្ស​និង​ការ​រៀបចំ​រចនា​សម្ព​ន្ធ័​ដឹកនាំ​គណបក្ស​សង្គ្រោះ​ជាតិ​ឡើង​វិញ​ទំនងជា​ចំណុច​គោល​ដើម្បី​បញ្ចៀស​មេដឹកនាំ​ដែល​មានទោស​ជាប់​ខ្លួន​ដែល​អាច​នឹង​នាំ​ទៅ​ដល់​គ្រោះថ្នាក់​នៃ​ការ​រំលាយ​គណបក្ស​ដោយសារ​តែ​ការ​សង្កត់​លើ​ទោសទណ្ឌ​នោះ​ក្រោម​អំណាច​នៃ​ច្បាប់​ស្តី​ពី​គណបក្ស​នយោបាយ​ដែល​ទើបនឹង​ត្រូវ​អនុម័ត​ដោយ​សមាជិក​សភា​ពី​ខាង​គណបក្ស​ប្រជាជន​កាលពី​ពេល​ថ្មីៗ​បំផុត​នេះ​។​

​ក៏​ប៉ុន្តែ​សំណួរ​សួរ​ថា​តើ​វិធី​ដោះស្រាយ​ក្នុង​គ្រា​បន្ទាន់​របស់​គណបក្ស​សង្គ្រោះ​ជាតិ​នៅ​ពេល​នេះ​អាច​នឹង​មាន​ប្រសិទ្ធិ​ភាព​យូរអង្វែង​កម្រិត​ណា​?​ 

ចំពោះ​ចំណោទ​នេះ​ គេ​នៅ​មើលឃើញ​នៅឡើយ​ថា​ លោក​កឹ​ម​ សុខា​ ដែល​ជា​ប្រធាន​ថ្មី​របស់​​គណបក្ស​សង្គ្រោះ​ជាតិ​ទើបតែ​ត្រូវ​លើកលែងទោស​ទាក់ទង​នឹង​បទ​សង្ស័យ​ថា​មាន​ស្នេហា​លួចលាក់​ជាមួយ​ស្ត្រី​វ័យក្មេង​ម្នាក់​។​

ប៉ុន្តែ​លោក​នៅ​ជាប់​បណ្តឹង​មួយទៀត​នៅឡើយ​ដែល​ប្តឹង​ដោយ​សកម្មជន​នយោបាយ​វ័យ​ក្មេង​ នាង​ ធី​ សុវណ្ណ​ថា​។​រីឯ​លោកស្រី​មួ​ សុខ​ហួរ​ អនុប្រធាន​គណបក្ស​សង្គ្រោះ​ជាតិ​ក៏​នៅ​ជាប់​បណ្តឹង​មួយ​ជាប់​នឹង​ខ្លួន​ផង​ដែរ​៕

Share

Image
Image
Image