ទីភ្នាក់ងារមូលនិធិកុមារអង្គការសហប្រជាជាតិបានឱ្យដឹងថា ក្មេងស្រីអាយុពី៥ឆ្នាំ ទៅ៩ឆ្នាំបានជួយការងាររបស់ឪពុកម្ដាយរហូតដល់ទៅ៥០ភាគរយ បើធៀបទៅនឹងក្មេងប្រុស។
របាយការណ៍ស្ទង់មតិរបស់អង្គការនេះ ត្រូវបានផ្សព្វផ្សាយ ជាសាធារណៈនៅថ្ងៃសុក្រ ទី០៧ ខែតុលា ២០១៦នេះ។
របាយការណ៍បានបញ្ជាក់ថា ក្នុងចំណោមក្មេងស្រី៣នាក់ មាន២នាក់បានជួយកិច្ចការងារឪពុកម្ដាយ របស់ពួកគេ ដោយជាអ្នកទទួលខុសត្រូវកិច្ចការផ្ទះ ដូចជា ការចម្អិនអាហារ ការរកអុស ដងទឹក និងការបោសសំអាតផ្ទះសម្បែង។
របាយការណ៍នេះ បញ្ជាក់បន្ថែមទៀតថា ក្នុងចំណោមក្មេងស្រីទាំងនោះ គឺ ៣០ភាគរយមានការងារធ្ងន់ធ្ងរធ្វើប្រចាំគ្រួសាររបស់ពួកគេ ហើយបើក្មេងស្រីមានអាយុ ១០ ទៅ ១៤ឆ្នាំ គឺ មានរហូតដល់ជាង៥០ភាគរយ បានជួយការងារឱពុកម្ដាយ។
នៅពេលជាមួយគ្នានេះ របាយការណ៍ របស់អង្គការកុមារពិភពលោក បានបង្ហាញថា ក្មេងស្រីតែងតែរងអំពើហិង្សា ក្នុងគ្រួសារ ដែលបង្ខំឱ្យក្មេងស្រីទាំងនោះរៀបការ មិនបានទៅសាលារៀន ៕ប្រភព BBC