ភ្នំពេញ៖ លោក អ៊ាន សុឃីម អភិបាលរដ្ឋាករស្វយ័តដឹកជញ្ជូនសាធារណៈរថយន្ដក្រុង នៃសាលារាជធានីភ្នំពេញ បានឱ្យដឹងថា នៅឆ្នាំ២០១៧ និង២០១៨ ខាងមុខនេះ ប្រទេសជប៉ុន និងចិន នឹងផ្ដល់រថយន្ដក្រុងចំនួន២៤០គ្រឿងសម្រាប់ដឹកជនពិការនៅកម្ពុជា។
ការថ្លែងរបស់លោក អ៊ាន សុឃីម ធ្វើឡើងនៅក្នុងវេទិការសន្ទនា រវាងអង្គការជនពិការអន្ដរជាតិ និងដៃគូរពាក់ព័ន្ធ កាលពីថ្ងៃម្សិលមិញ នៅភោជនីយដ្ឋានទន្លេបាសាក់២ រាជធានីភ្នំពេញ។
លោក អ៊ាន សុឃីម បានបញ្ជាក់ថា រថយន្ដទាំងនោះ នឹងជួយសម្របសម្រួលការធ្វើដំណើររបស់ជនពិការដែលត្រូវធ្វើដំណើរតាមរថយន្ដក្រុងដោយមានជំរាល ងាយស្រួលដល់ជនពិការឡើងលើរថយន្ដ។
នៅក្នុងវេទិការនេះដែរ អង្គការជនពិការអន្ដរជាតិ រួមនិងជនពិការ មួយចំនួនបានអំពាវនាវឱ្យដៃគូរពាក់ព័ន្ធទាំងអស់ធ្វើយ៉ាងណា អនុគ្រោះដល់ជនពិការកម្ពុជា ដែលត្រូវធ្វើដំណើរលើផ្លូវសាធារណៈ និងតាមសេវាដឹកជញ្ជូនសាធារណៈរបស់សាលារាជធានីភ្នំពេញ៕