មន្ត្រីសម្របសម្រួលអង្គការលីកាដូប្រចាំខេត្តកោះកុង បានឱ្យដឹងថាតុលាការខេត្តនេះ នឹងប្រកាសសាលក្រមនៃសំនុំរឿង តំណាងសហគមន៍ជនជាតិដើមភាគតិចជង ក្នុងតំបន់អារ៉ែងគឺលោក វ៉ែន វ៉ន នៅព្រឹកថ្ងៃព្រហស្បត្តិ៍នេះ បន្ទាប់ពីព្រះរាជអាជ្ញាបានលើកពេលប្រកាសសាលក្រមកាលពីពាក់កណ្តាលខែកុម្ភៈកន្លងមក។
មន្ត្រីសម្របសម្រួលអង្គការលីកាដូប្រចាំខេត្តកោះកុង លោក អ៊ិន គង់ ជិតថ្មីៗនេះបានប្រាប់វិទ្យុស្ត្រី FM 102 ថា ចៅក្រមតុលាការខេត្តកោះកុងនឹងប្រកាសពីសាលក្រមទៅថ្ងៃទី៣ ខែមីនានេះ។
សមាជិកក្រុមប្រឹក្សាឃុំជំនាប់ និងជាតំណាងសហគមន៍ជនជាតិដើមភាគតិចជង លោក វ៉ែន វ៉ន ត្រូវបានតុលាការខេត្តកោះកុងសម្រេចឃុំខ្លួន បណ្តោះអាសន្នតាំងពីខែតុលា ឆ្នាំ២០១៥ ក្រោមបទចោទចំនួន ២ គឺការប្រមូលអនុផលព្រៃឈើ និងការបំបាត់វត្ថុតាង។
ទាំងមេធាវី ទាំងមន្ត្រីសម្របសម្រួលអង្គការលីកាដូប្រចាំខេត្តកោះកុងជឿជាក់ថា ចៅក្រមសាលាដំបូងខេត្តកោះកុង នឹងអាចទម្លាក់ការចោទប្រកាន់ ទៅលើសមាជិកក្រុមប្រឹក្សាឃុំជំនាប់ និងជាតំណាងសហគមន៍ជនជាតិដើមភាគតិចជង តំបន់អារ៉ែង លោក វ៉ែន វ៉ន ។ ពួកគាត់ ចាត់ទុក ការចោទប្រឆាំងសកម្មជនបរិស្ថានជនជាតិដើម រូបនេះ ថាពុំមានមូលហេតុ ត្រឹមត្រូវឡើយ៕
