នាយកដ្ឋានស៊ើបអង្កេតនិងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ កាលពីថ្ងៃទី១៤ ខែឧសភា បានបណ្តេញជនជាតិចិនចំនួន៧០នាក់ ក្នុងនោះមានស្រីចំនួន៤នាក់ ចេញពីកម្ពុជា ដោយ សារពួកគេលួចបើកល្បែងតាមប្រព័ន្ធអ៊ីធីណែត។ នេះបើយោងតាមទំព័រហ្វេសប៊ុកអគ្គនាយកដ្ឋានអន្តោប្រវេសន៍។
លោកឧត្តមសេនីយ៍ឯក អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធីបានប្រាប់ក្រុមអ្នកសារព័ត៌មានថា ជនជាតិចិនទាំងអស់នេះត្រូវបានបណ្ដេញចេញតាមជើងយន្តហោះលេខ ZF 9044ពីទីក្រុងភ្នំពេញឆ្ពោះទៅប្រទេសកំណើតរបស់ពួកគេវិញ។
ជនជាតិចិនទាំង ៧០នាក់នេះ ត្រូវបានឃាត់ខ្លួនកាលពីថ្ងៃទី ២២ ខែមេសា ឆ្នាំ ២០១៨ ពាក់ព័ន្ធករណីលួចស្នាក់នៅហួសទិដ្ឋាការកំណត់ គ្មានលិខិតឆ្លងដែន និងបើកល្បែងភ្នាល់តាមប្រព័ន្ធអ៊ីធីណែត ដោយខុសច្បាប់។ កាលពីចុងខែមេសា សមត្ថកិច្ចកម្ពុជាបានចាប់ខ្លួនឧក្រិដ្ឋជន ជនជាតិចិនចំនួន ១១៩នាក់ពីបទជំរិតទារប្រាក់តាមប្រព័ន្ធអ៊ីនធឺណេតក្នុងទីក្រុងភ្នំពេញ។ក្នុងចំណោម មនុស្សទាំង ១១៩នាក់នោះមានស្ត្រី១៩នាក់ កាន់លិខិតឆ្លងដែនទេសចរណ៍ចូលក្នុងប្រទេសកម្ពុជា។
ចាប់តាំងពីឆ្នាំ ២០១២មក យ៉ាងហោចណាស់មានជនជាតិចិន និងចិនតៃវ៉ាន់ជាង ១ពាន់នាក់ហើយ ត្រូវបានសមត្ថកិច្ចចាប់បញ្ជូនចេញពីកម្ពុជា ពាក់ព័ន្ធនឹងបទល្មើសតាមប្រព័ន្ធអ៊ីនធឺណេត៕
