ភ្នំពេញ ៖ ក្រសួងអប់រំ យុវជន និងកីឡា បានចេញលិខិតបង្ហាញពីការរកឃើញ មូលហេតុនៃការដួលសន្លប់របស់សិស្សនៅតាមសាលាកាលពីពេលថ្មីៗទៅនេះថា គឺបណ្ដាលមកពីសិស្សមានជំងឺរ៉ាំរ៉ៃ បញ្ហាថប់បារម្ភ បរិស្ថានសិក្សាមិនសមស្រប ការទទួលទានអាហារមិនមានតុល្យភាព ការបរិភោគភេសជ្ជៈប៉ូវកម្លាំង និងការគេងមិនគ្រប់គ្រាន់ជាដើម។
ក្រោយការរកឃើញមូលហេតុនេះ ក្រសួងអប់រំ បានចេញវិធានការមួយចំនួនដើម្បីដោះស្រាយបញ្ហាទាំងអស់នេះ ដែលមានដូចជា សកម្មភាពវិធានការបន្ទាន់ និងសកម្មភាពវិធានការបន្ដ។
សម្រាប់វិធានការបន្ទាន់ លោកគ្រូ អ្នកគ្រូ នៅក្នុងម៉ោងសិក្សា ត្រូវសង្កេតមើលស្ថានភាពសិស្សជាប្រចាំ ប្រសិនបើមានករណីសង្ស័យ ឬកើតមានអាការៈទន់ដៃ ទន់ជើង និងការថប់បារម្ភ ត្រូវឲ្យអ្នកដែលមានបញ្ហានោះ សម្រាកជាបន្ទាន់ ដើម្បីទទួលការព្យាបាល។ លោកគ្រូ អ្នកគ្រូ ត្រូវណែនាំអ្នកដែលមានអាការៈនោះ ឲ្យសម្រួលអារម្មណ៍ កុំតក់ស្លុត ព្រមទាំងសម្រួលផ្លូវដង្ហើម តាមវិធីដកដង្ហើមវែងៗ ដោយស្រួបយកខ្យល់តាមច្រមុះ និងបញ្ចេញវិញតាមមាត់ឲ្យបានច្រើនដង។ បន្ថែមពីនេះ ត្រូវអន្ដរាគមន៍ជាបន្ទាន់ទៅប៉ុស្ដិ៍សុខភាព មណ្ឌលសុខភាព មន្ទីរពេទ្យបង្អែក ដែលនៅជិតបំផុត ព្រមទាំងត្រូវផ្ដល់ដំណឹងដល់អាណាព្យាបាល អាជ្ញាធរមានសមត្ថកិច្ចមូលដ្ឋាន និងអ្នកពាក់ព័ន្ធ ដើម្បីស្វែងរកវិធានការសមសម្រាប់ជួយអ្នកជំងឺ។ លើសពីនេះ មិនត្រូវចែកចាយបន្ដនូវរូបភាពគ្រប់ស្ថានភាពរបស់អ្នកមានបញ្ហានេះ តាមបណ្ដាញសង្គមនានា ដើម្បីជៀសវាងការឆ្លងអារម្មណ៍តៗគ្នា។
ចំណែកវិធានការបន្ដ ដែលក្រសួងអប់រំកំណត់ គឺ សិស្សដែលមានជំងឺរ៉ាំរ៉ៃប្រចាំកាយ ត្រូវទៅពិនិត្យតាមដានសុខភាពជាប្រចាំ នៅពេលមានការថប់បារម្ភ ត្រូវទៅពិគ្រោះយោបល់ជាមួយអ្នកទុកចិត្ដបាន ឬក៏អ្នកជំនាញ។ គ្រប់គ្រឹះស្ថានសិក្សា ត្រូវរៀបចំឲ្យមានការអប់រំផ្សព្វផ្សាយ ស្ដីពីការថែទាំងសុខភាពជាប្រចាំ ជាពិសេសកត្ដាដែលបង្កឲ្យមានជំងឺផ្សេងៗ កើតឡើងញឺកញាប់នៅតាមូលដ្ឋាន។
លោកគ្រូ អ្នកគ្រូ ត្រូវណែនាំសិស្សកុំនៅកន្លែងស្ងាត់ម្នាក់ឯង ឆ្ងាយពីគេ ។ តាមគ្រឹះស្ថានសិក្សា ត្រូវបង្កើនការដាំដើមឈើផ្ដល់ម្លប់ ដាំផ្កាលម្អ នៅក្នុងបរិវេណសាលា ដោយអនុវត្ដតាមគោលការណ៍ “ប៉ៃតង ស្អាត និងសុវត្ថិភាព” ។ លើសពីនេះ ត្រូវពិនិត្យទីតាំងលក់ចំណី រក្សាអនាម័យ ហាមសិស្សផឹកភេសជ្ជៈប៉ូវកម្លាំង ត្រូវផឹកទឹកឲ្យបាន ២លីត្រក្នុងមួយថ្ងៃ ទទួលទានដំណេកឲ្យបាន ៨ម៉ោងយ៉ាងតិច។ បន្ថែមពីនេះ ត្រូវបើកទ្វារបង្អូចឲ្យបានធំទូលាយ កុំស្លៀកពាក់តឹងពេក ជៀសវាងការជឿលើអបីយជំនឿដែលមិនសមហេតុផល។ តាមសាលា គួរមានធុងសំរាម ៣ប្រភេទ គឺធុងសំរាម សម្រាប់កាកសំណល់សរីរាង្គ ធុងសំរាមសម្រាប់ដាក់សំណល់ផ្សេងៗ និងធុងសំរាមសម្រាប់សំណល់កែច្នៃ។ ជាងនេះ ក្នុងករណីមានសិស្សមានអាការៈមិនស្រួលត្រូវហៅទូរស័ព្ទទៅលេខ ១១៥ ដើម្បីរាយការណ៍ករណីនេះទៅនាយកដ្ឋានប្រយុទ្ធ និងជំងឺឆ្លង នៃក្រសួងសុខាភិបាល។
ក្រសួងអប់រំ រំពឹងថា ថ្នាក់ដឹកនាំមន្ទីរអប់រំ យុវជន និងកីឡា គ្រប់រាជធានី ខេត្ដ ប្រធានការិយាល័យអប់រំ ស្រុក ខណ្ឌ នាយក នាយិកា លោកគ្រូ អ្នកគ្រូ នឹងអនុវត្ដន៍តាមប្រកបដោយប្រសិទ្ធភាពខ្ពស់ ដើម្បីទប់ស្កាត់ករណីសិស្សទន់ដៃ ទន់ជើង ឈានដួលសន្លប់៕